កម្ពុជា ត្រៀមស្វាគមន៍ក្រុមហ៊ុនផលិតសំបកកង់រថយន្ដ ២​បន្ថែមទៀត មកដាក់វិនិយោគធ្វើរោងចក្រផលិតសំបកកង់រថយន្ដ នាពេលឆាប់ៗនេះ ជាមួយនឹងការប្រើប្រាស់វត្ថុធាតុដើមជ័រកៅស៊ូរបស់កម្ពុជាផ្ទាល់។ 

យោងតាមប្រសាសន៍ឯកឧត្តម ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជានៃក្រុមប្រឹក្សាអភិវឌ្ឍន៍កម្ពុជា ថ្លែងនៅក្នុងវេទិកាធុរកិច្ចកម្ពុជា ឆ្នាំ២០២៣ ដែលរៀបចំឡើងដោយសមាគមឧកញ៉ាកម្ពុជា និងក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី ១១ ខែសីហានេះ ស្ដីពីការរីកចម្រើនលើវិនិយោគទុនក្នុងតំបន់សេដ្ឋកិច្ចពិសេស បានឲ្យដឹងថា សម្រាប់ឧស្សាហកម្មផលិតសំបកកង់រថយន្ដ បច្ចុប្បន្ននេះ កម្ពុជា មានរោងចក្រចំនួន ៣ ដែលស្ថិតក្នុងខេត្តដូចជា បាវិត (ស្វាយរៀង), ព្រះសីហនុ, ក្រចេះ, ហើយឆាប់ៗនេះ នឹងមានក្រុមហ៊ុនផលិតសំបកកង់រថយន្ដ ២ ទៀត កំពុងចរចារ​​ជ្រើសរើសទីតាំង ក្នុងបណ្ដាតំបន់សេដ្ឋកិច្ចពិសេសកម្ពុជា​ ដើម្បីសាងសង់រោងចក្ររបស់ខ្លួន។ 

ឯកឧត្តមក៏បានបង្ហាញជំនឿជឿជាក់ថា ក្រុមហ៊ុនសំបកកង់រថយន្ដទាំង ៥ នេះ នឹងចូលរួមចំណែកស្រូបយកកៅស៊ូកម្ពុជា យ៉ាងតិច ២ សែនតោនក្នុងមួយឆ្នាំ ធៀបទៅនឹងបរិមាណសរុប ជ័រកៅស៊ូដែលផលិតទូទាំងប្រទេសប្រមាណ ៥០ មុឺនតោន ទាំងផ្លូវការ និងក្រៅផ្លូវការ ក្នុងការនាំចេញក្នុងមួយឆ្នាំ។ 

ឯកឧត្តមបានបន្ថែមទៀតថា លោកបាន ពិភាក្សាជាមួយ ក្រុមហ៊ុនទាំងនោះឲ្យទិញកៅស៊ូកម្ពុជា ទៅផលិតសំបកកង់រថយន្ដនោះ ដោយហេតុថា ដើម្បីផលិតសំបកកង់រថយន្ដមួយគឺ ត្រូវការបរិក្ខារ និងវត្ថធាតុដើមជាង​១០០ មុខ ហើយផលិតផលកៅស៊ូធម្មជាតិ គឺជាសមាសធាតុសំខាន់ក្នុងសង្វាក់ផលិតកម្មនេះ ដែលជាឱកាសល្អសម្រាប់កម្ពុជាក្នុងការលក់ផលិតផលកៅស៊ូរបស់យើងផ្ទាល់។ ឯកឧត្តមបានបន្ដទៀតថា មកដល់ពេលនេះ​មានតែក្រុមហ៊ុនមួយទេ ដែលបានទិញកៅស៊ូកម្ពុជា​ ដោយក្នុងរយៈពេល ៥ ខែ ក្រុមហ៊ុនទិញបាន ១៤០០០ តោន និងនាំចូលវត្ថុពាក់កណ្ដាលសម្រេច និងសមាសធាតុផ្សំផ្សេងៗទៀតពីក្រៅប្រទេស។ 

គួបបញ្ជាក់ផងដែរថា ក្រុមហ៊ុនផលិតគ្រឿងបរិក្ឋារ និងគ្រឿងបន្ទាស់យានយន្ដនេះ ក៏ជាខ្សែសង្វាក់សំខាន់មួយសម្រាប់វិស័យឧស្សាហកម្មយានយន្ដនៅកម្ពុជា​ ដោយបច្ចុប្បន្ន ក្រុមហ៊ុនធំៗ ដូចជា RMA Cambodia (Ford), K Cambodia (Isuzu), Hyundai Motor, Daehan Auto, HGB Motor, EM Auto, Toyota Tsusho, China Matrix ជាដើម កំពុងដំណើរការរោងចក្រផ្គុំដំឡើងរថយន្ដនៅកម្ពុជាស្រាប់ និងមានក្រុមហ៊ុនផ្សេងៗទៀតក៏កំពុងតែពិភាក្សាជាមួយរាជរដ្ឋាភិបាលដើម្បីចូលមកដាក់ទុនផងដែរ។  

ប្រភព៖ សមាគមឧកញ៉ាកម្ពុជា 

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!