ថ្មីៗនេះ BMW បានបញ្ចេញគម្រូរថយន្ដ ប្លែកមួយ ដែលអាចបញ្ជារឲ្យ ប្ដូរសម្បុរ​ខ្លួនបាន ៣២ ពណ៌ ព្រមទាំងមានបំពាក់បច្ចេកវិទ្យា digital ទំនើបខ្លាំង ដែលធ្វើឲ្យអ្នកបើកបរមានអារម្មណ៍ថាដូចបើកឡានក្នុង Video Game។

តាមការចុះផ្សាយពីគេហទំព័រផ្លូវការរបស់ BMW កាលពីពេលថ្មីៗ​នេះ បានឲ្យដឹងថា គម្រូរថយន្ដ បង្គួយប្រែកាយ របស់ខ្លួននេះ មានឈ្មោះថា BMW i Vision Dee ដែល Dee មកពីពាក្យថា "Digital Emotional Experience" ដែលបង្ហាញថា រថយន្ដនេះគឺធ្វើជាពិសេស សម្រាប់ឲ្យអ្នកបើកបរទទួលបទពិសោធន៍ថ្មី នៃទំនាក់ទំនងរវាងមនុស្ស និងបច្ចេកវិទ្យា ឆ្ពោះទៅរកអនាគតកាលនៃប្រព័ន្ធ Digital។

ក្រុមហ៊ុនបានបកស្រាយថា BMW i Vision Dee នេះ នឹងក្លាយជាមិត្តជិតស្និទ្ធមួយសម្រាប់អ្នកបើកបរគ្រប់រូប ដោយវាត្រូវបានបំពាក់បច្ចេកវិទ្យាឈ្លាសវៃ អាចបន្ស៊ាំខ្លួន ស្គាល់ពីទម្លាប់បើកបររបស់ម្ចាស់ និងដើរតួជាជំនួយការ បានដូចជាចេះរាយការណ៍ព័ត៌មានថ្មីៗ, ផ្ដល់ព័ត៌មានដែលអ្នកបើកបរត្រូវការ ឬវាគិតថាអាចមានប្រយោជន៍ និងចាំបាច់សម្រាប់អ្នកបើកបរ, រំឭក និងកំណត់កាលបរិច្ឋេទសំខាន់ៗ, អាចតម្រូវបរិយាកាស តាមការប្រែប្រួលអារម្មណ៍របស់ម្ចាស់ ដោយស្វ័យប្រវត្តិ, និងកំណត់មុខងារជាច្រើនទៀត ជាពិសេស ជាមួយនឹងបច្ចេកវិទ្យាថ្មី BMW Mixed Reality Slider ប្រើជាមួយនឹង Advanced BMW Headup Display ធ្វើឲ្យអ្នកបើកបរមានអារម្មណ៍ថាដូចជាបើកឡានក្នុងពិភពពិតផង ប្រឌិតផង (Mixed Reality and Virtual) ដែលមាន ៥ កម្រិត (analogue, driving-related information, contents of the communications system, augmented-reality projection, and entry into virtual worlds)។

លក្ខណៈពិសេសមួយទៀត ជាមួយនឹងប្រព័ន្ធ sensor កម្រិតខ្ពស់ជាច្រើនដែលត្រូវបានបំពាក់ អាចឲ្យវាបង្កើត និងបង្ហាញអារម្មណ៍បានដល់ទៅ ៩ (Facial expressions) ផ្សេងគ្នា តាមរយៈការបញ្ចេញពន្លឺ, រូបភាព ក្រឡាផ្ទៃ, ឬ សម្លេងផ្សេងៗ ដោយអារម្មណ៍នីមួយៗ នឹងត្រូវបង្ហាញឲ្យត្រូវគ្នាទៅនឹងអារម្មណ៍របស់ម្ចាស់។ 

ផ្នែកខាងក្រៅ មានរូបរាង ស្ដាយបែប ប្រអប់ក្រដាស ជ្រុងៗ និងកាត់តាម BMW Classic សេរីមុនៗ ដែលជាម៉ូដប្រចាំត្រកូលរបស់ខ្លួន ជាពិសេសគឺស្បែក Digital ដែលអនុញ្ញាតឲ្យវាប្ដូរពណ៌ខ្លួនបាន ៣២ ពណ៌ផ្សេងៗគ្នា ដោយកំណត់បានតាមទូរសព្ទដៃ។ រីឯផ្នែកខាងក្នុង ត្រូវបានរចនាឲ្យមានលក្ខណៈសាមញ្ញតែប្រណិត មិនមានបរិក្ខារពាក់រញ៉េរញ៉ាយច្រើន រូបភាពកម្សាន្ដ​ និងការកំណត់ផ្សេងនឹងបង្ហាញលើផ្ទៃកញ្ចក់មុខតែម្ដង។ 

សម្រាប់ប្រព័ន្ធថាមពល BMW បានឲ្យដឹងដែរថា វាប្រើប្រាស់ប្រព័ន្ធអគ្គិសនី តែមិនបានបញ្ចាក់លម្អិតពីកម្រិតថាមពល ផ្សេងៗរបស់វានោះទេ។ ក្រុមហ៊ុនបានបន្ថែមទៀតថា មុខងារមួយចំនួននៃ concept BMW i Vision Dee នេះ នឹងត្រូវបំបែកទៅបំពាក់លើរថយន្ដទំនើបៗជំនាន់ក្រោយៗរបស់ខ្លួនដែលចេញ នៅរង្វង់ឆ្នាំ ២០២៥ ខាងមុខនេះ។  

ប្រភព៖ BMW 

អត្ថបទ៖ Andra