Corolla ធ្លាប់តែជាឡានដែលសុភាព រមទម បែបសាមញ្ញ នឹងសន្សំសំចៃរបស់ Toyota ប៉ុន្ដែចាប់តាំងពីឆ្នាំ ២០២២ មក Toyota បញ្ចេញម៉ូឌែល GR Corolla បែបស្ព័រដំបូងរបស់ខ្លួន ជាមួយម៉ាស៊ីនត្រឹម ៣ស៊ីឡាំងប៉ុណ្ណោះ ដែលធ្វើឲ្យមានការចាប់អារម្មណ៌ខ្លាំង។

ខណៈពេលនេះ Toyota ត្រៀមបញ្ចេញ GR Corolla ស៊េរីឆ្នាំ ២០២៥ ដែលកើនតម្លៃចាប់ពី ២,៣៦០ដុល្លារ បើធៀបនឹងម៉ូឌែលឆ្នាំមុនៗ ជាមួយការបំពេញបន្ថែម ចំណុចមួយចំនួនទៀតផងដែរ។

មិនខុសពីឆ្នាំមុនទេ GR Corolla ភ្ជាប់មកជាមួយជម្រើស Trim/Option ចំនួន ៣ ដូចជា៖ GR Core តម្លៃ ៣៩,៩៩៥ដុល្លារសម្រាប់ប្រភេទលេខដៃ ខណៈលេខអូតូលោតដល់ ៤១,៩៩៥ដុល្លារ។

GR Premium តម្លៃ ៤២,៥៧៥ដុល្លារសម្រាប់លេខដៃ នឹងលេខអូតូឡើងដល់ ៤៤,៥៧៥ដុល្លារ។ 

ខណៈ Premium Plus ចូលមកជំនួស GR Circuit តម្លៃដល់ទៅ ៤៦ុ,៦៥០ដុល្លារ សម្រាប់ជម្រើសលេខដៃ ប៉ុន្ដែចង់បានលេខអូតូ លោតដល់ ៤៨,៦៥០ដុល្លារ ជាមួយលក្ខណៈពិសេសខុសគេគឺ ការពាក់កៅអីក្ដៅប្រជាក់ ជាមួយដំបូលផ្សំឡើងពីសរសៃកាបូន មើលទៅមិនធម្មតាឡើយ។

GR Corolla មួយនេះបើនិយាយពីផ្នែកប្លុកម៉ាស៊ីនទាំងមូលត្រូវបាន Toyota ផ្គុំឡើងពីអាលុយមីញ៉ូម អមដោយគ្រោងឆ្អឹងដ៏ធន់ស្វិតរឹងមាំ TNG-A ទំហំត្រឹម ៣ស៊ីឡាំង ជំនួយដោយ Turbo តែអាចផលិតកម្លាំងដល់ទៅ ៣០០សេះ កម្លាំងរមួល ២៩៥ផោនហ្វីត (លើសឆ្នាំមុន ២២ ) ប្រើជាមួយលេខដៃ ៦វគ្គ នឹង ៨វគ្គអូតូ បង្វិលកង់ដោយប៉ុង២ AWD ជំនួយដោយប្រព័ន្ធ LSD ផងដែរ។ 

GR Corolla អាចជាន់ស្ទុះពី០ ទៅ ១០០គីឡូម៉ែត្រចាយពេលត្រឹម ៤.៩វិនាទី រត់បានល្បឿនខ្ពស់បំផុត ២៣០គីឡូម៉ែត្រ/ម៉ោង។

សម្រាប់ឆ្នាំស៊េរីឆ្នាំ 2025 GR Corolla ទទួលបានការកែទម្រង់មុខបន្តិចបន្តួចផងដែរ ដោយសង្កត់ធ្ងន់ទៅលើផ្នែកខាងមុខ ជាមួយ fascia ត្រូវ​បាន​រចនា​ឡើង​ដើម្បី​ជួយ​សម្រួលលំហូរ​ខ្យល់​បានល្អ ដើម្បី​ធ្វើ​ឱ្យ​ភាព​ត្រជាក់​ចូលទៅបញ្ចុះកម្ដៅម៉ាស៊ីនកាន់​តែ​ប្រសើរជាងមុន។

ជាមួយនឹងប្រព័ន្ធជើងក្រោមថ្មី សម្រួលដល់ការបើកបរក្នុងល្បឿនលឿន សម្រាប់ស្ថានភាពផ្លូវបត់បែនជាដើម។

ដោយ៖ Bunsak 

ប្រភព៖​ Caranddrive 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!