ថ្មីៗនេះ ក្រុមហ៊ុន Chevrolet ដែលជាក្រុមហ៊ុនបុត្រសម្ព័ន្ធនឹង General Motor ឬ GM បានប្រកាសថា នឹងបញ្ឈប់ដំណើរការផលិតរថយន្ដ Muscle Car ប្រចាំត្រកូលរបស់ខ្លួននោះគឹ Chevrolet Camaro នៅដើមឆ្នាំ ២០២៤ នេះ ។ 

យោងតាមការឲ្យដឹងពី CNN Business ថា ដោយសារតែ ប៉ុន្មានឆ្នាំក្រោយនេះ ធ្លាក់ទិន្នន័យការលក់របស់វាធ្លាក់ចុះ ដោយរង្វង់ឆ្នាំ ២០២០, ២០២១, ២០២២ នេះ Camaro សម្រេចការលក់បានខ្ទង់ ២៥០០០ គ្រឿងប៉ុណ្ណោះ ទាបជាងឆ្នាំ ២០១៩ ដល់ទៅ ២ ដង នេះ បណ្ដាលមកពីតម្រូវការឡានអគ្គិសនីកើនឡើង ហើយ​ ក្រុមហ៊ុនមេ​ General Motor ទៀតសោត ក៏កំពុងអនុវត្តផែនការ ប្រែក្លាយផលិតកម្មរថយន្ដ ទៅជាប្រើប្រាស់អគ្គិសនីទាំងអស់នៅឆ្នាំ ២០៣៥ ខាងមុខនេះ។ 

យោងតាមប្រសាសន៍របស់លោក Scott Bell អនុប្រធានប្រតិបត្តិរបស់ក្រុមហ៊ុន Chevrolet បានឲ្យដឹងថា៖

ថ្វីត្បិតតែត្រូវប្រកាសថាឈប់ផលិតក៏ពិតមែន តែនេះមិនមែនជាចុងបញ្ចប់នៃសាច់រឿងរបស់ Camaro នោះទេ ដោយក្រុមហ៊ុនកំពុងស្ថិតក្នុងដំណាក់កាលគិតគូរ ផលិតខ្សែស្រឡាយរបស់វា នៅពេលក្រោយ។ 

ស្របពេល General Motor កំពុងផ្ដោតការផលិតរថយន្ដអគ្គិសនីសុទ្ធនោះ​ នេះអាចជាសញ្ញាបង្ហាញថា រថយន្ដ Muscle Car ក្រោយ ដែលជាខ្សែស្រឡាយបន្ដពី Camaro អាចនឹងដំណើរការជាមួយនឹងប្រព័ន្ធអគ្គិសនី 

សូមជម្រាបជូនថា រថយន្ដ Chevrolet Camaro នេះ ជាប្រភេទរថយន្ដបែប Muscle Car ប្រចាំត្រកូល របស់ Chevrolet ចេញដំបូង ក្នុងឆ្នាំ ១៩៦៦ ក្រោមឈ្មោះ Chevrolet Panther និងមានប្រជាប្រិយភាពច្រើនពីសំណាក់អ្នកស្រឡាញ់ចូលចិត្តរថយន្ដ សាច់ដុំ និងកម្លាំងខ្លាំង ប្រភេទនេះ ជាពិសេសវាត្រូវបានគេយកធ្វើជាឡានប្រណាំង ក្នុងកម្មវិធីប្រណាំងរថយន្ដល្បីៗដូចជា NASCAR ជាដើម ដូច្នេះហើយបន្ទាប់ពី Camaro ឈប់ផលិតទៅ រថយន្ដបែប Muscle Car ដែលឈរជើង គឺមានតែបងប្អូនជីដូនមួយរបស់ខ្លួននោះគឺ Mustang និងគូប្រកួត របស់ខ្លួនដូចជា Dodge ជាដើម។

ប្រភព៖ CNN Business 

អត្ថបទ៖ Andra