កាលពីពេលថ្មីៗនេះ តាមការចុះផ្សាយពីសារព័ត៌មាន Bloomberg បានឲ្យដឹងថា ក្រុមហ៊ុនផលិតឡានអន្ដរជាតិល្បីឈ្មោះ GM ទើបតែបានប្រកាសបញ្ចេញឡានអគ្គិសនីសេរីថ្មី ប្រភេទ Convertable ឬ បើកដំបូល កៅអី ២ រូបរាងគួរឲ្យស្រឡាញ់ ក្នុងទីផ្សារចិន ជាមួយតម្លៃចន្លោះ ១៤ ៥០០ ដុល្លារ ទៅ ២៩ ០០០ ដុល្លារ។ 

General Motor បានឲ្យដឹងថា កូនឡានអគ្គិសនី Convertible នេះ មានឈ្មោះថា Cabrio ដែលជាការសហការគ្នាផលិតរវាង GM និងក្រុមហ៊ុនឡានចិន SAIC ក្រោមឈ្មោះក្រុមហ៊ុនរួម Wuling Automobile Co., បន្ទាប់ពីទទួលបានគាំទ្រច្រើនលើរថយន្ដអគ្គិសនីប្រភេទ Compact ៤ កៅអី ម៉ូដែល Wuling Hongguang Mini ដែលខ្លួនទើបតែចេញលក់ ជាមួយតម្លៃធូរថ្លៃខ្ទង់ ៤៥០០ ដុល្លារ អង្រួនទីផ្សារឡានអគ្គិសនី ឲ្យមានអ្នកទិញប្រើភ្លូកទឹកភ្លូកដី ជាពិសេសនៅចិនផ្ទាល់ ដែលទិន្នន័យលក់លើសឡានតេស្លា Model 3 និង Model Y ដល់ទៅ ៣៣%។ 

គួររំឭកថា កូនឡានអគ្គិសនី Cabrio នេះធ្លាប់ត្រូវបានក្រុមហ៊ុន​ GM បង្ហាញឲ្យឃើញម្ដងរួចមកហើយ ក្នុងកម្មវិធី Shanghai Auto Show កាលពីឆ្នាំមុន (២០២១) ដោយបានឲ្យដឹងថា វាមានសមត្ថភាពអាចបើកបរបានចម្ងាយ ៣០០ គីឡូម៉ែត្រ រាល់ពេលសាកពេញម្ដង ដែលសមរម្យបំផុត សម្រាប់ការប្រើប្រាស់នៅក្នុងក្រុង។ 

បើតាមសម្ដីលោក Phate Zhang ស្ថាបនិកគេហទំព័ររថយន្ដអគ្កិសនីប្រចាំក្រុងសៀងហៃ បានឲ្យដឹងថា “សម្រាប់រថយន្ដ អគ្គិសនីខ្នាតតូចបែបនេះ បច្ចុប្បន្នកំពុងតែមានការពេញនិយមខ្លាំងសម្រាប់អ្នកប្រើប្រាស់គឺគ្រប់បរិបទ ជាពិសេស សិស្សនិស្សិត ដែលទើបបញ្ចប់ការសិក្សា ហើយត្រូវការទិញរថយន្ដទុកជិះទៅធ្វើការ​ ដែលធ្វើឲ្យរថយន្ដតូចនេះ ត្រូវប៉ាន់តែម្ដងព្រោះវាមានតម្លៃសមរម្យ ឲ្យពួកគេទិញជិះបាន ចំណែកឯរូបរាងវិញក៏មិនអន់ណាស់ណាដែរ” ។ 

ក្រុមហ៊ុនបានបន្ថែមទៀតថា សម្រាប់កូនឡានអគ្គិសនីនេះ នឹងត្រូវបើកលក់ជាផ្លូវការ​ក្នុងរង្វង់ខែ កញ្ញា នេះ នឹងផលិតត្រឹមក្នុងចំនួនកំណត់មួយតែប៉ុណ្ណោះ ដោយចេញតែ ១០០ ទៅ ២០០ គ្រឿងប៉ុណ្ណោះ រៀងរាល់មួយខែម្ដង ជាមួយតម្លៃសន្មត់ចន្លោះពី ១៤ ៥០០ ដុល្លារ ទៅ ២៩ ០០០ ដុល្លារ។ 

អត្ថបទ៖ Andra