តាមការចុះផ្សាយពី CNBC បានឲ្យដឹងថា លោក Akio Toyoda បានសម្រេចសម្រាកពីដំណែងជាអគ្គនាយកប្រតិបត្តិ ក្រុមហ៊ុនផលិតរថយន្ដយក្ស Toyota នៅថ្ងៃទី ១​ ខែ មេសា ឆ្នាំ ២០២៣ នេះ ដោយលោក Koji Sato ប្រធានក្រុមហ៊ុន Lexus បច្ចុប្បន្ននឹងឡើងគ្រប់គ្រងបន្ដ។ 

បើយោងតាមសម្ដីរបស់ លោក Akio នៅក្នុង សន្និសិទកាសែត កាលពីពេលថ្មីៗនេះ បានឲ្យដឹងថា ក្នុងរយៈពេល មួយទសវត្សជាង ដែលគាត់បម្រើការងារជាអគ្គនាយកក្រុមហ៊ុន Toyota នេះ គាត់បានជួបនូវផលវិបាកជាច្រើន ទាំងការងារផ្ទៃក្នុង និងឧបសគ្គពីខាងក្រៅ ព្រមទាំងការរិះគន់ ផ្សេងៗ លើការដឹកនាំរបស់គាត់ផងដែរ ដូច្នេះហើយ លោកសង្ឍឹម ថា ក្នុងរយៈពេលមួយទស្សវត្សនេះ លោកបានកសាងគ្រឹះរឹងមាំមួយឲ្យ Toyota បន្ដអភិវឌ្ឍខ្លួនទៅមុខទៀត។ 

ទាក់ទងជាមួយនឹងបញ្ហានេះ អ្នកវិភាគព័ត៌មាន សន្និដ្ឋានថា វាអាចបណ្ដាលមកពីស្ថានការណ៍ការផ្លាស់ប្ដូរ ឧស្សាហកម្មយានយន្ដអគ្គិសនី ដែលកំពុងតែមានប្រជាប្រិយភាពពេលបច្ចុប្បន្ន ដោយគ្រប់ក្រុមហ៊ុនផលិតរថយន្ដជុំវិញ ពិភពលោក បង្វែរទិសផ្ដោតលើការផលិតរថយន្ដអគ្គិសនីច្រើន​ នៅឡើយតែ Toyota ដែលមានសកម្មភាពតិចជាងគេ ខណៈធ្លាប់ជា ក្រុមហ៊ុននាំមុខលើរថយន្ដគ្រប់ប្រភេទ ជាពិសេសរថយន្ដហាយប្រ៊ីត ហើយការផ្លាស់ប្ដូរថ្មី នេះ នឹងជួយឲ្យ Toyota ផ្ដោតការយកចិត្តទុកដាក់លើផលិតកម្មរថយន្ដអគ្គិសនីឲ្យបានច្រើនជាងមុន។  

សូមជម្រាបថា ការសម្រាកពីដំណែងអគ្គនាយកនេះ មិនមែនមានន័យថា លោក Akio នឹងចូលនិវត្តន៍នោះទេ តែលោកនឹងផ្លាស់ប្ដូរទៅជាប្រធាន board វិញ ខណៈប្រធាន board បច្ចុប្បន្ន លោក Takeshi Uchiyamada នឹងផ្លាស់ប្ដូរជាសមាជិក board ត្រៀមខ្លួនសម្រាប់ចូលនិវត្តន៍ រីឯ លោក Koji Sato អនាគតអគ្គនាយកថ្មី នឹងទទួលបន្ទុករឿងកិច្ចការប្រតិបត្តិនៅក្នុងក្រុមហ៊ុន។ 

គួររំឭកថា លោក Akio Toyota ជាចៅរបស់ស្ថាបនិកក្រុមហ៊ុន Toyota ហើយបានទទួលគ្រប់គ្រង និងដឹកនាំ ក្រុមហ៊ុន Toyota តាំងពីខែ មិថុនា ឆ្នាំ ២០០៩ រហូតមកទល់បច្ចុប្បន្ននេះ ដែលគ្រោងបញ្ចប់អណ្ណត្តិនៅខែ មេសា ឆ្នាំ ២០២៣​ នេះ គិតទៅមានរយៈពេល (ជិត) ១៣ ឆ្នាំ។ 

ប្រភព៖ CNBC 

អត្ថបទ៖ Andra