រថយន្ត Ford Ranger ស៊េរីថ្មីឆ្នាំ ២០២៣ ត្រូវបានដាក់សម្ពោធជាផ្លូវការនៅប្រទេសកម្ពុជា

👉ចង់ដឹងឬចែករំលែកបទពិសោធន៍ប្រើឡាន សូមចូលគ្រុបមួយនេះ Advan Auto Discussion ចុច Subscribe Channel Telegram របស់ Advan Auto ដើម្បីទទួលបានព័ត៌មាន ចំណេះដឹង និងការកំសាន្ដថ្មីៗអំពីរថយន្ដ

………………………………………………………………………………….

កាលពីថ្ងៃទី ១៧ ខែមិថុនា ឆ្នាំ២០២២ កន្លងទៅនេះ ក្រុមហ៊ុន អ អិម អេ (ខេមបូឌា) ម.ក ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបានប្រារព្ធពិធីសម្ពោធជាផ្លូវការនៃរថយន្ត Ford Ranger ស៊េរីថ្មីឆ្នាំ ២០២៣ នៅ ដឹ ព្រេមៀ សេនធ័រ សែនសុខ។

កម្មវិធីនេះត្រូវបានបែងចែកជា ២ ផ្នែក ពេលព្រឹកជាកម្មវិធីបើកបរសាកល្បង Ford Ranger ស៊េរីថ្មីឆ្នាំ ២០២៣ ជាច្រើនគ្រឿងទាំងប្រភេទ Ford Ranger XLT និង Ford Ranger Wildtrak ជាមួយនឹងអ្នកជំនាញបច្ចេកទេស Ford ជាពិសេសអតិថិជនទទួលបានការរៀនពីវគ្គបណ្តុះបណ្តាលស្តីពីការបើកបរដែលធ្វើឲ្យលោកអ្នកទទួលបានបទពិសោធន៏បើកបរដ៏ថ្មីស្រឡាងជាមួយនឹងបច្ចេកវិទ្យាយ៉ាងច្រើនលើសពីការរំពឹងទុក។

សម្រាប់កម្មវិធីពេលល្ងាចគឺជាពិធីសម្ពោធជាផ្លូវការនៃរថយន្តនេះដែលបានអញ្ជើញចូលរួមពីសំណាក់ភ្ញៀវកិត្តិយស និងអតិថិជន Ford និងវត្តមានដ៏ខ្ពស់ខ្ពស់របស់ ឯកឧត្តម ឈួន ដារ៉ា រដ្ឋលេខាធិការនៃក្រសួងពាណិជ្ជកម្ម លោក Benjamin V. Wohlauer ភារធារីនៃស្ថានទូតអាមេរិកប្រចាំព្រះរាជាណាចក្រកម្ពុជា លោកស្រី Dianne Craig អគ្គនាយិកាគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company លោកស្រី Yukontorn Wisadkosin អគ្គនាយិកាគ្រប់គ្រងទីផ្សារអាស៊ាននៃក្រុមហ៊ុន Ford Motor Company លោក Kevin Whitcraft អគ្គនាយកនៃក្រុមហ៊ុន អ អិម អេ (គ្រុប) លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងបណ្តាមិត្តអ្នកសារព័ត៌មានជាច្រើន។

ឆ្លៀតក្នុងឱកាសនេះដែរ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ដោយសារគុណភាព សុវត្ថិភាព និងបច្ចេកវិទ្យាទំនើបៗនៃរថយន្ត Ford អាស្រ័យហេតុនេះហើយទើបរថយន្ត Ford បានទទួលចំណាត់ថ្នាក់លេខ ១ ក្នុងចំណែកទីផ្សាររថយន្តថ្មីក្នុងប្រទេសកម្ពុជាអស់រយៈពេលច្រើនឆ្នាំជាប់ៗគ្នា។ សម្រាប់ថ្ងៃនេះក្រុមហ៊ុននឹងនាំយកអ្វីដែលថ្មីមកជូនដល់អតិថិជនទាំងអស់គ្នា ដែលក្រុមហ៊ុននឹងធ្វើពិធីសម្ពោធជាផ្លូវការខ្នាតធំពុំធ្លាប់មាននៅប្រទេសកម្ពុជាសម្រាប់រថយន្ត Ford Ranger ស៊េរីថ្មីឆ្នាំ ២០២៣ ដែលត្រូវបានផ្លាស់ប្តូររូបរាងថ្មីទាំងស្រុង។

លោកស្រី Dianne Craig អគ្គនាយិកាគ្រប់គ្រងក្រុមទីផ្សារអន្តរជាតិនៃក្រុមហ៊ុន Ford Motor Company ក៏បានមានប្រសាសន៍ដែរថា៖ “ រថយន្ត Ford Ranger គឺជាដៃគូដ៏ជឿជាក់មួយរបស់ម្ចាស់អាជីវកម្មខ្នាតតូច កសិករ គ្រួសារ អ្នកផ្សងព្រេង និងអាជីវកម្មនានានៅតាមទីផ្សារបណ្តាប្រទេសជាង ១៨០ នៅជុំវិញពិភពលោក។ ទីផ្សារមួយក្នុងចំណោមនោះគឺព្រះរាជាណាចក្រកម្ពុជាដែលមានចំណែកទីផ្សាររហូតដល់ទៅ ៦១% នៃរថយន្ត Pickup ខ្នាតកណ្តាលនេះ ដែលនេះជាតួលេខខ្ពស់បំផុតនៅលើពិភពលោក។

លោក Benjamin V. Wohlauer ភារធារីនៃស្ថានទូតអាមេរិកប្រចាំព្រះរាជាណាចក្រកម្ពុជា ក៏បានសម្តែងនូវការកោតសរសើរមកកាន់ក្រុមហ៊ុន អ អិម អេ (ខេមបូឌា) ផងដែរ ដោយបានឃើញការគាំទ្រយ៉ាងពេញទំហឹងនៃផលិតផលអាមេរិកនៅក្នុងប្រទេសកម្ពុជា ជាក់ស្តែងគឺរថយន្ត Ford តែម្តង។ ឯកឧត្តម ឈួន ដារ៉ា រដ្ឋលេខាធិការនៃក្រសួងពាណិជ្ជកម្ម បានមានប្រសាសន៍ថា៖ “យើងសង្ឃឹមថាការដាក់សម្ពោធជាផ្លូវការនៃរថយន្ត Ford Ranger ស៊េរីថ្មីឆ្នាំ ២០២៣ នេះគឺផ្តល់នូវសារៈសំខាន់ មិនត្រឹមតែជាប្រយោជន៍ដល់ក្រុមហ៊ុនប៉ុណ្ណោះទេ តែក៏ផ្តល់ប្រយោជន៍ដល់កិច្ចសហប្រតិបត្តិការរវាងកម្ពុជា និងសហរដ្ឋអាមេរិក ផ្នែកពាណិជ្ជកម្ម ក៏ដូចជាបណ្តាប្រទេសជាច្រើនដែលបានមកវិនិយោគនៅកម្ពុជាយើងនេះផងដែរ។”

គួរបញ្ជាក់ផងដែរថានេះជាកម្មវិធីសម្ពោធរថយន្តដែលធំជាងគេពុំធ្លាប់មាននៅប្រទេសកម្ពុជា ដែលត្រូវបានប្រារព្ធឡើងរហូតដល់ទៅ ៧ អគារ និងមានអតិថិជនចូលរួមយ៉ាងច្រើនកុះករ ព្រមទាំងជឿជាក់ថា រថយន្តនេះនឹងមកបន្តតំណែងពីរថយន្ត Ford Ranger ស៊េរីមុនដែលឈរជើងជារថយន្ត Pickup ថ្មីលក់ដាច់ជាងគេក្នុងទីផ្សារប្រទេសកម្ពុជា ដោយសារតែរថយន្តនេះមាននូវភាពឆ្លាតវៃ ធន់រឹងមាំ និងទំនើបអស្ចារ្យលើសគេ។

កម្រងរូបភាពបន្ថែមពីកម្មវិធី សម្ភោធរថយន្ត Ford Ranger ២០២៣ ៖