តាមការចុះផ្សាយពី ក្រសួងព័ត៌មានកាលពីថ្ងៃទី ៧ មិនា កន្លងទៅថ្មីៗនេះ បានឲ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ​ ដែលនឹងឈានចូលមកដល់នៅខែក្រោយនេះ រដ្ឋបាលរាជធានីភ្នំពេញ បានត្រៀមរថយន្ដចំនួន ៤០០ គ្រឿង សម្រាប់ដឹកប្រជាពលរដ្ឋទៅស្រុកកំណើត ដោយឥតគិតថ្លៃ។ 

យោងតាមប្រសាសន៍ របស់ឯកឧត្តម ឃួង ស្រេង អភិបាលរាជធានីភ្នំពេញ បានឲ្យដឹងថា មិនខុសពីឆ្នាំកន្លងទៅនោះទេ ស្របតាមប្រសាសន៍ណែនាំពីប្រមុខរាជរដ្ឋាភិបាលកម្ពុជា​ សម្ដេចអគ្គមហាសេនាបតីតេជោ ហ៊ុន សែន រថយន្ដត្រូវបានត្រៀមខ្លួនដឹកជញ្ជូនបងប្អូនប្រជាពលរដ្ឋ តែឆ្នាំនេះ នឹងបន្ថែម ជើងដឹកជញ្ជូនច្រើនជាងមុន ខណៈរដ្ឋបាលរាជធានីភ្នំពេញទើបតែទទួលបានជំនួយជារថយន្ដក្រុងពី ក្រុមហ៊ុន ប៊ូយ៉ុង គ្រុប របស់សាធារណរដ្ឋកូរ៉េ ចំនួន ២០០ គ្រឿង ទៅកាន់ខេត្តដែលមានតម្រូវការច្រើនដូចជា សៀមរាប និងបន្ទាយមានជ័យ តាមផ្លូវជាតិលេខ៥ និងលេខ៦ ដើម្បីជួយសម្រាលការលំបាករបស់ពលរដ្ឋ ដោយសារការការឡើងថ្លៃរបស់តាក់ស៊ី។

លោក កែវ ចាន់ណារិទ្ធ អភិបាលនៃរដ្ឋាករស្វយ័តដឹកជញ្ជូនសាធារណៈរថយន្ដក្រុង បានឲ្យដឹងដែរថា​ ពេលនេះ ក្រុមការងារ ខាងរដ្ឋាករស្វយ័ត ដឹកជញ្ជូន កំពុងពិភាក្សា រៀបចំផែនការបញ្ចេញរថយន្តក្រុង និងកម្លាំង ក្នុងការអនុវត្តផែនការឱ្យបានត្រឹមត្រូវថា តើត្រូវបន្ថែមជើង និងខ្សែរត់បន្ថែមទៀត ក្នុងកម្រិតណា ហើយជូនដំណឹងដល់សាធារណជនក្នុងពេលឆាប់ៗនេះ។

គួររំឭកដែរថា កាលពីអំឡុងពេលបុណ្យភ្ជុំបិណ្ឌឆ្នាំ ២០២២ កន្លងទៅ រដ្ឋាករស្វយ័តដឹកជញ្ជូនសាធារណៈរថយន្តក្រុង បានដឹកប្រជាពលរដ្ឋ ៣៥ ០០០នាក់ ដោយប្រើប្រាស់រថយន្តក្រុងចំនួន ១៧៥គ្រឿង ធ្វើដំណើរតាមផ្លូវជាតិលេខ ១ ដល់ផ្លូវជាតិលេខ ៧ ជួយសម្រួលដល់ការធ្វើដំណើរ​ និងការចំណាយរបស់ប្រជាពលរដ្ឋគួរឲ្យកត់សម្គាល់។  

ប្រភព៖ ក្រសួងព័ត៌មាន 

អត្ថបទ៖ Andra