ក្រុមហ៊ុនឡានអគ្គិសនីល្បីឈ្មោះមួយរបស់ចិន BYD Auto Industry បានបង្ហាញគម្រោង បណ្ដាក់ទុនវិនិយោគសាងសង់ស្ថានីយ៍សាកឡានអគ្គិសនី ក្នុងប្រទេស កម្ពុជា ចំនួន ២០០ កន្លែង ដល់បំណាច់ឆ្នាំ ២០២៣​នេះ។ 

យោងតាមកិច្ចប្រជុំរវាង ថ្នាក់ដឹកនាំក្រសួងសាធារណការ​ និងដឹកជញ្ជូន ឯកឧត្តមទេសរដ្ឋមន្រ្ដី ស៊ុន ចាន់ថុល និង តំណាងក្រុមហ៊ុន BYD កាលពីថ្ងៃទី ២៤ ខែ វិច្ឆិកា កាលពីពេលថ្មីៗនេះ បានឲ្យដឹងថា ក្រុមហ៊ុនបានបង្ហាញនូវផែនការដំឡើងស្ថានីយបញ្ចូលថាមពលយានយន្តអគ្គិសនីចំនួន ២០០ ទីតាំង ផ្សេងៗគ្នា​ នៅទូទាំងប្រទេសកម្ពុជា ត្រឹមឆ្នាំ ២០២៣ និងស្នើសុំឱ្យក្រសួងជួយសម្របសម្រួលស្វែងរកទីតាំងដើម្បីដំឡើងស្ថានីយ ទាំងនោះ។ 

ឆ្លើយតបនឹងសំណូមពរនេះ ឯកឧត្តមទេសរដ្ឋមន្ត្រី បានមានប្រសាសន៍ឯកភាពជួយសម្របសម្រួលជាមួយស្ថាប័នពាក់ព័ន្ធ ស្វែងរកទីតាំងសម្រាប់ដំឡើងស្ថានីយទាំង ២០០ កន្លែង ស្ថិតនៅតាមមន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត។  ក្នុងនោះក៏មានការសហការជាមួយ ក្រសួងពាក់ពន្ធ័ ដើម្បីរៀបចំយុទ្ធសាស្រ្ដផ្សេងៗដូចជា បញ្ចុះតម្លៃពន្ធនាំចូលយានយន្តអគ្គិសនី និងការរៀបចំហេដ្ឋារចនាសម្ពន្ធ័សម្រួលការប្រើប្រាស់យានយន្ដអគ្គិសនី ដើម្បីផ្សព្វផ្សាយដល់ប្រជាពលរដ្ឋឲ្យប្រើប្រាស់យានយន្ដអគ្គិសនីឲ្យបានច្រើនផងដែរ។ 

លើសពីនេះទៅទៀត ក្រសួងក៏បានស្នើសុំ ចុះ MoU ជាមួយ ក្រុមហ៊ុន BYD អនុញ្ញាតឲ្យមានការបណ្ដុះបណ្ដាលមន្ដ្រី និងនិស្សិតកម្ពុជា ឲ្យទៅសិក្សា វគ្គខ្លីៗនៅក្រុមហ៊ុន BYD ឬ នៅកម្ពុជាផ្ទាល់ ដូចជា អ្វីដែលបានធ្វើជាមួយក្រុមហ៊ុន Ford ដូច្នោះដែរ។ 

អត្ថបទ៖ Andra