ក្រុមហ៊ុនរថយន្ដក៉ូរេខាងត្បូង Hyundai ថ្មីៗនេះ បានសម្រេចបង្ហាញបច្ចេកវិទ្យាទំនើប អនុញ្ញាតឲ្យកង់រថយន្ដទាំងបួន បត់បាន ៩០ ដឺក្រេ ផ្លាស់ទីពីចំហៀងបាន ឈ្មោះថា e-Corner System ស្រដៀងទៅនឹងបច្ចេកវិទ្យា Crab Walk របស់រថយន្ដអគ្គិសនី Hummer EV របស់ GMC គ្រោងចេញឆ្នាំ ២០២៥។ 

តាមរយៈ Engadget បានឲ្យដឹងថា បច្ចេកវិទ្យានេះ ត្រូវបាន Hyundai នាំយកមកបង្ហាញនៅក្នុងកម្មវិធីតាំងបង្ហាញ បច្ចេកវិទ្យា CES កាលពីឆ្នាំ ២០១៨ និង ២០២១ កន្លងទៅ ដែលទើបនឹងបញ្ចេញរូបរាងច្បាស់លាស់កាលពីពេលថ្មីៗនេះ ដោយបំពាក់ទៅលើរថយន្ដអគ្គិសនីទំនើបពេញនិយមរបស់ខ្លួន Hyundai Ioniq 5 ។ 

បច្ចេកវិទ្យា e-Corner System នេះ ត្រូវបានបង្កើតនឹងអភិវឌ្ឍដោយក្រុមបច្ចេកវិទ្យា Hyundai Mobis ដែលវាអាចផ្លាស់ទីបាន​​ ៤ បែប ដូចជា Crab Driving កង់ទាំងបួនបត់ ៩០ ដឺក្រេពេញហើយផ្លាស់ទីទៅចំហៀង ងាយស្រួលពិសេសសម្រាប់ការចតឡានស្របនឹងចញ្ចើមផ្លូវ និងកន្លែងចង្អៀត,

Zero Turn កង់ទាំងបួនធ្វើចលនាបត់ខ្លួនមួយជុំ ៣៦០ ដឺក្រេ រក្សាដងខ្លួននៅមួយកន្លែង,

Diagonal Driving រថយន្ដអាចផ្លាស់ទីជាបន្ទាត់ទ្រេតពីចំណុចមួយ ទៅចំណុចមួយទៀតបាន ងាយស្រួលសម្រាប់ពេលវាជែង​ ឬប្ដូរគន្លង, និងបែប

Pivot Turn ដែលអាចឲ្យវាបត់បានមួយជុំខ្លួន ៣៦០ ដឺក្រេ ដែល lock ផ្នែកខាងមុខ ឲ្យនៅនឹងមួយកន្លែង ងាយស្រួលសម្រាប់ការចតឡានទទឹង។ 

បើតាមការឲ្យដឹងពី Autoblog ថា Hyundai Mobis គ្រោងនឹងដាក់បច្ចេកវិទ្យា e-Corner System នេះចូលទៅក្នុង រថយន្ដអគ្គិសនីជំនាន់ក្រោយៗរបស់ Hyundai ដែលឆាប់បំផុតគឺក្នុងរង្វង់ឆ្នាំ ២០២៥ ខាងមុខនេះ។  

ប្រភព៖ Hyundai Mobis 

អត្ថបទ៖ Andra