ក្រុមហ៊ុនរថយន្ដអគ្គិសនីល្បីឈ្មោះចិន BYD (Build Your Dream) បានសម្រេចជ្រើសយកប្រទេស ថៃ ជាទីតាំងសង់រោងចក្រ ផ្គុំ និងដំឡើង អន្ដរជាតិដំបូងរបស់ខ្លួន ក្រៅពីរោងចក្រនៅក្នុងប្រទេសកំណើត ដើម្បីពង្រីកទីផ្សារក្នុងទឹកដីអាស៊ីអាគ្នេយ៍។ 

តាមការចុះផ្សាយពីវេបសាយ Automotive News បានឲ្យដឹងថា BYD ទើបតែបានចុះហត្ថលេខាជាមួយនឹងក្រុមប្រឹក្សាអភិវឌ្ឍន៍ឧស្សាហកម្មថៃ WHA Corporation Public Company Limited ដោយបោះទីតាំងសាងសង់ រោងចក្រ ផ្គុំ និងដំឡើងនេះ ក្នុងខេត្ត Rayong ប្រទេសថៃ ជាមួយនឹងគម្រោង បញ្ចេញលក់ក្នុងឆ្នាំ ២០២៤ ក្នុងចំនួន ប្រមាណ ១៥០ ០០០ គ្រឿង ទៅគ្រប់បណ្ដាប្រទេសទាំងអស់ក្នុងតំបន់អាស៊ីអគ្នេយ៍ ព្រមទាំងទៅទ្វីបអ៊ឺរ៉ុបផងដែរ។ 

គួររំឭកថា BYD គឺជាម៉ាកសញ្ញាក្រុមហ៊ុនរថយន្ដល្បីរបស់ចិនទី ៣ ហើយ ដែលបានដាក់ទីតាំងរោងចក្រសម្រាប់តំបន់អាស៊ីអគ្នេយ៍ របស់ខ្លួននៅប្រទេសថៃ ដែលពីរទៀត មាន SAIC Motor Corp និង Great Wall Motor Co ដោយ WHA បានប៉ាន់ស្មានថា វាអាចជួយឲ្យដំណើរការផលិតរថយន្ដអគ្គិសនីនៅថៃ កើនឡើង ៣០% នៅឆ្នាំ ២០៣០ ឬប្រមាណ ៧០០ ០០០ គ្រឿងក្នុងមួយឆ្នាំ។ 

ការវិនិយោគនេះ គឺស្ថិតនៅក្នុងបេសកកម្មក្លាយជាប្រទេសនាំមុខលើឧស្សាហកម្មរថយន្ដអគ្គិសនីប្រចាំតំបន់អាស៊ានរបស់ថៃ ដោយរដ្ឋាភិបាលខ្លួនបានដាក់យុទ្ធសាស្រ្ដដូចជា ការផ្ដល់ប្រាក់ឧបត្ថម្ភ ឲ្យទិញរថយន្ដ EV ១៥០០០០ បាត (៤០៥២ដុល្លារ) ក្នុងមួយគ្រឿង, កាត់បន្ថយពន្ធនាំចូលពី ៨% មក ២% ជាថ្នូរដោះដូរនឹងក្រុមហ៊ុនផលិតរថយន្ដ អគ្គិសនី ឲ្យមកដាក់ទុនវិនិយោគធ្វើរោងចក្រ ក្នុងប្រទេសខ្លួនជាដើម បើតាមការឲ្យដឹងពី Nikkie Asia។

ចំណែកឯ BYD វិញ ក្រៅពីពង្រីកទីផ្សារក្នុងតំបន់អាស៊ីអាគ្នេយ៍ ហើយ ខ្លួន ក៏មានគម្រោងឆ្លងទៅប្រទេសផ្សេងៗទៀត ដូចជា ប្រេស៊ីល, អូស្រ្ដាលី, សិង្ហបុរី, ណ័រវេស និង ប្រទេសជប៉ុនឆាប់ៗនេះផងដែរ។ 

អត្ថបទ៖ Andra