បន្ទាប់ពីបើកឱ្យប្រើប្រាស់បណ្ដោះអាសន្ន  ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌ និងផ្អាកវិញដើម្បីបញ្ចប់ការសាងសង់, នៅថ្ងៃទី ២០ តុលា ម្សិលមិញនេះ ស្ពានកោះនរា ត្រូវបានដាក់អោយធ្វើដំណើរជាបណ្តោះអាសន្នជាថ្មីម្ដងទៀត ដែលមានរយៈពេលជិត ១​ ខែ មុនថ្ងៃសម្ភោធជាផ្លូវការ។ 

សូមជម្រាបជូនថា ស្ពានកោះនរា នេះជាប្រភេទស្ពានខ្សែកាប តភ្ជាប់រវាងតំបន់អភិវឌ្ឍកោះនរា និងតំបន់អភិវឌ្ឍកោះពេជ្រ ទទួលបន្ទុកការសាងសង់ដោយក្រុមហ៊ុន OCIC ដែលបើកការដ្ឋានសាងសង់កាលពីថ្ងៃទី ២៦ តុលា ឆ្នាំ ២០២០ ដែលក្រុមហ៊ុនទើបតែបង្ហើយការងារសាងសង់មួយចំនួនដូចជា ការអ៊ុតកៅស៊ូ អ៊ុតគំនូសចរាចរណ៍, តម្លើងស្លាកសញ្ញាចរាចរណ៍, បង្គោលភ្លើងបំភ្លឺផ្លូវ និងភ្លើងលម្អខ្សែកាប ជាដើម​ ហើយទើបអនុញ្ញាតបើកឲ្យធ្វើដំណើរសាកល្បងមុនថ្ងៃសម្ភោធជាផ្លូវការនេះ។ 

ស្ពាននេះមានប្រវែង ៨៤៤ ម៉ែត្រ ទទឹង ២៤.៥ ម៉ែត្រ មាន ២​ គន្លងរថយន្តទៅមក ១​គន្លងទោចក្រយានយន្តទៅមក និង ១​គន្លងថ្មើរជើងទៅមក ព្រមទាំងមានផ្លូវកាត់ក្រោមគល់ស្ពានស្របច្រាំងទន្លេកោះពេជ្រ និងច្រាំងទន្លេកោះនរាផងដែរ ។

គួរបញ្ជាក់ផងដែរថា ស្ពានកោះនរា នេះគឺត្រូវបានសាងសង់ឡើងក្នុងគោលបំណងកាត់បន្ថយការកកស្ទះចរាចរណ៍ក្នុងតំបន់នៅចំណុចស្ពានព្រះមុនីវង្ស ជាពិសេសក្នុងអំឡុងពេលបុណ្យទាន ធំៗ និងលំហូរចរាចរណ៍ទូទៅប្រចាំថ្ងៃ ដែលក្នុងកំឡុងពេលតែប៉ុន្មានថ្ងៃនៃការបើកដំណើរការសាកល្បង (កាលពីថ្ងៃភ្ជុំបិណ្ឌ) ស្ពានកោះនរាថ្មីនេះ បានជួយសម្រួលចរាចរណ៍បានច្រើនគួរឲ្យកត់សម្គាល់ ជាពិសេសចំណុចការដ្ឋានសាងសង់ស្ពានអាកាសព្រះមុនីវង្ស នេះសរបញ្ជាក់ពីសមិទ្ធផលថ្មីមួយទៀតដែលកម្ពុជាសម្រេចបាន និងបន្ដមានសមិទ្ធផលផ្សេងៗទៀតទៅថ្ងៃមុខដែលពង្រីកសក្ដានុពលនៃការរីកចម្រើនរបស់កម្ពុជាបន្ដបន្ទាប់ផងដែរ។

ប្រភព៖ មន្ទីរសាធារណការ និងដឹកជញ្ជូនរាជធានីភ្នំពេញ

អត្ថបទ៖ Andra

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!