មិនសម្រាកទេ បន្ទាប់ពីទទួលបានជោគជ័យលើ Toyota Mirai ដែលជារថយន្ដប្រើប្រាស់ថាមពលអ៊ីដ្រូសែនប្រភេទ sedan និង Corolla Cross Hydrogen Combusion concept របស់ខ្លួន ថ្មីៗនេះ Toyota បានបង្ហាញមុខគម្រូសម្រេចនៃរថយន្ដប្រើប្រាស់ថាមពលអ៊ីដ្រូសែន ជាប្រភេទ Pickup វិញម្ដង ដែលគ្រប់គ្នាកំពុងតែចាំមើលថាតើរថយន្ដនេះនឹងមាន៊អ្វីពិសេសមកជាមួយ។ 

តាមការចុះផ្សាយពី Green Car Reports ថ្មីៗនេះបានឲ្យដឹងថា Toyota បានសម្រេចការដំឡើងគម្រូរថយន្ដ Pickup ដំណើរការដោយថាមពលអ៊ីដ្រូសែនរបស់ខ្លួនហើយ នៅក្នុងរោងចក្រ Toyota ចក្រភពអង់គ្លេស ដោយ Toyota Motor Europe និងដៃគូផ្សេងៗ ប្រើពេល ១ឆ្នាំ ជាង (ចាប់ផ្ដើមពីដើមឆ្នាំ ២០២២)។ 

ម៉ាស៊ីនអ៊ីដ្រូសែននេះ ត្រូវបានស្រាវជ្រាវបន្ថែម និងបំបែករូបមន្ដពីម៉ាស៊ីនអ៊ីដ្រូសែនរបស់ Mirai និងដំឡើងទៅក្នុងតួរថយន្ដ Toyota Hilux ប្រភេទ FCEV (Fuel Cell Electric Vehicle) ក្នុងនោះជាមួយនឹងធុងផ្ទុកអីដ្រូសែនសម្ភាធខ្ពស់ ៣ អាចឲ្យវាធ្វើដំណើរបាន ៥៨៧ គមពេលចាក់ពេញម្ដង។

សម្រាប់ Spec លម្អិត Toyota នៅមិនទាន់បានឲ្យដឹងនោះទេ គ្រាន់តែបង្ហើបថា ក្រុមហ៊ុននឹងផលិតរថយន្ដ Pickup ប្រើអ៊ីដ្រូសែននេះចំនួន ១០ គ្រឿងសិន នៅចុងឆ្នាំនេះ ដើម្បីតាមដានស្ថានភាព និងវាស់ស្ទង់កម្រិតសុវត្ថិភាពផ្សេងៗ មុននឹងធ្វើម៉ូដែលសម្រេចដែលអាចចេញលក់លើទីផ្សារ។ 

គូរបញ្ជាក់ផងដែរថា ខណៈក្រុមហ៊ុនផលិតរថយន្ដជាច្រើនបានបង្វែរទិសដៅផ្ដោតលើការផលិតឡានអគ្គិសនី ឲ្យត្រូវទៅនឹងតម្រូវការបច្ចុប្បន្ន ដូចគ្នានេះដែរ Toyota ក៏បានដាក់គោលការណ៍ផលិតឡានអគ្គិសនីជាច្រើនម៉ូដែល ជាក់ស្ដែង ដូចជាគម្រោងឡានអគ្គិសនី ៣០ ម៉ូដែល ឆ្នាំ ២០៣០ របស់ខ្លួនដែល Toyota បានប្រកាសមុនការឡើងកាន់ដំណែងរបស់លោក Koji Sato អគ្គនាយកថ្មីបន្ដិច កាលពីដើមឆ្នាំ ២០២៣ កន្លងទៅ តែអ្វីដែលធ្វើឲ្យ Toyota ពិសេសនោះ គឺក្រុមហ៊ុនមិនបោះបង់ចោល ការធ្វើរថយន្ដប្រើម៉ាស៊ីនចំហេះក្នុងនោះទេ ដោយបានសិក្សាស្រាវជ្រាវលើការប្រើប្រាស់ឥទ្ធនៈផ្សេងៗដូចជា អ៊ីដ្រូសែននេះជាដើម ដែលមានសុវត្ថិភាព ប្រសិទ្ធភាព មិនបំពុលបរិស្ថាន ដូចសាំង និងម៉ាស៊ូត ដោយសារតែវាបញ្ចេញជាតិទឹក ជំនួសឲ្យផ្សែងពុលជាកាកសំណល់ក្រោយចំហេះ ព្រមទាំងចំណេញពេលវេលា មិនចាំចាច់ឲ្យរង់ចាំសាកថាមពលយូរ ដូចឡានអគ្គិសនីនោះទេ ខណៈអាចបន្ដជីវិតដល់ម៉ាស៊ីនចំហេះក្នុង ឲ្យរស់រានបានយូរតទៅមុខទៀតផងដែរ។ 

ប្រភព៖ Green Car Reports

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!