នៅក្នុងសន្និសិទរថយន្ដនៅប៉េកាំង Beijing Auto Show កាលពីពេលថ្មីនេះ ក្រុមហ៊ុន MG បានបង្ហាញគម្រូរថយន្ដស្ព័រម៉ូដែល ថ្មីរបស់ខ្លួន រត់ដោយប្រើថាមពលអគ្គិសនីសុទ្ធ និងល្បឿនមិនធម្មតា។

រថយន្ដអគ្គិសនីស្ព័ររបស់ MG នេះ មានឈ្មោះថា EXE181 ដែលត្រូវបានក្រុមហ៊ុនរចនាឡើងយកគម្រូតាមរថយន្ដប្រណាំង ល្បីឈ្មោះសេរីចាស់ EX181 ដោយកែប្រែសមត្ថភាពរបស់វាល្អជាងមុន ជាមួយនឹងការឌីហ្សាយរាងក្រឡូមបែប UFO អមនឹងកាប៊ីនរាងជាដំណក់ទឹក និងស្រួចទៅខាងក្រោយ បូករួមនឹងការប្រើប្រាស់គ្រឿងបរិក្ខារស្រាលទៀត ធ្វើឲ្យកម្រិត coefficient របស់វានៅត្រឹមតែ ០.១៨១ ដែលតិចជាងបើធៀបទៅនឹងរថយន្ដស្ព័រផ្សេងៗដែលមាន coefficient ទាបប្រហាក់ប្រហែលគ្នាដូចជា Volkswagen XL1 មាន 0.១៩៩ និង McLaren Speedtail មាន ០.២៧៨ ដែលនាំឲ្យ EXE181 អាចជាន់ល្បឿនបានកាន់តែលឿន ដោយ EXE181 អាចជាន់បានដល់ ៤១៥គម/ម៉ ។ 

ផ្នែកខាងក្នុងរបស់វាមិនត្រូវបានបញ្ចេញព័ត៌មានលម្អិតរឿងបច្ចេកវិទ្យា និងមុខងារប្រើប្រាស់ផ្សេងៗ ថា វាអាចមាន បំពាក់ប្រព័ន្ធស្វ័យប្រវត្តិ ឬប្រព័ន្ធពិសេសណាមួយ ឬក៏រចនាបថពិសេសណាមួយនោះទេ គ្រាន់តែបានឲ្យឃើញថា វាមានភ្ជាប់មកជាមួយ​​​ចង្កូតពាក់កណ្ដាលចំណិត ឬ Yoke Style Steering Wheel ស្រដៀងចង្កូតឡានប្រណាំងដែរ បន្ថែមជាមួយនឹងអេក្រង់ឌីជីថល និងប៉ូតុងបញ្ជាមួយចំនួននៅក្បែរនោះ។ 

ដូចគ្នាទៅនឹង ផ្នែកខាងក្នុងដែរ ព័ត៌មានទាក់ទងនឹង spec លម្អិតរបស់វាត្រូវបានលាក់សិន តែគេសន្និដ្ឋានយោងទៅតាមការឲ្យដឹង ដោយសារវាមានសមត្ថភាពជាន់ស្ទុះពី ០ ទៅ ១០០គម/ម៉ ប្រើពេលត្រឹម ១.៩ វិ​ ដូច្នេះវាអាចនឹងត្រូវប្រើប្រាស់ម៉ូទ័រអគ្គិសនី ៤ ដែលមានសមត្ថភាពផលិតកម្លាំងបានមិនតិចជាង ១០០០សេះ ដោយសារតែរថយន្ដដូចជា Rimac Navera ត្រូវការម៉ូទ័រអគ្គិសនីដែលផលិតកម្លាំងបានដល់ទៅ ១៨៨៧​ សេះដើម្បីអាច ឲ្យវាជាន់ស្ទុះបានក្នុងល្បឿននិងរយៈពេលដូចគ្នានេះ។ 

MG មិនទាន់បានឲ្យដឹងនៅឡើយទេ ថា EXE181 នឹងសម្រេចចេញជាស្ថាពរនៅពេលណានោះ​ គ្រាន់តែបានប្រកាសថា EXE181 នឹងមានវត្តមានម្ដងទៀត ជាមួយនឹងការបកស្រាយព័ត៌មានបន្ថែមពីរថយន្ដមួយនេះ ក្នុងកម្មវិធី MG’s Centenary celebration នៅ Goodwood Festival of Speed ក្នុងខែកក្កដា ខាងមុខនេះ។ 

អត្ថបទ៖ Andra 

ប្រភព៖ Autocar 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!