ថ្មីៗនេះ លោក Takashi Watanabe អគ្គនាយកក្រុមហ៊ុន Lexus បានមានប្រសាសន៍ថា បើសិនជាមានតម្រូវការឡាន pickup អគ្គិសនីពីអតិថិជនច្រើន ក្រុមហ៊ុននឹងស៊ីរ៉េដាក់ការផលិតឡាន pickup អគ្គិសនីទៅក្នុងផែនការឡានអគ្គិសនីឆ្នាំ ២០២៦ របស់ខ្លួន ក្នុងពេលឆាប់ៗខាងមុខនេះ។ 

យោងតាមការឲ្យដឹងពី Motor 1 ថា នៅក្នុងកិច្ចសម្ភាសខ្លីស្ដីពីគម្រោងរថយន្ដ Lexus សេរីថ្មីកាលពីពេលថ្មីៗនេះ លោក Watanabe  អគ្គនាយកក្រុមហ៊ុន Lexus បានមានប្រសាសន៍ឲ្យដឹងជុំវិញការផលិត Lexus pickup នេះថា សម្រាប់រថយន្ដ pickup ជាធម្មតា គឺជាបន្ទុករបស់ Toyota ដោយ Lexus ពុំមានគម្រោងនឹងផលិតរថយន្ដ pickup ដូចគ្នាច្រើនដងនោះទេ ជាពិសេសគឺរថយន្ដ pickup ដែលប្រើម៉ាស៊ីនសាំង ម៉ាស៊ូត ក៏ប៉ុន្ដែ ដោយសារតែគោលដៅរបស់ក្រុមហ៊ុន គឺបំពេញតម្រូវការរបស់អតិថិជន ដូច្នេះបើសិនជាមានតម្រូវការច្រើនលើរថយន្ដ Lexus pickup ក្រុមហ៊ុនអាចរៀបចំគម្រោងការផលិតរថយន្ដ pickup ប្រភេទអគ្គិសនីសុទ្ធបាន នឹងដាក់បញ្ចូលទៅក្នុងផែនការឡានអគ្គិសនីសុទ្ធឆ្នាំ ២០២៦ របស់ខ្លួន។ 

គួររំឭកថា ដោយសារ Lexus គឺជាបុត្រសម្ព័ន្ធរបស់ Toyota ដែលមានផលិតរថយន្ដ pickup ជាច្រើនម៉ូដែលរួចមកហើយ ជាក់ស្ដែងដូចជា Tundra, Tacoma, និង Hilux ជាដើម ហើយថ្មីៗនេះទៀតសោត Toyota ក៏ទើបតែបានបញ្ចញផែនការផលិតឡានអគ្គិសនី ៣០ ម៉ូដែលឆ្នាំ ២០៣០ របស់ខ្លួនដែលក្នុងនោះមានទាំងឡាន pickup ផងដែរ ដូច្នេះហើយ Lexus អាចប្រឈមជាមួយនឹងការប្រកួតប្រជែងខ្ពស់បើសិនជាសម្រេចការផលិតឡាន pickup អគ្គិសនីមែន ក៏ប៉ុន្ដែគម្រោងនឹងប្រែប្រួលយ៉ាងណាទៀតនោះ មានតែចាំតាមដានក្នុងកម្មវិធីបទបង្ហាញផែនការឡានអគ្គិសនីឆ្នាំ ២០២៦ របស់ Lexus ក្នុងកម្មវិធី Japan Mobility Show 2023 ចុងខែក្រោយ (២៦ តុលា - ៥ វិច្ឆិកា) នេះ។ 

ប្រភព៖ Motor 1

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!