ថ្មីៗនេះ ស្ថាបនិកក្រុមហ៊ុន Tesla លោក​ Elon Musk បានបង្ហោះសារនៅក្នុងគណនីបណ្ដាញសង្គម X (Twitter) ថា សម្រាប់រថយន្ដអគ្គិសនី Tesla Roadster ជំនាន់ថ្មី នឹងមានសមត្ថភាពអាចហោះបាន តែមិនបានបញ្ជាក់ថាហោះបានកម្រិតណានោះទេ។ 

តាមការឲ្យដឹងពី Teslarati ថា ប៉ុន្មានខែមុន បន្ទាប់ពីលោក Elon Musk ប្រកាសថា Tesla Roaster ជំនាន់ថ្មី នឹងផលិតឡើងជាការសហការគ្នារវាង Tesla និង SpaceX ធ្វើឲ្យមានមតិជាច្រើនពីអ្នកប្រើប្រាស់បានលើកឡើងថា រថយន្ដបែប Performance EV មួយនេះ អាចអភិវឌ្ឍទៅជារថយន្ដអគ្គិសនីដែលអាចហោះបាន ដោយសារតែល្បឿន accelerations ខ្ពស់​របស់វា គួបផ្សុះជាមួយនឹង ការប្រើប្រាស់គ្រឿង និងវិស្វកម្មពី SpaceX ដែលថ្មីៗនេះ លោក Musk បង្ហោះសារម្ដងទៀតថា Tesla Roadster អាចហោះបាន។ 

លោក Musk បានឲ្យដឹងថា សម្រាប់ការរចនាការផលិត និងការបង្ហាញមុខជាផ្លូវការនៃ Roadster ជំនាន់នេះ (ជំនាន់ក្រោយបានគេគិតថាអាចហោះបាន) នឹងបញ្ចប់ទៅនៅចុងឆ្នាំនេះ ដែលប្រហែលជាមិនទាន់អាចហោះបាននៅឡើយទេ តែល្បឿនរបស់វាត្រូវបានលោកអះអាងថា អាចជាន់បានពី ០ ទៅ ១០០គម/ម៉ ប្រើពេលតិចជាង ១ វិនាទី។ ក្នុងនោះដែរ វានឹងដំណើរការដោយប្រើប្រាស់ចង្កូតបែប Steer-by-wire ជាមួយដៃចង្កូតពាក់កណ្ដាលចំណិត (yoke steering wheel) និង hyper performance ផងដែរ។​

គួរបញ្ជាក់ដែរថា លោក Musk មិនបានឲ្យដឹងពីព័ត៌មានបន្ថែមថា លោកនឹងធ្វើវាមែន ឬអត់នោះទេ ដោយនេះគ្រាន់តែជាអ្វីដែលគេរំពឹងទុក បើយោងតាមសារដែលលោកបានបង្ហោះក្នុងគណនីបណ្ដាញសង្គមផ្លូវការរបស់គាត់ ប៉ុណ្ណោះ តែក៏អាចជាការពិតដែរ ដោយសារតែកាលពីប៉ុន្មានឆ្នាំមុន Tesla ក៏ធ្លាប់ធ្វើតេស្ដសាកល្បងលើ hoverting capability របស់ Tesla Roadster ដែរ គ្រាន់តែថាបើសិនជាពិត ក៏ប្រហែលជាមិនមែនឆាប់ៗនេះដែរ ហើយរូបរាងរបស់វានឹងចេញជារបៀប Flying Car ដោយប្រើ​បរិក្ខារ (gear) ពី SpaceX។ 

អត្ថបទ៖ Andra 

ប្រភព៖ Teslarati 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!