តាមការចុះផ្សាយពី វេបសាយ Green Car Report បានឲ្យដឹងថា ថ្មីៗនេះ Toyota បានប្រកាសបោះលុយវិនិយោគទុន ៥.៦ ពាន់លានដុល្លារ សាងសង់រោងចក្រផលិតឡានអាគុយឡានអគ្គិសនី និងរុះរើរ កែប្រែរោងចក្រផលិតម៉ាស៊ីន ធំៗពីរ នៅជប៉ុន ទៅជារោងចក្រផលិតអាគុយវិញ។ 

ខណៈ​ឡានអគ្គិសនីបានក្លាយជាទីផ្សារពេញនិយមនាពេលបច្ចុប្បន្ន ដែលធ្វើឲ្យក្រុមហ៊ុនផលិតឡានជាច្រើន ចាប់ផ្ដើមងាកមករកការផលិតឡានអគ្គិសនីភ្លូកទឹកភ្លូកដី ក្នុងនោះ ក្រុមហ៊ុនផលិតរថយន្ដល្បីឈ្មោះរបស់ជប៉ុន Toyota ក៏បានរៀបចំគម្រោងវិនិយោគលើការផលិតឡានអគ្គិសនីដូចគ្នា ដោយកាលពីដើមឆ្នាំ កន្លងទៅ Toyota បានបង្ហាញគម្រោង ផលិតឡានអគ្គិសនី៣០ ម៉ូដែល សម្រាប់ជាការបោះជំហានលើវិថីឡានអគ្គិសនី ហើយថ្មីៗនេះ ផងដែរ ដើម្បីបង្ហាញថាខ្លួនពិតជាដាក់ចិត្តដាក់កាយ ផលិតឡានអគ្គិសនីនេះ ពិតប្រាកដមែន Toyota បានប្រកាសបោះលុយ ៥.៦ ពាន់លានដុល្លារ លើផែនការផលិតឡានអគ្គិសនីសុទ្ធ របស់ខ្លួន​។​

Toyota បានឲ្យដឹងថា ទឹកប្រាក់​ ៥.៦ ពាន់លានដុល្លារ នេះ ២.៥ ពាន់លានដុល្លារ នឹងត្រូវបំបែក សម្រាប់ការសាងសង់រោងចក្រផលិតអាគុយឡានអគ្គិសនីនៅរដ្ឋ North Carolina សហរដ្ឋអាមេរិក សម្រាប់បំពាក់លើរថយន្ដអគ្គិសនីរបស់ខ្លួនដែលត្រូវលក់ក្នុងទីផ្សារអាមេរិក និងបានបន្ថែមទៀតថា ខ្លួនក៏នឹងកែប្រែរោងចក្រផលិតម៉ាស៊ីនសម្រាប់ឡានចំហេះក្នុង ធំៗ ២ ទីតាំង​នៅជប៉ុន គឺរោងចក្រ Shimoyama និង Myochi ឲ្យទៅជារោងចក្រផលិតអាគុយសម្រាប់ឡានអគ្គិសនីវិញ ហើយដំណើរការផលិតនិងគ្រប់គ្រងដោយ Prime Planet Energy & Solutions ដែលជាក្រុមហ៊ុនសហការគ្នា រវាង Toyota និង Panasonic។ 

គួរបញ្ជាក់ផងដែរថា ក្រៅតែពី Toyota ក៏មានក្រុមហ៊ុនផលិតឡានផ្សេងទៀត ដូចជា Volkswagen ក៏កំពុង តែរៀបចំគម្រោងពង្រីកការផលិតរថយន្ដអគ្គិសនីរបស់ខ្លួនក្នុងទឹកដីកំណើតនៃប្រទេស អាល្លឺម៉ង់ នៅ Salzgitter ដោយប្ដូររោងចក្រផលិតម៉ាស៊ីន ទៅជារោងចក្រផលិតអាគុយឡានអគ្គិសនីដូច Toyota ដែរ រីឯ ក្រុមហ៊ុន GM វិញក៏កំពុងតែចាប់ដៃសហការគ្នាជាមួយក្រុមហ៊ុន LG អភិវឌ្ឍអាគុយឡានអគ្គិសនី Ultuim Cell LLC សម្រាប់ឡានអគ្គិសនីរបស់ខ្លួនផ្ទាល់ផងដែរ។ 

អត្ថបទ៖ Andra