យោងតាមការចុះផ្សាយពី Reuters កាលពីថ្ងៃទី ២៣​ ថ្មីៗនេះ បានឲ្យដឹងថា ក្រុមហ៊ុន ផលិតរថយន្ដកូរ៉េខាងត្បូង Hyundai និង Kia បានប្រកាសប្រមូលរថយន្ដយកជាង ៥៧ មុឺន គ្រឿង មកត្រួតពិនិត្យ និងជួសជុល ដោយសង្ស័យមានបញ្ហាអាចឆាបឆេះដោយចៃដន្យ។ 

រថយន្ដ ៥៧១០០០ គ្រឿងនេះ រួមមានម៉ូដែលដូចជា Hyundai Santa Cruz សេរី ២០២២ - ២០២៣​, Hyundai Santa Fe សេរី ២០១៩ - ២០២៣, Santa Fe Hybrid ២០២១-២០២៣, Santa Fe Plug in Hybrid ២០២២ - ២០២៣ និង Kia Carnival ២០២២ - ២០២៣ ដោយគេរកឃើញថា ខ្សែចម្លងចរន្ដអគ្គិសនីមួយចំនួន នៅ ក្នុងរថយន្ដអាចឆាបឆេះ ដោយចៃដន្យ ដោយសារតែ រងសម្ពាធពីការផ្ទុះដាច់សៀគ្វីណាមួយ។  

គួររំឭកថា កាលពីឆ្នាំ ២០២២ កន្លងទៅ Hyundai ក៏ធ្លាប់ធ្វើការ ប្រកាសប្រមូលរថយន្ដមកត្រួតពិនិត្យ ដោយសារមូលហេតុស្រដៀងគ្នានេះ ម្ដងរួចមកហើយ ដែលកាលនេះជារថយន្ដ Hyundai Palisade ចំនួន ២៤៥ ០៣០ គ្រឿង នេះបើតាមការឲ្យដឹងពី ភ្នាក់ងារ​រដ្ឋបាលសុវត្ថិភាពចរាចរណ៍ផ្លូវគោក (អាមេរិក) (the National Highway Traffic Safety Administration: NHTSA)។ 

គួរបញ្ជាក់ផងដែរថា ការកោះហៅនេះ គឹសម្រាប់រថយន្ដ Hyundai និង Kia ដែលបានចេញលក់ ក្នុង/ពី ទីផ្សារសហរដ្ឋអាមេរិក ហើយ ក្រុមហ៊ុននឹង ត្រួតពិនិត្យ ដំឡើង fuse និង ប្ដូរខ្សែដែលមានបញ្ហាថ្មី ឬជួសជុលតែម្ដងក្នុងករណីមានបញ្ហាច្រើន ជូនអតិថិជន ដោយមិនគិតថ្លៃសេវា ដោយក្រុមហ៊ុននឹងជូនដំណឹងដល់ ម្ចាស់រថយន្ដ ដែលមានបញ្ហា តាមរយៈ email និងណែនាំថា ឲ្យចតរថយន្ដក្រៅផ្ទះ (កន្លែងបិទជិត ឬ អាចងាយនឹងឆេះរាលដាល) រហូតដល់ពេលរថយន្ដត្រូវបានក្រុមការងារ ក្រុមហ៊ុនយកមកពិនិត្យ និងជួសជុលរួចរាល់។ 

ប្រភព៖ Reuters 

អត្ថបទ៖ Andra