សម្រាប់បងប្អូនប្រជាពលរដ្ឋជាម្ចាស់យានជំនិះដែលមានទីលំនៅអចិន្ដ្រៃយ៍នៅភ្នំពេញ និងមានបំណងចង់ចុះបញ្ជីយានជំនិះផ្លាកលេខភ្នំពេញ ឬផ្លាកលេខកម្ពុជា ប៉ុន្ដែមានអត្តសញ្ញាណបណ្ណខេត្ត អាចដាក់ពាក្យស្នើសុំចុះបញ្ជីយកលេខភ្នំពេញ ឬលេខកម្ពុជាបាន ដោយភ្ជាប់ជាមួយឯកសារមួយចំនួននេះ។ 

យោងតាមប្រកាសស្ដីពី បែបបទ និងនិតិវិធីនៃការចុះបញ្ជីយានជំនិះ ការផ្ដល់ផ្លាកលេខយានជំនិះ និងការលុបយានជំនិះចេញពីបញ្ជីយានជំនិះ របស់ក្រសួងសាធារណការ និងដឹកជញ្ជូន ប្រការ ៤ ចំណុចទី ១ បានបង្ហាញថា សម្រាប់ការចុះបញ្ជីយានជំនិះធម្មតា (ជាទូទៅ) ម្ចាស់យានយន្ដត្រូវភ្ជាប់មកជាមួយឯកសារដូចជា ពាក្យសុំចុះបញ្ជីយានជំនិះ, វិញ្ញាបនបត្រត្រួតពិនិត្យលក្ខណៈបច្ចេកេទេសយានជំនិះ (ឆៀក), បង្កាន់ដៃពន្ធយានជំនិះ, វិកយបត្រអាករ (លិខិតទិញលក់សម្រាប់យានជំនិះនាំចូលផ្ទាល់ខ្លួន) និងអត្តសញ្ញាណបណ្ណម្ចាស់កម្មសិទ្ធ​ ដែលត្រង់ចំណុចនេះ ក៏បានបញ្ជាក់ថា សម្រាប់ម្ចាស់យានជំនិះដែលមានអាសយដ្ឋានបច្ចុប្បន្ន ខុសពីអាសយដ្ឋានក្នុងអត្តសញ្ញាណបណ្ណ ត្រូវភ្ជាប់បន្ថែមមកជាមួយ ឯកសារដូចជា សៀវភៅគ្រួសារ ឬសៀវភៅស្នាក់នៅអចិន្ដ្រៃយ៍ នៅរាជធានីភ្នំពេញ អមជាមួយអត្តសញ្ញាណបណ្ណអាសយដ្ខានខេត្ត ជាច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ជ។ 

ក្នុងនោះដែរ ម្ចាស់យានយន្ដអាចចូលឆែកមើលតម្លៃលេខនីមួយៗតាមរយៈ គេហទំព័រ https://vehicle.mpwt.gov.kh​ បាន ហើយករណីម្ចាស់យានជំនិះមានលេខចុះបញ្ជីយានជំនិះ ដូចជា វិញ្ញាបនបត្របញ្ជាក់ការទិញ ឬដេញថ្លៃលេខចុះបញ្ជីបាន ឬលិខិតរក្សាទុកលេខចុះបញ្ជីយានជំនិះ ម្ចាស់យានជំនិះត្រូវភ្ជាប់មកជាមួយឯកសារចុះបញ្ជីយានជំនិះនេះ។ 

សូមបញ្ចាក់ថា បងប្អូនជាម្ចាស់យានជំនិះត្រូវដាក់ពាក្យសុំចុះបញ្ជីនេះ នៅទីតាំងផ្ដល់សេវាសាធារណៈ ដោយក្រសួងសាធារណការ និងដឹកជញ្ជូន ឬ តាមប្រព័ន្ធស្វ័យប្រវត្តិកម្មចុះបញ្ជីយានជំនិះក្នុងគេហទំព័រ https://vehicle.mpwt.gov.kh​ ។ 

ប្រភព៖ ក្រសួងសាធារណការ  និងដឹកជញ្ជូន

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!