កាលពីពេលថ្មីៗនេះ ក្រុមហ៊ុនផលិតរថយន្ដប្រណិត ល្បីឈ្មោះ Rolls Royce បានប្រកាសចេញរថយន្ដប្រើអគ្គិសនី សុទ្ធម៉ូដែល ដំបូងរបស់ខ្លួន ឈ្មោះថា Rolls Royce Spectre ជាមួយ រូបរាងប្រណិត កម្លាំងខ្លាំង និងអាចបើកបាន ៥២០ គម រាល់ពេលសាកពេញម្ដង។ 

តាមការចុះផ្សាយពីវេបសាយ engadget បានឲ្យដឹងាថា Rolls Royce អគ្គិសនី ម៉ូដែល Spectre នេះ ជាប្រភេទ រថយន្ដ coupe ទ្វារ ២ កៅអី ៤ និងយកស្ដាយរចនាគម្រូស្រដៀង Rolls Royce Phantom ជាមួយនឹង Aluminum Platform ថ្មី ឲ្យឈ្មោះថាជា ស្ថាបត្យកម្មប្រណិត “Architecture of Luxury” ដោយតួរថយន្ដទាំងមូល មានបណ្ដាយ ៤.៨ ម ទទឹង ២ ម។ 

Rolls Royce Spectre EV នេះ នឹងបង្ហាញមុខជាលក់ជាផ្លូវកាលើកដំបូង ក្នុងរង្វង់ត្រីមាសទីបួន នៃឆ្នាំ ២០២៣ ខាងមុខនេះ នៅទីផ្សារសហរដ្ឋអាមេរិកមុនគេ ជាមួយនឹងតម្លៃខ្ទង់ ៤១៣ ៥០០ ដុល្លារ ។

សម្រាប់សមត្ថភាពរបស់វាវិញ Specttre EV នេះ ដើរដោយប្រើប្រាស់ប្រព័ន្ធអគ្គិសនីសុទ្ធ សាកពេញម្ដង ធ្វើដំណើរបានចម្ងាយ ៥២០ គម ជាមួយកម្លាំង ៥៧៧ សេះ​, រត់ដោយប្រើប៉ុងពីរ ឬ AWD (All wheels drive) ជាន់ល្បឿនពី ០ ទៅ ១០០ គម/ម៉ ប្រើពេល​ ៤.៤ វិនាទី ដោយក្រុមហ៊ុនបានអះអាងផងដែរថា​ ម៉ូដែលនេះ ក្រុមហ៊ុនបានសម្រិតសម្រាំង ឲ្យធ្វើដំណើរបានរលូននិងស្ងាត់ជាង ម៉ូដែលដទៃមុនៗផងដែរ។ 

លក្ខណៈពិសេសមួយទៀត របស់វានោះគឺ អមជាមួយនឹងបច្ចេកវិទ្យាទំនើបបំពាក់ក្នុងរថយន្ដ ផ្នែកខាងក្នុងត្រូវបានរចនាជាមួយនឹងម៉ូដ “Starlight Headliner” ដ៏ប្រណិត ដោយដំបូលឡានបានបង្កប់អំពូលភ្លើងតូចៗ ជាច្រើន ដែលភ្លឺរំលេចដេញគ្នា ចូលក្នុងរថយន្ដពេលមេឃងងឹត ដោយយោងតាមសម្ដីរបស់លោក Torsten Müller-Ötvös អគ្គនាយកក្រុមហ៊ុន Rolls Royces បានមានប្រសាសន៍ថា ៖

“ការរចនានេះ ធ្វើឲ្យអ្នកដំណើរមានអារម្មណ៍ថា ដូចជា កំពុងអង្គុយនៅកណ្ដាលមេឃ ពោរពេញដោយផ្កាយដូច្នោះដែរ ព្រោះថា យើងបានផ្ដោតទៅលើចំណុចសំខាន់ល្អិតៗរបស់រថយន្ដឲ្យគ្រប់ជ្រុងជ្រោយបំផុត​” លោកបានបន្ថែមទៀតថា “សម្រាប់ក្រុមហ៊ុន, ការផលិតរថយន្ដនីមួយៗគឺមិនមែនសម្រាប់តែលក់នោះទេ គឺផលិតរថយន្ដដែលពោរពេញទៅដោយប្រណិតភាព។” 

ក្រុមហ៊ុន បានឲ្យដឹងដែរថា Rolls Royce គ្រោងនឹងប្រែខ្លួនទៅផលិតរថយន្ដប្រើអគ្គិសនីសុទ្ធ ចាប់ពីឆ្នាំ ២០៣០ ទៅផងដែរ។ 

អត្ថបទ៖ Andra