សម្រាប់អ្នកដែលរអ៊ូថាឡានអគ្គិសនីស្ងាត់ពេក ចូលចិត្តបើកឡានលេខដៃ និងចូលចិត្តស្ដាប់សម្លេងម៉ាស៊ីនឡាន ពេលនេះ Toyota ដាក់គម្រោងធ្វើឡានអគ្គិសនី បែប performance ប្រើចង្កេះលេខដៃ មានសម្លេងម៉ាស៊ីន គ្រោងចេញនៅឆ្នាំ ២០២៦ នេះ។

យោងតាមប្រសាសន៍លើកឡើង ពីលោក​ Takero Kato ប្រធានផ្នែករថយន្ដអគ្គិសនីរបស់ Toyota កាលពីពេលថ្មីៗនេះ បានប្រកាសថា សម្រាប់គម្រោងនេះ ក្រុមហ៊ុននឹងនាំមកជូននូវរថយន្ដអគ្គិសនីដែលមានសមត្ថភាពធ្វើដំណើរបានរយៈចម្ងាយ ឆ្ងាយជាងមុន ជាមួយនឹងថ្ម បច្ចេកវិទ្យាថ្មី ដែល Toyota ទើបតែអភិវឌ្ឍន៍ និង គ្រោងនឹងដាក់ក្នុងរថយន្ដអគ្គិសនីជំនាន់ក្រោយៗរបស់ខ្លួន អាចអនុញ្ញាតឲ្យរថយន្ដរត់បានចម្ងាយដល់ទៅ ១០០០គម រាល់ពេលសាកពេញម្ដង ក្នុងនោះវាក៏នឹងប្រើប្រាស់ចង្កឹះលេខដៃ និងមានសម្លេងរោទិ៍ដូចឡានម៉ាស៊ីន ដែលកម្រិតសម្លេងអាចផ្លាស់ប្ដូរតាមការ ផ្លាស់ប្ដូរលេខដែរ និយាយរួមគឺធ្វើឲ្យអ្នកបើកបរឡានអគ្គិសនីនេះ មានអារម្មណ៍ថា ដូចជាបើកឡានសាំងម៉ាស៊ូតធម្មតា។ 

Toyota បានឲ្យដឹងថា ស្របពេលដែលតម្រូវការឡានអគ្គិសនីកំពុងកើនឡើងជាលំដាប់ មានអតិថិជនមួយចំនួនមិនសូវស៊ាំជាមួយនឹងការបើកបររថយន្ដអគ្គិសនីដោយសារតែវាដំណើរការខុសពីរថយន្ដម៉ាស៊ីនធម្មតា   បែបនេះហើយទើប Toyota រៀបគម្រោងនេះឡើង  ក្នុងគោលបំណង ចង់រក្សាបទពិសោធន៍ក្នុងការបើកបររថយន្ដ ICE (ឡានម៉ាស៊ីនចំហេះក្នុង/ឡានសាំង/ម៉ាស៊ូត) សម្រាប់អតិថិជន របស់ខ្លួនដែលស្រឡាញ់ចូលចិត្តការបើកបរពិតប្រាកដ។​ 

Toyota ក៏បានឲ្យដឹងដែរថា ក្រុមហ៊ុនមានគម្រោងលក់ឡានអគ្គិសនីរបស់ខ្លួន ១.៥ លានគ្រឿង សម្រាប់ឆ្នាំ ២០២៦ និង ៣.៥ លានគ្រឿង នៅឆ្នាំ ២០៣០។ គួរបញ្ជាក់ផងដែរថា បើតាមការឲ្យដឹងពី Road Track ថា មិនមែនមានតែ Toyota ទេ ដែលកំពុងតែមានគម្រោងមួយនេះ ក្រុមហ៊ុនផ្សេងៗដូចជា Hyundai ក៏កំពុងតែដកពិសោធន៍ដាក់បច្ចេកវិទ្យាស្រដៀងគ្នានេះ លើរថយន្ដអគ្គិសនីស្រឡាយ Ioniq របស់ខ្លួន រីឯក្រុមហ៊ុនរថយន្ដ muscle car ល្បីដូចជា Dodge ក៏កំពុងសិក្សារៀបចំ concept នេះ លើឡាន Daytona SRT របស់ខ្លួនផងដែរ។ 

ប្រភព៖ Road Track 

អត្ថបទ៖ Andra 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!