ដើម្បីរួមចំណែកជួយកាត់បន្ថយការកកស្ទះចរាចរណ៍បច្ចុប្បន្ន រាជរដ្ឋាភិបាលកម្ពុជា កំពុងបន្ដការសិក្សាលើ គម្រោងធ្វើផ្លូវរថភ្លើងក្រោមដី និងរថភ្លើងធុនស្រាល ភ្ជាប់ពីរាជធានីភ្នំពេញ ទៅអាកាសយានដ្ឋានអន្តរជាតិតេជោក្រុងតាខ្មៅ និងផ្សារទំនើបអ៊ីអនមានជ័យ។  

យោងតាមការចុះផ្សាយពីក្រសួងព័ត៌មានថា ក្នុងឳកាសសម្ពោធដាក់ឱ្យដំណើរការជាផ្លូវការមណ្ឌលផ្តល់សេវាសាធារណៈទី ៧ សាខាផ្សារទំនើបអ៊ីអនម៉ល មានជ័យ ថ្មីៗនេះ ឯកឧត្តម ស៊ុន ចាន់ថុល បានមានប្រសាសន៍ឲ្យដឹងថា គម្រោងផ្លូវរថភ្លើងលើអាកាស និង ក្រោមដី នៅរាជធានីភ្នំពេញ ត្រូវបានសិក្សាចប់សព្វគ្រប់ហើយ នៅឡើយតែរង់ចាំក្រុមហ៊ុនមកបណ្តាក់ទុន ក្នុងការអភិវឌ្ឍ តែប៉ុណ្ណោះ រីឯ ការសិក្សាគម្រោងផ្លូវរថភ្លើង ធុនស្រាលភ្ជាប់ពីរាជធានីភ្នំពេញ​ទៅកាន់អាកាសយានដ្ឋានអន្តរជាតិ តេជោក្រុងតាខ្មៅ និង ផ្សារទំនើបអ៊ីអនម៉ល មានជ័យ មួយខ្សែទៀត រំពឹងថាបញ្ចប់ការសិក្សានៅដំណាច់ឆ្នាំនេះ។​

ឯកឧត្តមបានបន្ថែមទៀតថា ផ្លូវរថភ្លើងក្រោមដីដែលពីមុនហៅថា AGT ជប៉ុន នេះ បានសិក្សារួចសម្រាប់ទៅព្រលានយន្ដហោះចាស់ តែនៅពេលមានព្រលានយន្ដហោះថ្មីគម្រោងក៏ត្រូវសិក្សាបន្ថែម និងកែសម្រួលឡើងវិញ ដែលផ្លូវថ្មីនេះ នឹងកាត់ឈប់នៅទីតាំងមួយចំនួន ដូចជាផ្សារទំនើបជាដើម ដែលពេលនេះ ក្រសួងកំពុងតែធ្វើការពិភាក្សាជាមួយអ្នកវិនិយោគទុនពីគម្រោងនេះ។ 

សូមជម្រាបដែរថា បើសិនជាគម្រោងនេះ ត្រូវបានអនុវត្តការសាងសង់បានជោគជ័យ វាជាការសម្រួលដល់ការធ្វើ ដំណើររបស់ប្រជាពលរដ្ឋ កាត់បន្ថយការកកស្ទះចរាចរណ៍ ជាពិសេស លើកកម្រិតមុខមាត់ក្រុងភ្នំពេញមួយកម្រិត ទៀតផងដែរ។ 

ប្រភព៖ ក្រសួងព័ត៌មាន 

អត្ថបទ៖ Andra 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!