រថយន្ដអគ្គិសនី​សុទ្ធ Kia EV9 សេរីឆ្នាំ ២០២៤​ របស់ក្រុមហ៊ុនផលិតរថយន្ដកូរ៉េខាងត្បូង Kia និងជាបុត្រសម្ព័ន្ធ នឹង Hyundai ទើបតែចេញមុខថ្មីៗនេះ កម្លាំង​ជិត ៥៨០​ សេះ សាកពេញម្ដងរត់បាន​លើស ៥០០ គម និងតម្លៃខ្ទង់ ៦ មុឺន ដុល្លារ គ្រោងចេញជាផ្លូវការនៅរង្វង់ខែ មេសា ឆ្នាំ ២០២៣ នេះ។ 

បើតាម Car and Driver បានឲ្យដឹងថា Kia EV9 2024 នេះ ជាប្រភេទរថយន្ដអគ្គិសនីសុទ្ធ SUV 4×4 ដែល មានទំហំធំជាង EV6 បន្ដិច បណ្ដោយខ្លួនវែងជាងប្រហែល ២០ សម ជាមួយស្ដង់ដារកៅអី ៦ និង ៧ ប្រើប្រាស់ platform E-GMP ដូចគ្នានឹង Hyundai និង Genesis និងផ្ដល់ជូនពីរប្រភេទ ទាំងប៉ុងមួយ RWD (Rear Wheel Drive) និង ប៉ុងពីរ AWD (All Wheel Drive) និងមាន ៤ Trim បែបស្ដង់ដារ (Standard), Standard Plus, GT-Line (S), និង GT ។ 

សម្រាប់ប្រព័ន្ធថាមពល EV9 បំពាក់ថ្មថាមពល ១០០ kWh អាចឲ្យវារត់បានចម្ងាយប្រមាណ ៥៤២ គម រាល់ពេលសាកពេញម្ដង និងអាចសាកបាន ១០០ គម ប្រើពេលត្រឹម ៦ នាទីប៉ុណ្ណោះ ក្នុងនោះ វាអាចផលិតកម្លាំងបានពី ៤០០ ទៅ ៥៧៦ សេះ ហើយអាចជាន់បានល្បឿន ពី ០ ទៅ ១០០ គម/ម៉ ប្រើពេល ៥ វិនាទី ។ ។ 

ផ្នែកខាងក្នុងទូលាយងាយស្រួលសម្រាប់ដាក់ជើង មានបំពាក់អេក្រង់ឌីជីថល​ ភ្លោះ ទំហំ ១២.៣ អិង ដែលមួយដើរតួជាកុងទ័រ មួយទៀតជាអេក្រង់កម្សាន្ដ ហើយ ប៉ូតុងសម្រាប់ចុចបញ្ជាមុខងារផ្សេងៗនៅក្នុងរថយន្ដត្រូវបាន កាត់បន្ថយ និងប្ដូរមកជាប៉ូតុងបែប touch sensitive វិញ រីឯប្រព័ន្ធបច្ចេកវិទ្យាផ្សេងៗ Kia មិនទាន់បានឲ្យដឹងនៅឡើយទេ គ្រាន់តែបានបង្ហើបថា អាចនឹងភ្ជាប់ជាមួយប្រព័ន្ធស្វ័យប្រវត្តិកម្រិត ៣ និងមុខងារជំនួយការអ្នកបើកបរជាច្រើនទៀត។ ​ 

Kia ក៏បានបញ្ជាក់ផងដែរថា ក្រុមហ៊ុនមានគម្រោងនឹងនាំមកជូនរថយន្ដអគ្គិសនី ១៣ ម៉ូដែល ឲ្យបានមុនឆ្នាំ ២០២៧​​ ដោយមានន័យថា មួយឆ្នាំ អាចចេញចន្លោះពី ៣ ទៅ ៤ ម៉ូដែល រៀងរាល់ឆ្នាំ ហើយ Kia EV9 នេះ នឹងចេញនៅខែក្រោយ ឆ្នាំនេះ ជាមួយតម្លៃប៉ាន់ស្មានពី Car and Driver ថា ចាប់ផ្ដើមពី ៥៦០០០ ដុល្លារឡើងទៅ សម្រាប់ trim ធម្មតា។  

ប្រភព៖ Car and Driver

អត្ថបទ៖ Andra