កាលពីព្រឹកថ្ងៃទី ០៩ ខែ មករា កន្លងទៅនេះ ក្រសួងសាធារណការ និងដឹកជញ្ជូន បានជួបពិភាក្សាការងារ ជាមួយក្រុមហ៊ុន NIPPON KOEI ស្ដីពីការរៀបចំកែលម្អផ្លូវរថភ្លើង នៅភាគខាងជើងប្រទេស រួមមានខេត្ត បាត់ដំបង និងបន្ទាយមានជ័យ ព្រមទាំង គ្រោងសិក្សាលទ្ធភាពនៃការធ្វើផ្លូវរថយន្ដ Tramway ក្នុងក្រុងភ្នំពេញផងដែរ។  

នៅក្នុងជំនួបនេះ ក្រុមការងារជំនាញនៃក្រុមហ៊ុន NIPPON KOEI បានធ្វើបទបង្ហាញទាក់ទងនឹងគម្រោងកែលម្អប្រព័ន្ធដឹកជញ្ជូនអ្នកដំណើរ តាមរថភ្លើងនៅតាមតំបន់ចំនួន ៣​ នៃផ្លូវដែកភាគ ខាងជើងប្រទេស រួមមាន​ បាត់ដំបង សេរីសោភ័ណ និងប៉ោយប៉ែត ដើម្បីរៀបចំផ្លូវរថភ្លើងដែលមានស្រាប់ ឲ្យកាន់តែប្រសើរសម្រាប់ការដឹកជញ្ជូន។​

នាឱកាសនោះ ឯកឧត្តម រដ្ឋលេខាធិការប្រចាំការ តូច ចាន់កុសល បានធ្វើការថ្លែងអំណរគុណដល់ក្រុមហ៊ុន និងស្នើឲ្យ ក្រុមហ៊ុនពិចារណាលើការសិក្សាលើគម្រោងផ្លូវរថភ្លើង ក្នុងទីក្រុងភ្នំពេញ (Tramway) ដែលជាប្រភេទដឹកជញ្ជូនមួយ មានការនិយមចូលចិត្តប្រើប្រាស់ពីប្រជាពលរដ្ឋ ដោយវាមានតម្លៃថោក ជាពិសេស ងាយស្រួលក្នុងការវិនិយោគដោយ ចំណាយទាបជាង បើធៀបនឹងប្រព័ន្ធប្រតិបត្តិការរថភ្លើងស្វ័យប្រវត្តិ (AGT) ដែលទីភ្នាក់ងារ JICA បានសិក្សារួចកន្លងមក។

ប្រភព៖ ក្រសួងសាធារណការ និងដឹកជញ្ជូន 

អត្ថបទ៖ Andra