យោងតាមសេចក្ដីជូនដំណឹងពីរដ្ឋបាលរាជធានីភ្នំពេញ កាលពីថ្ងៃទី ៣ បានឲ្យដឹងថា ក្នុងឱកាសបុណ្យចូលឆ្នាំខ្មែរខាងមុខនេះ រថយន្ដក្រុងចំនួន ៣៤៥ គ្រឿង នឹងជូនបងប្អូនប្រជាពលរដ្ឋទៅស្រុកកំណើត និងត្រឡប់ពីស្រុកមកវិញ រយៈពេល ៥ ថ្ងៃ គិតចាប់ពីថ្ងៃទី ១៣ ដល់ថ្ងៃទី ១៧ ខែ មេសា ឆ្នាំ ២០២៣ ដោយមិនត្រូវការឲ្យបង់ប្រាក់នោះទេ។ 

សូមជម្រាបជូនថា ការផ្ដល់ជូនសេវាដឹកជញ្ជួនដោយឥតគិតថ្លៃនេះ គឺដើម្បីសម្រាលការលំបាក​ និងការចំណាយរបស់ពលរដ្ឋ ដោយសារការការឡើងថ្លៃរបស់តាក់ស៊ី ឬឡានឈ្នួលផ្សេងៗ ហើយមិនខុសពីឆ្នាំកន្លងទៅនោះទេ ស្របតាមប្រសាសន៍ណែនាំពី ប្រមុខរាជរដ្ឋាភិបាលកម្ពុជា ​រថយន្ដក្រុងរដ្ឋបាលរាជធានីភ្នំពេញនឹងធ្វើការដឹកជញ្ជូនបងប្អូនប្រជាពលរដ្ឋទៅ តាមបណ្ដាខេត្តនានា ដោយឥតគិតថ្លៃ ក្នុងឱកាសបុណ្យប្រពៃណីជាតិ ២ រួមមានពិធីបុណ្យចូលឆ្នាំខ្មែរ និងពិធីភ្ជុំបិណ្ឌ ដែលកាលពីអំឡុងពេលបុណ្យភ្ជុំបិណ្ឌឆ្នាំ ២០២២ កន្លងទៅ រដ្ឋាករស្វយ័តដឹកជញ្ជូនសាធារណៈរថយន្តក្រុង បានដឹកប្រជាពលរដ្ឋ ៣៥ ០០០នាក់ ដោយប្រើប្រាស់រថយន្តក្រុងចំនួន ១៧៥គ្រឿង ធ្វើដំណើរតាមផ្លូវជាតិលេខ ១ ដល់ផ្លូវជាតិលេខ ៧ ជួយសម្រួលដល់ការធ្វើដំណើរ​ និងការចំណាយរបស់ប្រជាពលរដ្ឋគួរឲ្យកត់សម្គាល់ ហើយសម្រាប់ឆ្នាំថ្មីនេះ ជើងដឹកជញ្ជូនបានកើនឡើងជាងមុនគុណនឹង ២ ខណៈរដ្ឋបាលរាជធានីភ្នំពេញទើប តែទទួលបានជំនួយជារថយន្ដក្រុងពី ក្រុមហ៊ុន ប៊ូយ៉ុង គ្រុប របស់សាធារណរដ្ឋកូរ៉េ ចំនួន ២០០ គ្រឿង បន្ថែម។ 

សម្រាប់រថយន្ដ ៣៤៥ គ្រឿងនេះ ៧០ គ្រឿងនឹងទុកសម្រាប់ដំណើរការក្នុងរាជធានីភ្នំពេញ​ ខណៈ ២៧៥ គ្រឿង ទៀតសម្រាប់ធ្វើដំណើរទៅតាមខេត្ត រីឯតារាងការចេញដំណើរវិញ ផ្លូវជាតិលេខ ១ មាន ២ ខ្សែ ប្រើរថយន្ដ ១០ គ្រឿង កាត់ខេត្ត កណ្ដាល ព្រៃវែង និងស្វាយរៀង, ផ្លូវជាតិលេខ ២ មាន ១ ខ្សែ រថយន្ដ ៥ គ្រឿង កាត់កណ្ដាល តាកែវ, ផ្លូវជាតិលេខ ៣ មាន ២ខ្សែ ១០ គ្រឿង កាត់ ខេត្តកែប និងកំពត, ផ្លូវជាតិលេខ ៤ មាន ២ ខ្សែ ១០គ្រឿង កំពង់ស្ពី និងព្រះសីហនុ, ផ្លូវជាតិលេខ ៥ មាន ៤ ខ្សែ ១១៥ គ្រឿង កាត់ បាត់ដំបង បន្ទាយមានជ័យ ១០០ គ្រឿង និងកំពង់ឆ្នាំង ពោធិសាត់ ១៥ គ្រឿង, ផ្លូវជាតិលេខ ៦, ៥ គ្រឿងទៅខេត្តកំពង់ធំ និង ១០០ គ្រឿងទៅខេត្ត សៀមរាប ក្នុងនោះមានភ្ជាប់ផ្លូវជាតិលេខ ៧ ទៅ កំពង់ចាម និងត្បូងឃ្មុំ ១០គ្រឿងផងដែរ ចុងក្រោយផ្លូវជាតិលេខ ៨ និង ១៣ មាន ២ខ្សែ ១០ គ្រឿង កាត់ ក្រចេះ និងស្ទឹងត្រែង។ 

បញ្ជាក់ សម្រាប់ម៉ោងចេញដំណើរ គឺគ្រប់ខ្សែ មិនថាពីភ្នំពេញ ទៅ បណ្ដាខេត្ត ឬ ពីបណ្ដាខេត្ត មកភ្នំពេញ នឹងចេញក្នុងពេលតែមួយ គឺនៅរៀងរាល់ ម៉ោង ៥ និង ៣០ នាទី ព្រឹក ដូច្នេះ សូមបងប្អូនប្រញាប់រួសរាន់ ទៅឲ្យទាន់ពេលវេលា នៅតាមចំណតដែលបានកំណត់។ 

ឆ្លៀតក្នុងឱកាសនេះ ផងដែរ រដ្ឋបាលរាជធានីភ្នំពេញ ក៏សូមអំពាវនាវដល់ក្រុមហ៊ុន និងម្ចាស់រថយន្ដដឹកជញ្ជូនទាំងឡាយ ឲ្យរក្សាតម្លៃដឹកជញ្ចូនដដែល ពុំដំឡើងថ្លៃ ក្នុងឱកាសបុណ្យទានបែបនេះ ដើម្បីរួមចំណែកសម្រួលជីវភាពរស់នៅរបស់បងប្អូន ប្រជាពលរដ្ឋទាំងអស់គ្នា។ 

សម្រាប់ព័ត៌មានបន្ថែម ទាក់ទងម៉ោងចេញដំណើរ និងចំណតរថយន្ដ សូមពិនិត្យមើលលើសេចក្ដីជូនដំណឹងខាងក្រោម៖ 

ប្រភព៖ រដ្ឋបាលរាជធានីភ្នំពេញ 

អត្ថបទ៖ Andra