ថ្មីៗនេះ អគ្គនាយកដ្ឋានគយ និងរដ្ឋាករ បានប្រកាសជូនដំណឹង អនុក្រឹតស្ដីពីការកែសម្រួលពន្ធគយ និងអត្រាអាករពិសេស នាំចេញលើមុខទំនិញមួយចំនួន ដែលក្នុងនោះមានការបញ្ចុះអត្រាអាករពិសេសលើការនាំចូលយានយន្ដជាច្រើនប្រភេទផងដែរ។

យោងតាមខ្លឹមសារនៅក្នុងអនុក្រឹត ជំពូកទី ២​ មាត្រាទី ៣​ មានការបញ្ចុះអត្រាអាករពិសេសលើការនាំចូលរថយន្ដ ដូចជា​ រថយន្ដវែងលីម៉ូហ្សីន ពី ៥៥%​ មក ៥០%, រថយន្ដគ្រួសារប្រភេទ Hybrid (មិនមែនប្រភេទ plug in) ពី ៥០% មក ៤៥%, រថយន្ដគ្រួសារប្រភេទ Hybrid plug in ពី ៥០% មក ៤០%, រថយន្ដដឹកអ្នកដំណើរ និងរថយន្ដដឹកទំនិញពី ៤០% មក ៣០%, រថយន្ដដឹកទំនិញប្រើអគ្គិសនី ពី ៤០% មក ១០%, រថយន្ដប្រណាំងតូចៗ ទោចក្រយានយន្ដកង់បួន និងរថយន្ដបំពាក់ឧបករណ៍ពិសេស ពី ៣០% មក ២៥%, ក្នុងនោះ គ្រឿងបន្ទាប់បន្សំផ្សេងទៀតដូចជា​ បំណែកម៉ាស៊ីន គ្រឿងបន្លាស់យានយន្ដ និងក្បាលរថយន្ដសណ្ដោងរឺម៉កជាដើម ត្រូវបានបញ្ចុះពី ២៥% មក ១០% ផងដែរ។ 

សូមជម្រាបថា ក្រៅតែពីការបញ្ចុះអត្រាអាករពិសេសការនាំចូលយានយន្ដទាំងនេះ ក៏មានការកែសម្រួលផ្សេងៗទៀតដូចជា ដែលមានមុខទំនិញមួយចំនួនត្រូវបានបញ្ចុះ និងដំឡើង ពន្ធ និងអត្រាអការពិសេសផ្សេងៗ អាហារ ភេសជ្ជៈ គ្រឿងសម្ភារៈប្រើប្រាស់ប្រចាំថ្ងៃ សម្លៀកបំពាក់ គ្រឿងបន្លាស់យានយន្ដ ឱសថ រុក្ខជាតិ គ្រឿងលោហៈជាតុផ្សេងៗ ដែលលោកអ្នកអាចឆែកមើលបាននៅក្នុង អនុក្រឹតនេះ ដែលក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងផ្សេងៗដែលពាក់ពន្ធ័ នឹងអនុវត្តអនុក្រឹតនេះ ចាប់ពីថ្ងៃទី ១ ខែ កក្កដា ឆ្នាំ ២០២៣ នេះតទៅ។ 

ប្រភព៖ អគ្គនាយកដ្ឋានគយ និងរដ្ឋាករកម្ពុជា 

អត្ថបទ៖ Andra

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!