Acura ​TLX ជាប្រភេទឡាន Sedan បែបស្ព័រ នឹង Luxury ដ៏ពេញនិយមមួយដែលផលិតដំបូងនៅឆ្នាំ២០១៥ ដល់២០២០ ចាត់ជាជំនាន់ទី១ នឹងពីឆ្នាំ២០២១ ដល់២០២៤ ចាត់ជាជំនាន់ទី២ ។

Acura ជាក្រុមហ៊ុនបុត្រសម្ព័ន្ធរបស់​ជប៉ុន Honda ដើម្បីប្រកួតប្រជែងទីផ្សារអាមេរិក អឺរ៉ុប មិនខុសគ្នាពី Toyota បង្កើត Lexus នោះទេ។

TLX សម្រាប់ឆ្នាំ២០២៤ ទោះបីជាមិនទាន់ប្ដូររាងទាំងស្រុង ឬផ្លាស់ប្ដូរអ្វីធំដុំក៏ដោយ ប៉ុន្ដែ រូបរាងដ៏ទាក់ភ្នែកបែកស្ព័ររបស់វា គួមផ្សំនឹងកម្លាំង Performance ជាមួយភាពទំនើបផងនោះ មិនអាចធ្វើឲ្យគេមិនចាប់អារម្មណ៍បានឡើយ។ 

ចំពោះឆ្នាំ២០២៤ Acura TLX ភ្ជាប់មកជាមួយជម្រើសម៉ាស៊ីន ២ប្រភេទ នឹងអមដោយ Trim/Option ចំនួន ៣ ដូចជា Technology, A-Specs នឹង Type-S ជាមួយតម្លៃថ្មីខ្លាញ់គោនៅទីផ្សារអាមេរិកចាប់ពី ៤៦,៩១៥ដុល្លារ ដល់ ៥៨,៩១៥ដុល្លារ។

Technology នឹង A-Specs បំពាក់ម៉ាស៊ីន Turbo ៤ស៊ីឡាំង ២.០លីត្រ ផលិតកម្លាំងបាន ២៧២សេះ កម្លាំងរមួល ២៨០ផោនហ្វីត រត់ដោយប្រអប់លេខ ១០វគ្គអូតូ បង្វិលកង់ដោយប៉ុង១ FWD និងប៉ុង២ AWD ជាមួយសន្ទុះល្បឿនពី ០ទៅ ១០០គីឡូម៉ែត្រប្រើពេល ៥.៩វិនាទី នឹងស៊ីសាំងខ្ទង់ ៧លីត្រជាង ទៅ ១០លីត្រជាងក្នុង ១០០ គីឡូម៉ែត្រ។

ចំណែកម៉ាស៊ីន High Performance នៅលើ Type-S ទំហំ ៦ស៊ីឡាំង ៣.០លីត្រ Turbo ផលិតកម្លាំងបានដល់ទៅ ៣៥៥សេះ កម្លាំងរមួល ៣៥៤ផោនហ្វីត ភ្ជាប់ជាមួយប្រអប់លេខ ១០វគ្គអូតូ បង្វិលកង់ដោយប៉ុង២ AWD ជាន់ស្ទុះពី ០ ទៅ ១០០គីឡូម៉ែត្រចាយពេល ៤.៩វិនាទី ជាមួយកម្រិតស៊ីសាំងចន្លោះពី ១០លីត្រ ទៅ ១២លីត្រ ក្នុង១០០គីឡូម៉ែត្រ។

ប្លុកខាងក្នុង មិនសាមញ្ញឡើយ បំពាក់កៅអីស្បែកប្រណិត ២ជួរ ជាមួយផ្ទៃទទឹងដល់ទៅ ១៩១១ម.ម ទូលាយល្អណាស់ អាចជិះបាន ៥នាក់មិនចង្អៀតឡើយ។

បើនិយាយពីភាពទំនើប និងបរិក្ខាដែលបំពាក់នៅលើ Type-S មានដូចជា៖ យាន់កង់ ២០អ៉ីង បំពាក់ហ្វ្រាំងប្រភេទ Brembo ជាមួយជើងក្រោម Adaptive Suspension កន្ទុយត្រី Spoiler ប្រភេទកាបូន រូបរាងតួរខ្លួនកាន់តែស្ព័រ ជាមួយទម្រង់ Aerodynamic ល្អ។

មុខងារបញ្ជាឆេះពីចម្ងាយ ខាងក្នុងបំពាក់អេក្រង់ថាច់ ១០.៥អ៉ីង Surround view Camera កៅអីក្ដៅត្រជាក់នៅជួរមុខ និងជួរក្រោយមានមុខងារកម្ដៅ កញ្ចក់កាត់ចំណាំងផ្លាត Wireless Charge Speaker ១៧គ្រាប់ ជាមួយមុខងារសំខាន់ៗជាច្រើនមួយចំនួនទៀតផងដែរ។

សម្រាប់ប្រព័ន្ធបច្ចេកវិទ្យាសុវត្ថិភាពជំនួយពេលបើកបរវិញ Acura TLX Type-S ទទួលបានមួយកញ្ចប់ដ៏ទំនើបចុងក្រោយរបស់ Honda ផងដែរ៕

ដោយ៖ Bunsak