ក្នុងឱកាសជួបសំណេះសំណាលរវាងក្រសួងសាធារណការ​ និងដឹកជញ្ចូន និងគណៈប្រតិភូនាយកដ្ឋានមូលធនបរទេស និងការវិនិយោគក្រៅប្រទេស​(ចិន) កាលពីពេលថ្មីៗនេះ នាយកដ្ឋាន បានសំដែងការគាំទ្រយ៉ាងពេញទំហឹងលើគម្រោងស្ដារ ស្ថាបនា ហេដ្ឋារចនាសម្ព័ន្ធនៅកម្ពុជា ដោយបានចាត់ចែងក្រុមការងារបច្ចេកទេស ដើម្បីចូលរួមសហការជាមួយក្រុមការងារកម្ពុជា  ក្នុងការពន្លឿនការអនុវត្តការងារបច្ចេកទេស លើគម្រោងផ្លូវដែកល្បឿនលឿនភ្នំពេញ-ប៉ោយប៉ែត ឲ្យសម្រេចចាប់ផ្ដើមការសាងសង់ឲ្យបានឆាប់ៗ។ 

ឆ្លៀតក្នុងឱកាសនោះ ​ឯកឧត្តមទេសរដ្ឋមន្រ្ដី ស៊ុន ចាន់ថុល បាន លើកឡើងពីគម្រោងធំៗ ចំនួន ៣ នៅកម្ពុជា​ ជូនគណប្រតិភូ ពិនិត្យលទ្ធភាព ផ្ដល់ជំនួយហិរញ្ញប្បទាន ដូចជា គម្រោងស្ថាបនាឡើងវិញកំណាត់ផ្លូវជាតិលេខ៣ វាលរេញ-ត្រពាំងរពៅ ដែលបានសិក្សាដោយក្រុមហ៊ុនសាជីវកម្មស្ពាន និងថ្នល់ចិន CRBC, គម្រោងពង្រីកកំណាត់ផ្លូវជាតិលេខ៦ ពីអាកាសយានដ្ឋានអន្តរជាតិសៀមរាបថ្មី ទៅក្រុងសៀមរាបសិក្សាដោយក្រុមហ៊ុន Shanghai Construction Group Co.,Ltd និង គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ សិក្សាដោយក្រុមហ៊ុន CCCC Water Transportation Consultants Co., Ltd។

ហើយជាការឆ្លើយតប លោក ZHANG Zhiqing តំណាងគណប្រតិភូ បានជម្រាបថា ចំពោះគម្រោងស្ថាបនាឡើងវិញកំណាត់ផ្លូវជាតិលេខ៣ វាលរេញ-ត្រពាំងរពៅ និងគម្រោងពង្រីកកំណាត់ផ្លូវជាតិលេខ៦ ពីអាកាសយានដ្ឋានអន្តរជាតិសៀមរាបថ្មី ទៅក្រុងសៀមរាប កំពុងស្ថិតនៅក្នុងដំណាក់កាលពិនិត្យលទ្ធភាព និងធ្វើការវាយតម្លៃ រីឯ គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ ភាគីចិនស្នើសុំពេលវេលា ដើម្បីយកលទ្ធផលនៃការសិក្សាសមិទ្ធិលទ្ធភាព ដាក់ទៅស្ថាប័នជំនាញពាក់ព័ន្ធពិភាក្សាឱ្យបានលម្អិតស៊ីជម្រៅ ជាមុនសិន ដើម្បីបានជាមូលដ្ឋានក្នុងការឆ្លើយតបត្រឡប់មកវិញ។

ប្រភព៖ ក្រសួងសាធារណការ និងដឹកជញ្ជូន 

អត្ថបទ៖ Andra