ក្រោយប្រកួតប្រជែងគ្នាយ៉ាងស្វិតស្វាញ ពេលនេះ ក្រុមហ៊ុនផលិតរថយន្ដអគ្គិសនីចិន BYD បានដណ្ដើមដំណែងជាក្រុមហ៊ុនលក់រថយន្ដអគ្គិសនីឈានមុខគេពី Tesla បានសម្រេច នៅក្នុងត្រីមាសទី ៤ នៃឆ្នាំ ២០២៣។ 

តាមការឲ្យដឹងពី BBC កាលពីពេលថ្មីៗនេះ ថា សន្ទុះនៃការលក់រថយន្ដអគ្គិសនីរបស់ BYD កើនឡើងខ្លាំងនៅរង្វង់ ៣ ខែចុងក្រោយ នៃឆ្នាំ ២០២៣ នេះ ដោយទទួលបានទិន្នន័យការលក់ ៥២៦ ០០០ គ្រឿង ដែលធៀបជាមួយនឹង Tesla ដែលលក់បានចំនួន ៤៨៤ ៥០០ គ្រឿងក្នុងរយៈពេលដូចគ្នា ជាពិសេសទិន្នផលលក់របស់ BYD នៅក្នុងខែចុងក្រោយ (ធ្នុ)​ កើនឡើងដល់ទៅ ៧០% ពីទិន្នផលខែមុន។ 

សារព័ត៌មាន Fortune ក៏បានឲ្យដឹងដែរថា សន្ទុះនៃការកើនឡើងរបស់ BYD នេះក៏ដោយសារតែការផលិតរថយន្ដអគ្គិសនី មានតម្លៃសមរម្យ និងច្រើនម៉ូដែល ជាពិសេស BYD ទើបតែចេញរថយន្ដអគ្គិសនីប្រភេទ luxury Yangwang U9 របស់ខ្លួនដែលបានទាក់ទាញចំណាប់អារម្មណ៍ពីអតិថិជនជាច្រើន លើសពីនេះទៅទៀត​ BYD ក៏កំពុងតែពង្រីកសាខារោងចក្ររបស់ខ្លួនទៅប្រទេសដែលមានទីផ្សារឡានអគ្គិសនីច្រើនផ្សេងទៀតដែរ ដូចជា ហុងគ្រី, ថៃ, និងកំពុងតែសម្លឹងមើលទីផ្សារនៅមុិចសិចកូ ជាមួយនឹងការរំពឺងថានឹងបានចំណេញខ្ពស់ដោយធ្វើជាផ្លូវក្រោយសម្រាប់នាំចូលរថយន្ដទៅទីផ្សារសហរដ្ឋអាមេរិកផងដែរ។  

ទោះបីជាយ៉ាងណាក៏ដោយ សម្រាប់លទ្ធផលសរុបប្រចាំ ២០២៣ ទាំងមូលដោយ Tesla នៅរក្សាដំណែងជាក្រុមហ៊ុនលក់រថយន្ដអគ្គិសនីឈានមុខគេដដែល ជាមួយលទ្ធផលលក់បាន ១.៨ លានគ្រឿង ដែលកើនឡើង ២០% ធៀបនឹងទិន្នន័យពីឆ្នាំ ២០២២ រីឯក្រុមហ៊ុន BYD ទទួលបានលទ្ធផល ១.៦ លានគ្រឿងសម្រាប់រយៈពេលដូចគ្នា។ 

យ៉ាងណាមិញ ឃើញថា លទ្ធផលនេះនៅប្រកៀកប្រកិតគ្នានៅឡើយ ហើយក្រុមហ៊ុន Tesla ក៏កំពុងតែដុតដៃដុតជើងគិតគូររឿងតម្លៃ និងបង្កើនការផលិតរបស់ខ្លួនស្របទៅតាមតម្រូវការរបស់អតិថិជន ដើម្បីរក្សាដំណែងជាក្រុមហ៊ុនឡានអគ្គិសនីឈានមុខគេ រីឯក្រុមហ៊ុនរថយន្ដអគ្គិសនីល្បីៗផ្សេងៗទៀតក៏កំពុងតែពង្រឹងការលក់ និងទាក់ទាញទីផ្សារអតិថិជនរបស់ខ្លួនជាបន្ដបន្ទាប់ផងដែរ។ 

អត្ថបទ៖ Andra 

ប្រភព៖ BBC 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!