បន្ទាប់ពីសម្រេចការសាងសង់ ថ្មីៗនេះ ក្រសួងសាធារណការ និងដឹកជញ្ជូន បានចេញសេចក្ដីជូនដំណឹងដល់ប្រជាពលរដ្ឋ អ្នកធ្វើដំណើរថា​ ផ្លូវល្បឿនលឿនភ្នំពេញ-ព្រះសីហនុ នឹងត្រូវបើកឲ្យប្រើប្រាស់សាកល្បង ដោយឥតគិតថ្លៃរយៈពេលមួយខែ ពេញ គិតចាប់ពីថ្ងៃទី ១ តុលា ដល់ថ្ងៃទី ៣១ តុលានេះហើយ។​

សម្រាប់របៀបនៃការប្រើប្រាស់ផ្លូវនេះ ក្រសួងបានរៀបចំផលិតវីដេអូអប់រំផ្សព្វផ្សាយដល់បងប្អូនប្រជាពលរដ្ឋ មុនពេលចូលប្រើប្រាស់ដើម្បីបញ្ចៀសបញ្ហាផងដែរ ដោយតួផ្លូវនេះ មានទទឹង ២៤ ម៉ែត្រ បែងចែកជា ៤ គន្លង (២ ទៅ និង ២ មក) ដែលមានគន្លងឈប់បន្ទាន់ ១ ទៅ ១ ក្រាលបេតុងកាស៊ូ មានសួនច្បារខណ្ឌកណ្ដាលផ្លូវ មានផ្លូវបំបែកប្ដូរទិស (Inter-Change) ភ្ជាប់មកផ្លូវជាតិលេខ ៤ ចំនួន ៦ កន្លែង​ មានកន្លែងឈប់សម្រាក ៣ កន្លែង និងចំណតរថយន្ដ ១ កន្លែង។ 

យោងតាមប្រសាសន៍របស់ ឯកឧត្តមទេសរដ្ឋមន្ដ្រី ស៊ុន ចាន់ថុល បានឲ្យដឹងថា៖ 

“ជាមួយនឹងសំណង់ផ្លូវដ៏រឹងមាំ បរិក្ខារតាមដងផ្លូវមានគុណភាព និងចំណាំងផ្លាតបំភ្លឺពេលយប់ គួបផ្សំនឹងការគោរពច្បាប់ចរាចរណ៍យ៉ាងខ្ជាប់ខ្ជួន នោះបងប្អូនប្រជាពលរដ្ឋអាចបើកបរពេលយប់លើផ្លូវល្បឿនលឿនថ្មីភ្នំពេញ-ក្រុងព្រះសីហនុ នេះប្រកបដោយសុវត្ថិភាព” 

ឯកឧត្តមបានបន្ថែមទៀតថា៖ 

“អំពូលភ្លើងបំភ្លឺផ្លូវល្បឿនលឿន ត្រូវបានបំពាក់នៅតាមទីតាំងសំខាន់ៗមួយចំនួន ប៉ុណ្ណោះដូចជា៖ ផ្លូវប្តូរទិស កន្លែងបង់ប្រាក់ និងកន្លែងឈប់សម្រាក ដើម្បីសន្សំសំចៃការប្រើប្រាស់ ថាមពលអគ្គិសនី។” “តែយើងបានបំពាក់ចំណាំងផ្លាតតាមរបាំងខណ្ឌចែកទ្រូងផ្លូវ របារ បង្គោលកំណត់ដែនផ្លូវ និងតាមគំនូសបែងចែកគន្លងផ្លូវ ដើម្បីជាជំនួយឱ្យអ្នកបើកបរយានយន្តងាយ ស្រួលក្នុងការបើកបររបស់ខ្លួនផងដែរ។ បើសិនជាបងប្អូនគោរពច្បាប់ចរាចរណ៍ និងបទដ្ឋានសុវត្ថិភាពចរាចរណ៍ផ្លូវល្បឿនលឿន នោះការបើកបរពិតជាមានសុវត្ថិភាព មិនថាពេលយប់ ឬពេលថ្ងៃឡើយ។

គួរំឭកដែរថា ផ្លូវល្បឿនលឿនភ្នំពេញ-ព្រះសីហនុ នេះ មានប្រវែងសរុប ១៨៧.០៥ គីឡូម៉ែត្រ តភ្ជាប់ពីរាជធានីភ្នំពេញទៅដល់សង្កាត់លេខ៣ ក្រុងព្រះសីហនុ ខេត្តព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។បើកការដ្ឋានសាងសង់កាលពីថ្ងៃទី ២២ ខែ មិនា ឆ្នាំ ២០១៩ ចំណាយពេលសាងសង់ ៤០ ខែ ដែលបច្ចុប្បន្នសម្រេចលឿនជាងការរំពឹងទុក ដល់ទៅ ៨ ខែ។ 

រូបភាពបន្ថែម៖ 

អត្ថបទ៖ Andra