ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន ថ្មីៗនេះបានឲ្យដឹងថា មកទល់ពេលបច្ចុប្បន្ន នេះ កម្ពុជា មានយានយន្ដជាង ១៧០ ពាន់គ្រឿង ក្នុងចំណោមយានយន្ដបានចុះបញ្ជី ១ លានគ្រឿង បានហួសសុពលភាព ឆៀក។ 

យោងតាមប្រសាសន៍របស់ឯកឧត្តមទេសរដ្ឋមន្ដ្រីក្នុងកម្មវិធី សម្ភោធមណ្ឌលត្រួតពិនិត្យលក្ខណៈបច្ចេកទេស យានយន្ដ (ឆៀក) សាខាផ្សារដីហុយ ឲ្យប្រើប្រាស់ជាផ្លូវការ កាលពីពេលថ្មីៗនេះ ឯកឧត្តម បានសំដែងការព្រួយបារម្ភ ដល់យានយន្ដ ដែលមិនទាន់បានឆៀក ដោយសារតែមានចំនួនច្រើនខ្លាំងដល់រយពាន់គ្រឿង និងបានក្រើនរំឭកដល់បងប្អូន ប្រជាពលរដ្ឋជាម្ចាស់យានយន្ដ ដែលមិនទាន់បានឆៀកនេះ ប្រញាប់រួសរាន់ទៅធ្វើឲ្យបានទៀងទាត់ទាន់ពេល ដើម្បីជៀសវាងបញ្ហា រក្សាសុវត្ថិភាពតាមដងផ្លូវ កាត់បន្ថយគ្រោះថ្នាក់ចរាចរណ៍ ជាពិសេសគឺ មិនរំខាន ខាតពេលវេលា និងថវិកា ដោយសារតែត្រូវសមត្ថកិច្ច ផាកពិន័យពេលធ្វើដំណើរនោះទេ។

លើសពីនេះ ឯកឧត្តមក៏បានគូសបញ្ជាក់ដែរថា ដើម្បីបញ្ជៀសការរង់ចាំ កកស្ទះនៅមណ្ឌលឆៀក បងប្អូនប្រជាពលរដ្ឋក៏អាចដាក់ ពាក្យណាត់ពេលវេលាមុន តាមប្រព័ន្ធអនឡាញផងដែរ https://techinspection.mpwt.gov.kh ។ 

គួរបញ្ជាក់ផងដែរថា បច្ចុប្បន្ន មជ្ឈមណ្ឌលឆៀកយានយន្ដ នៅរាជធានីភ្នំពេញមានរាប់ទាំង មណ្ឌលថ្មី ផ្សារដីហុយនេះ សរុប ចំនួន ៨ ទីតាំង ដូចជា សាខា៖ 

• ឬស្សីកែវ ផ្លូវលេខ៥៩៨(ឯកឧត្តម ជា សុផារ៉ា)
• ជ្រោយចង្វារ ផ្លូវជាតិលេខ៦(ចន្លោះស្ពានទី៣ និងស្ពានទី៤)
• ចំការដូង ផ្លូវលេខ២១៧(ជិតសាលាខណ្ឌដង្កោ) 
• បឹងស្នោរ ផ្លូវជាតិលេខ១(ជាប់ចំណតយានយន្តលោកជំទាវ ស៊យ សុផាន)
• កំបូល ផ្លូវជាតិលេខ៤(ទល់មុខជិតតំបន់សេដ្ឋកិច្ចពិសេសភ្នំពេញ)
• បឹងបៃតង ផ្លូវលេខ១៩២៨(ក្បែរផ្សារបឹងបៃតង)
• អូដឹម ផ្លូវជាតិលេខ៤(អូដឹម)
• សែនសុខ ផ្លូវលេខ ១៩៨៦ (ផ្សារដីហុយ ភូមិភ្នំពេញថ្មី សង្កាត់ភ្នំពេញថ្មី)

អត្ថបទ៖ Andra