កាលពីពេលថ្មីៗនេះ បើតាមការចុះផ្សាយពី Ruetre បានឲ្យដឹងថា ក្រុមហ៊ុនផលិតរថយន្ដល្បីឈ្មោះរបស់កូរ៉េខាងត្បូង​ Hyundai និងក្រុមហ៊ុនដៃគូរបស់ខ្លួន​ Kia បានប្រកាសប្រមូលរថយន្ដទាំងពីរម៉ាកសរុបជាង ៣ លានគ្រឿង ចូលរោងចក្រត្រួតពិនិត្យវិញ ដោយសាររកឃើញថា ម៉ាស៊ីនរថយន្ដ អាចមានបញ្ហាឆាបឆេះ ចៃដន្យហើយ អតិថិជនទាមទារប្ដូរម៉ាស៊ីន នាំឲ្យក្រុមហ៊ុនព្យាករណ៍ថាអាចចំណាយទឹកប្រាក់ដល់ទៅជាង ២ ពាន់លានដុល្លារ។ 

តាមការឲ្យដឹងពី Bloomberg ក៏បានបង្ហាញដែរថា ក្នុងទឹកប្រាក់ ២ ពាន់លានដុល្លារនេះ Hyundai Motor Co ត្រូវខាតអស់ជាង ៩០៩ លាន ស្មើនឹង ៤៤% នៃចំណូល ខណៈ Kia Motor Corp ត្រូវខាត ១.០៧ ពាន់លានដុល្លារ ស្មើនឹង ៦៦% នៃចំណូលសរុបរបស់ខ្លួន ក្នុងឆមាសទី ៣ ឆ្នាំនេះ។ 

ក្នុងនោះរថយន្ដ Hyundai ចំនួន ២.៤ លានគ្រឿង និង Kia ១.៨ លានគ្រឿង ត្រូវបានគេរកឃើញថា មានបញ្ហា ដោយម្ចាស់ឡានស្នើសុំឲ្យក្រុមហ៊ុនផ្លាស់ប្ដូរម៉ាស៊ីន Theta GDI របស់រថយន្ដនេះចេញ ដោយហេតុខ្លាចមានបញ្ហា ដូចកាលពីកើតឡើងនៅឆ្នាំ ២០២០ កន្លងទៅ និងកាលពីឆ្នាំ ២០១៥ និង ២០១៧ ផងដែរ ដែលភាគច្រើនមានក្នុងរថយន្ដម៉ូដែល Sonata, Santa Fe និង Optima ក្នុងទីផ្សារសហរដ្ឋអាមេរិក។ 

លោក Cha Seong-ju ប្រធានគ្រប់គ្រងផ្នែក គុណភាពនៃក្រុមហ៊ុន Hyundai Motor Co បានមានចេញសារ អភ័យទោសដល់អតិថិជនថា ៖

“ពួកយើងពិតជា សូមអភ័យទោសដោយស្មោះ ពីការស្នើសុំកោះហៅមកត្រួតពិនិត្យ ទាក់ទងនឹងម៉ាស៊ីន Theta (II) GDI នេះម្ដងហើយ ម្ដងទៀតនេះ។ ពួកយើងនឹងប្រឹងប្រែងធ្វើយ៉ាងណាប្រែសម្រួលគុណភាព ម៉ាស៊ីននេះឲ្យមានគុណភាពល្អប្រសើរជាងមុន ដើម្បីកុំឲ្យមានការហៅច្រើនលើកច្រើនសារនេះកើតឡើងម្ដងទៀត” ។

គួបបញ្ចាក់ផងដែរថា មុនគ្នាប៉ុន្មានថ្ងៃនេះ តាមការចុះផ្សាយពី Carscoops ក៏បានឲ្យដឹងថា ក្រុមហ៊ុនទាំងពីរក៏បានប្រកាស ប្រមូលរថយន្ដសរុប ១២២ ០០០ គ្រឿង ក្នុងទីផ្សារអាមេរិក និងកាណាដា ស្មើនឹង ៨ ម៉ូដែល ផលិតឆ្នាំ ២០២០ និង ២០២២ និងផ្អាកការលក់រថយន្ដថ្មីម៉ូដែលទាំងនេះ ផងដែរ ដោយសារត្រូវការដោះស្រាយបញ្ហា ប្រព័ន្ធប្រអប់លេខដំណើរការមិនប្រក្រតី ដែលអាចធ្វើឲ្យឡានដើរខុសការបញ្ជា បង្កឲ្យអ្នកបើកមានគ្រោះថ្នាក់ជាយថាហេតុផងដែរ។ 

អត្ថបទ​៖ Andra