នៅថ្ងៃទី ៧ និង ៨ ខែ មិនា ឆ្នាំ ២០២៣ ខាងមុខនេះ ក្រសួងសាធារណការ និងដឹកជញ្ជូន នឹងប្រារព្ធពិធី អបអរសាទរ ខួប ៣ ឆ្នាំ ផ្លាកលេខពិសេសផ្ទាល់ខ្លួន (លេខកម្ពុជា) ដែលមានការតាំងពិពរណ៌ផ្លាកលេខរថយន្ដ ការលក់ និងដាក់ដេញថ្លៃលេខពិសេសផ្ទាល់ខ្លួន ដើម្បីកៀរគរថវិកាជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ ជាពិសេស នឹងមានការ ប្រគំតន្រ្ដី ផ្សារភ្ជាប់នឹងការផ្សព្វផ្សាយ សុវត្ថិភាពចរាចរណ៍ ជាមួយការចូលរួមសម្ដែងពីសិល្បករ-សិល្បការីល្បីៗជាច្រើន។ 

សម្រាប់កម្មវិធីនេះ នឹងធ្វើឡើងនៅទីតាំង សួនច្បារ វត្តបុទុមវតី ចាប់ពីម៉ោង ៨ ព្រឹក ទៅម៉ោង ៩ យប់ ដោយ សាធារណជន និងប្រជាពលរដ្ឋគ្រប់រូបអាចចូលរួមបានដោយសេរី និងឥតគិតថ្លៃ ស្វែងយល់លើព័ត៌មានលម្អិត ទាក់ទងនឹងបែបបទ លក្ខខណ្ឌ ឯកសារពាក់ព័ន្ធ ផ្សេងៗ លើការជាវ និងប្រើប្រាស់ ផ្លាកលេខពិសេសផ្ទាល់ខ្លួន ព្រមទាំងលេងល្បែងកំសាន្តផ្សេងៗ ដើម្បីទទួលបានវត្ថុអនុស្សាវរីយ៍ផងដែរ។ 

លើសពីនេះ ក៏មានការតាំងពិព័រណ៍ រថយន្តពីក្រុមដៃគូសហការ ការតាំងពិព័រណ៍របស់គ្រឹះស្ថានធនាគារ-ហិរញ្ញវត្ថុ និងធានារ៉ាប់រង ផ្សេងៗជាដើម។ 

សូមជម្រាបជូនដែរថា សម្រាប់ផ្លាកលេខពិសេសនេះ ម្ចាស់រថយន្ដក៏អាចជ្រើសរើសទិញតាមប្រព័ន្ធអនឡាញបានដែរ ជាមួយនឹងគេហទំព័រ vehicle.mpwt.gov.kh បំពេញព័ត៌មានទាមទារមួយចំនួនដូចជា ព័ត៌មានអំពីម្ចាស់រថយន្ដ ជ្រើសរើសផ្លាកលេខ ព័ត៌មានពីរថយន្ដ កាលវិភាគទទួល ឯកសារពាក់ពន្ធ័ និងចុងក្រោយទូទាត់ទឹកប្រាក់ជាការស្រេច ឯ តម្លៃវិញគឺខ្ទង់ពី ២ លានរៀលឡើងទៅ រហូតដល់ ១ ពាន់លានរៀល និងអាចលើសនេះ សម្រាប់ផ្លាកលេខដេញថ្លៃ។  

ប្រភព៖ ក្រសួងសាធារណការ និងដឹកជញ្ជូន 

អត្ថបទ៖ Andra