នៅថ្ងៃមុខ ឆាប់ៗនេះ គ្រប់យានយន្ដទាំងអស់ នឹងលែងអនុញ្ញាតឲ្យប្រើប្រាស់ផ្លាកលេខចាស់ៗ ឬ លេខសេះហោះ ដែលគ្មាន QR Code ទៀតហើយ​ ដោយក្រសួងសាធារណការ នឹងផ្លាស់ប្ដូរស្លាកលេខប្រភេទថ្មី ដែលមាន QR Code ត្រឹមត្រូវជូនដល់ប្រជាពលរដ្ឋ ដោយឥតគិតថ្លៃ។ 

យោងតាមកិច្ចសម្ភាសនាឱកាសអបអរសាទរ​ខួប ៣ ឆ្នាំ នៃការដាក់ដំណើរការផ្លូវការ​ផ្លាកលេខពិសេសផ្ទាល់ខ្លួនកាលពីថ្ងៃទី ៧ ខែ មិនា កន្លងទៅថ្មីៗនេះ ឯកឧត្តមទេសរដ្ឋមន្រ្ដី ស៊ុន ចាន់ថុល​ បានឲ្យដឹងថា ក្រសួងសារធារណការ​ និងដឹកជញ្ជូន ពេលនេះ កំពុងតែធ្វើការជាមួយនឹងក្រសួង សេដ្ឋកិច្ច និងហិរញ្ញវត្ថុ គិតគូរប្ដូរលេខ (ផ្លាកលេខយានយន្ដ) ចាស់ៗទាំងអស់ដែលមិនមាន QR Code ឲ្យទៅជាផ្លាកលេខដែលមាន QR Code ដើម្បីងាយស្រួលដឹងថាផ្លាកលេខណាក្លែងក្លាយ ឬពិតប្រាកដ ដោយមិនគិតកម្រៃពីប្រជាពលរដ្ឋ។ 

ឯកឧត្តម ក៏បានបញ្ជាក់ផងដែរថា គោលបំណងក្នុងការប្ដូរនេះ​ គឺ ទី ១​ ដើម្បីលុបបំបាត់ផ្លាកលេខ សេះហោះក្លែងក្លាយ, ទី ២​ គឺដើម្បីធ្វើបច្ចុប្បន្នភាព លើព័ត៌មានផ្សេងៗរបស់ម្ចាស់ផ្លាកលេខ ដូចជា អាស័យដ្ឋាន ជាដើមឲ្យ​បានល្អរៀបរយ និងត្រឹមត្រូវ ការពារការក្លែងបន្លំពីជនខិលខូច និងក្រុមធ្វើផ្លាកលេខខុសច្បាប់មួយចំនួន។

សូមជម្រាបជូនដែរថា សម្រាប់ព័ត៌មានលម្អិតផ្សេងៗទាក់ទងនឹងការប្ដូរផ្លាកលេខនេះ កំពុងស្ថិតក្នុងដំណើរការសិក្សា និងគិតគូរ រវាងក្រសួងសាធារណការ​ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ នៅឡើយ ដើម្បីចាត់ចែងថវិកា សម្រួលការអនុវត្ត ដោយមិនចាំបាច់ឲ្យប្រជាពលរដ្ឋបង់ថវិកាផ្ទាល់ខ្លួន។ 

ប្រភព៖ ក្រសួងសាធារណការ និងដឹកជញ្ជូន​

អត្ថបទ៖ Andra