ថ្មីៗនេះ ក្រុមហ៊ុនរថយន្ដស្ព័រប្រណិត Bugatti បានសម្ភោធចេញរថយន្ដ​ Hypercar ម៉ូដែលថ្មីរបស់ខ្លួនសម្រាប់ឆ្នាំថ្មីនេះ ឈ្មោះថា Bugatti Tourbillon ជាមួយសមត្ថភាពមិនធម្មតា កម្លាំងលើស ១៧០០ សេះ និងតម្លៃក៏មិនធម្មតាតែ ៤ លានដុល្លារប៉ុណ្ណោះ។ 

Bugatti ត្រូវបានគេស្គាល់ថាជាក្រុមហ៊ុនដែលកម្រចេញរថយន្ដ hypercar ម៉ូដែលថ្មី ដោយភាគច្រើនក្រុមហ៊ុនរថយន្ដស្ព័រប្រណិតមួយនេះ និយមតែដំឡើងសេរីប៉ុណ្ណោះ ជាក់ស្ដែងដូចពេលនេះ Bugatti ទើបតែចេញ Tourbillon ជាម៉ូដែលថ្មីទាំងស្រុង ដែលចន្លោះពីម៉ូដែលចាស់ជាង ៨ឆ្នាំ ជាមួយនឹងរូបរាងនៅតែអេម ទំលាក់ខ្លួនទាបជាង Chiron 33mm និងមានការរចនា buff ជាងម៉ូដែលមុនៗ ដែលលោក Rimac អគ្គនាយកថ្មីរបស់​ Bugatti និយាយលេងថា វាជាបងប្អូន Chiron​ គ្រាន់តែសាច់ដុំធំជាង និងមុខកាចជាង។ 

ឈ្មោះរបស់វា Bugatti Tourbillon យកតាមគ្រឿងបង្គុំនាឡិកាប្រណិតរបស់ស្វីស ដែលមានមុខងារការពារការដំណើរការ មិនប្រក្រតីរបស់នាឡិការពេលមានបម្រែបម្រួលទំនាញ ដែលការរចនារបស់វាក៏ដូចនឹងឈ្មោះដែរ ដោយវាត្រូវធ្វើជាគ្រោងៗ បង្ហាញគ្រឿងក្នុង (ដូចទៅនឹងនាឡិកាទាំងនោះដែរ) តែគោលបំណងគឺត្រឹមតែឲ្យត្រូវឈ្មោះរបស់វានោះទេ តែដើម្បីកាត់បន្ថយទម្ងន់របស់វា និងធ្វើឲ្យមានខ្យល់ចេញចូលច្រើនដល់ទៅម៉ាស៊ីន។ 

បើនិយាយពីរូបរាងរបស់វាវិញ Tourbillon នៅតែរក្សាអត្តសញ្ញាណ Bugatti ដដែលជាពិសេសផ្នែកខាងមុខ ជាមួយបាណាជើងសេះ (horseshoe grille) ដែលធំជាងមុន កាន់តែទាបជាងមុន​ អមនឹងភ្នែក (ចង្កៀងមុខ) មុត ដែលលើកពណ៌ខ្លួនរបស់វាឡើងកាន់តែស្រស់ ជាមួយទ្វារស្លាបមេអំបៅ (បើកឡើងទៅលើ) ជាដើម។

ផ្នែកខាងក្នុង ក៏ត្រូវបានរៀបចំសង្ហាខ្លាំង ជាមួយអេក្រង់កម្សាន្ដលាក់ចូលទៅខាងក្នុង dashboard ហើយប៉ូតុងមុខងារបញ្ជាផ្សេងៗ ត្រូវបានរចនាជាពណ៌ titanium, ត្បូង sapphire និង rubies ហើយ center console ក៏ត្រូវបានរចនាជាមួយ alluminium និងកែវ crystal ដែលធ្វើឲ្យផ្នែកខាងក្នុងរំលេច​ភ្លឺផ្លេក គួរឲ្យទាក់ភ្នែកពេលត្រូវភ្លើង (ពិសេសពេលបើកក្នុងក្រុង រំលេចពណ៌ចម្រុះពីភ្លើងខាងក្រៅមក)។   

Bugatti Tourbillon មិនត្រូវបានបំពាក់ម៉ាស៊ីន 8.0 litre quad-turbocharged W16 ដូច Bugatti ដទៃក្នុងសេរីសតវត្សទី ២១ របស់ខ្លួននោះទេ តែជំនួសមកវិញដោយម៉ាស៊ីនហាយប្រីត 8.3 litre aperated ពី V16 ជាមួយថ្មថាមពល ២៥kWh និងម៉ូទ័រអគ្គិសនីពីរមុខ និងមួយទៀតនៅខាងក្រោយ ផលិតកម្លាំងបានសរុប ១៧៧៥ bhp អមជាមួយនឹង suspension បែប Multilink aluminium, ហ្រ្វាំង carbon ceramic ដែលប្រើប្រាស់ប្រព័ន្ធ brake-by-wire និង រត់ដោយប៉ុង ២ (Four Wheel Drive) ជាន់ល្បឿនស្ទុះពី ០ ទៅ ១០០គម/ម៉ ប្រើពេល ២ វិនាទី ជាមួយល្បឿនអតិបរមា ៤៤៥គម/ម៉ ផងដែរ។​

តាមការឲ្យដឹងពី Bugatti ថា Tourbillon នឹងចាប់ផ្ដើមដំណើរការផលិតបន្ទាប់ពី ផលិតកម្មរបស់ Bugatti Mistral Roadster និង Bolide Track car បញ្ចប់នៅក្នុងរោងចក្រ Molsheim ទីស្នាក់ការ Bugatti ក្នុងប្រទេសបារាំង ដែលប្រហែលជារង្វង់ឆ្នាំ ២០២៦​ ជាមួយនឹងតម្លៃខ្ទង់ ៣.៨ លានអឺរ៉ូ ឬប្រមាណ ៤.០៦៨ លានដុល្លារ។ 

អត្ថបទ៖ Andra 

ប្រភព៖ Car Throttle 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!