បន្ទាប់ពីបានអាកាសយានដ្ឋានថ្មី ខេត្តសៀមរាបជិតបានកាដូថ្មីមួយទៀតហើយ​ ដោយក្រសួងសាធារណការ និងដឹកជញ្ជូន កំពុងពិភាក្សា ជាមួយក្រុមហ៊ុនស្ថាបនាផ្លូវថ្នល់ចិន ក្នុងការសាងសង់ផ្លូវរថភ្លើងធន់ស្រាល ​ពីអាកាសយានដ្ឋានអន្ដរជាតិសៀមរាប-អង្គរ ទៅក្រុងសៀមរាប។ 

យោងតាមសម្ដីរបស់លោក ស៊ី សាវមីង វិស្វករជាន់ខ្ពស់ផ្នែកចលនាកម្មដងផ្លូវ របស់ក្រុមហ៊ុន China Metro នៅក្នុង កិច្ចប្រជុំពិភាក្សា និងពិនិត្យលទ្ធភាពក្នុងការសាងសង់រវវាង ក្រុមការងាររបស់រដ្ឋបាលខេត្តសៀមរាប និងក្រុមហ៊ុន កាលពីថ្ងៃទី ២៣​ សីហា កន្លងទៅ បានឲ្យដឹងថា គម្រោងស្ថាបនាផ្លូវរថភ្លើងធុនស្រាលនេះ គឺមានពីរជម្រើស ដោយមួយស្ថិតនៅលើផ្លូវចាស់ និង មួយទៀតស្ថិតនៅលើផ្លូវថ្មី ក៏ប៉ុន្ដែ នៅមិនទាន់អាចដាក់គម្រោង ច្បាស់លាស់នៅឡើយទេ ដោយក្រុមការងារកំពុងតែចុះការសិក្សា ប្រមូលទិន្នន័យ និងវាស់ស្ដង់ផលប៉ះពាល់ផ្សេងៗ នៅលើគំនូសប្លង់ការសាងសង់នៅឡើយ។ 

លោកបានបន្ដថា ម្យ៉ាងវិញទៀត គម្រោងនេះអាចធ្វើទៅបានលុះត្រាតែមានការសហការជិតស្និទ្ធពី អាជ្ញាធរគ្រប់ជាន់ថ្នាក់ និង ស្ថាប័នពាក់ព័ន្ធ លើការផ្ដល់ព័ត៌មាន និងទិន្នន័យចាំបាច់ឲ្យបានច្បាស់លាស់ដោយសារតែ ផ្លូវរថភ្លើង​ពីអាកាសយានដ្ឋានអន្ដរជាតិសៀមរាប-អង្គរ ទៅក្រុងសៀមរាបនេះ អាចនឹងឆ្លងកាត់តំបន់ការពារ ដែលគ្រប់គ្រងដោយអាជ្ញាធរជាតិអប្សរា។

ក្នុងនោះដែរ លោក ពិន ប្រាកដ អភិបាលរងខេត្តសៀមរាប បានបង្ហាញការគាំទ្រ និងត្រៀមសហការជាមួយនឹងក្រុមហ៊ុន ដោយជំរុញដល់មន្ទីរ-អង្គភាព និងអាជ្ញាធរពាក់ព័ន្ធ ផ្ដល់ព័ត៌មាន និងទិន្នន័យចាំបាច់នានា ដើម្បីឲ្យគម្រោងនេះដំណើរការបានរលូន និងឆាប់រហ័សឆ្លើយតបទៅនឹងការកើនឡើងនូវចំនួនភ្ញៀវទេសចរ និង សេវាកម្មដឹកជញ្ជូន នៅពេលដែលអាកាសយានដ្ឋានអន្តរជាតិសៀមរាប-អង្គរ បើកដំណើរការនាពេលដ៏ខ្លីខាងមុខ។

ប្រភព៖ ទូរទស្សន៍ជាតិខេត្តសៀមរាប

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!