នៅក្នុងពិធីចុះហត្ថលេខា លើ អនុស្សរណៈ យោគយល់ រវាងក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ (CPEC) និង សមាគមដឹកជញ្ជូនអ្នកដំណើរផ្លូវគោកកម្ពុជា (CAMBA) កាលពីថ្ងៃទី ០២ មិនា កន្លងទៅនេះ ក្រោមការចូលរួមពី ក្រសួងសាធារណការ និងដឹកជញ្ជូន ភាគីទាំងពីរបានពិភាក្សាលើចំណុចយោគយល់ជាច្រើន ដែលក្នុងនោះ មានការស្នើសុំតម្លៃពិសេសសម្រាប់ រថយន្ដអគ្គិសនី បើកបរលើផ្លូវល្បឿនលឿន។ 

យោងតាមខ្លឹមសារនៃកម្មវិធីបានឲ្យដឹងថា លទ្ធផលដែលសម្រេចបានក្នុងអនុស្សរណៈយោគយល់នេះ មានដូចជា ៖ 

១. ការបញ្ចុះថ្លៃសេវា ប្រើប្រាស់ផ្លូវល្បឿនលឿន ទៅតាមប្រភេទរថយន្ដ និងចំនួននៃការធ្វើដំណើរប្រចាំថ្ងៃ 

២. ការបញ្ចុះថ្លៃសេវាអូសសណ្តោងចំពោះរថយន្តដែលមានបញ្ហាតាមផ្លូវ

៣. ជំរុញការប្រើប្រាស់ឧបករណ៍ ETC-OBU ចំពោះយានយន្តសមាជិកសមាគម និង

៤. ការពិភាក្សាលើការស្នើសុំតម្លៃពិសេស សម្រាប់យានយន្តអគ្គិសនី ដែលនឹងត្រូវចរចានៅពេលក្រោយ។ 

យោងតាមប្រសាសន៍ចូលរួម ក្នុងឱកាសនេះ ឯកឧត្តមទេសរដ្ឋមន្រ្ដី ស៊ុន ចាន់ថុល បាន លើកជាការស្នើសុំ ដល់សមាគមដឹកជញ្ជូនអ្នកដំណើរផ្លូវគោកកម្ពុជា (CAMBA) ពិចារណាការ លើការទិញរថយន្ដ ដឹកអ្នកដំណើរ ប្រើដោយថាមពលអគ្គិសនី (Electric Bus) ដើម្បីកាត់បន្ថយការបំពុលបរិស្ថាន និងបញ្ចុះតម្លៃបន្ថែមផងដែរ។​

សូមជម្រាបជូនថា ការចុះអនស្សរណៈនេះ ធ្វើឡើងក្នុងគោលបំណង លើកកម្ពស់ការដឹកជញ្ជូន និងធ្វើដំណើរលើផ្លូវល្បឿនលឿន, លើកកម្ពស់សេដ្ឋកិច្ចជាតិតាមរយៈចំណូលពន្ធ, ជម្រុញការប្រើប្រាស់រថយន្ដអគ្គិសនី ដើម្បីការពារបរិស្ថាន និងសម្រេចយុទ្ធសាស្រ្ដអព្យាក្រឹតកាបូន ឆ្នាំ ២០៥០ (Long-Term Strategy for Carbon Neutrality 2050) ព្រមទាំង តម្រង់ទិសកិច្ចសហប្រតិបត្តិការរវាង ស្ថាប័នឯកជន និងស្ថាប័នសាធារណៈ។ 

ប្រភព៖ ក្រសួងសាធារណការ និងដឹកជញ្ជូន 

អត្ថបទ៖ Andra