ផ្លូវល្បឿនលឿនមែន តែកាមេរ៉ានៅតែមាន សមត្ថកិច្ចនៅតែមានដាក់ប្រចាំការ ត្រួតពិនិត្យដដែល ក្រសួងណែនាំឲ្យអ្នកបើកបរលើផ្លូវល្បឿនលឿន បើកក្នុងល្បឿនកំណត់ ដើម្បីសុវត្ថិភាព និងរក្សាថវិកា។

អបអរសាទរ ផ្លូវល្បឿនលឿនពេលនេះ បានបើកដំណើរការឲ្យប្រជាពលរដ្ឋអ្នកធ្វើដំណើរ ដោយមិនគិតថ្លៃចំនួន ១ ខែ ចាប់ពីថ្ងៃទី ១ ដល់ ៣១ តុលា នេះហើយ ប៉ុន្ដែក្រសួងបានរំឭកដល់អ្នកធ្វើដំណើរទាំងអស់ឲ្យមានស្មារតី ប្រុងប្រយត្ន័ខ្ពស់ ជាពិសេសត្រូវយល់ដឹងពីរបៀបបើកបរ តាមក្បួនក្រិតក្រម  ឲ្យបានត្រឹមត្រូវ ដើម្បីបានទៅដល់គោលដៅដោយសុវត្ថិភាព ក្នុងនោះ គឺត្រូវយកចិត្តទុកដាក់គោរពផ្លាកសញ្ញាចរាចរណ៍ និងមិនបើកបរលើសល្បឿនដែលបានកំណត់ ព្រោះអាចបង្កគ្រោះថ្នាក់ជាយថាហេតុ ក៏ដូចជាអស់ថវិកាផងដែរ។ 

ក្រសួងបានបញ្ជាក់ថា កុំបើកបរលើសល្បឿនកំណត់ ព្រោះមន្ដ្រីនគរបាលចរាចរណ៍ ត្រូវបានរៀបចំ និងត្រៀមខ្លួនជាស្រេចនៅតាមគោលដៅសំខាន់ៗ លើផ្លូវល្បឿនលឿន នេះ​ដូច្នេះ ហើយ ដើម្បីសុវត្ថិភាព មិនខាត ទាំងពេលវេលា ថវិកា ចូរបើកបរក្នុងល្បឿនកំណត់ត្រឹមត្រូវ។ 

បន្ថែមពីនេះទៅទៀត ក្រសួងបានក្រើនរំឭកផងដែរថា ដោយសារតែនេះជារដូវមានភ្លៀងធ្លាក់ច្រើន ដូច្នេះមុននឹងបើកបរចូលផ្លូវល្បឿនលឿន អ្នកបើកបរគួរត្រួតពិនិត្យលក្ខណៈបច្ចេកទេស យានយន្ដទូទៅឲ្យ ដូចជា គុណភាពសំបកកង់, ហ្រ្វាំង, ភ្លើងបំភ្លឺ, ចង្កូត ផ្លិតទឹកជាដើម ឲ្យប្រាកដថា ដំណើរការបានល្អ។

ក្នុងករណី ដែលរថយន្ដមានបញ្ហា អ្នកបើកបរអាចអែបទៅឈប់នោលើគន្លងឈប់បន្ទាន់បាន តែក្រសួងបានបញ្ជាក់បន្ធែមច្បាស់ៗថា គន្លងមួយនេះ គឺសម្រាប់តែរថយន្ដ ខូច ឬមានបញ្ហាប៉ុណ្ណោះ មិនអនុញ្ញាតឲ្យឈប់លំហែ ឬថតរូបផ្សេងៗឡើយ។  

អត្ថបទ៖ Andra