ថ្មីៗនេះតាមការចុះផ្សាយពី Carscoops បានឲ្យដឹងថា ក្រុមហ៊ុនផលិតរថយន្ដយក្សជប៉ុន Toyota បានប្រកាសថានឹងឈប់បន្ដការផលិតរថយន្ដពេញនិយម Camry របស់ខ្លួន នៅក្នុងទីផ្សារជប៉ុន ហើយ​បន្ទាប់ពីឈរជើងអស់រយៈពេល ៤៣ ឆ្នាំ។ 

Toyota បានឲ្យដឹងថា ចាប់តាំងពីបង្ហាញមុខមក Toyota Camry Sedan ទ្វារបួន នេះ បានសម្រេចការលក់ចេញបាន ជាង ២១ លានគ្រឿងជុំវិញពិភពលោក ដែលក្នុងនោះ ១.៣ លានគ្រឿង ជាទិន្នន័យដែលលក់បានក្នុងស្រុក (ជប៉ុន) តែ ក្នុងរយៈពេលប៉ុន្មានឆ្នាំចុងក្រោយនេះ ប្រជាប្រិយភាពរថយន្ដ sedan ធុនកណ្ដាលនេះ ស្រុតចុះ ជាក់ស្ដែងនៅបំណាច់ឆ្នាំ ២០២២ នេះ Toyota Camry Sedan លក់បានតែ ៦០០០ គ្រឿង ប៉ុណ្ណោះ ក្នុងទីផ្សារជប៉ុន ដែលនេះជាមូលហេតុបណ្ដាលឲ្យ Toyota សម្រេចឈប់ផលិត Camry ប្រភេទ sedan នៅជប៉ុននេះ តែម្ដង ដោយផ្ដោតលើការផលិតរថយន្ដបែប Crossover និង SUV ដែលកំពុងពេញនិយមវិញ។ 

សូមជម្រាបជូនថា ការបញ្ឈប់ការលក់នេះ គឺធ្វើឡើងតែនៅជប៉ុន ប៉ុណ្ណោះ ចំណែកឯ រថយន្ដ Toyota Camry ដែលនៅក្រៅប្រទេស នឹងបន្ដដំណើរការផលិត លក់ និងចេញសេរីថ្មីជាធម្មតា ជាក់ស្ដែង ដូចជានៅសហរដ្ឋអាមេរិក រថយន្ដ Toyota Camry នៅតែមានប្រជាប្រិយភាព ជាប់ឈ្មោះជារថយន្ដលក់ដាច់ជាងគេដល់ទៅ ១៥ ឆ្នាំ ជាប់ៗគ្នា។ 

លើសពីនេះ កាលពីបំណាច់ឆ្នាំមុន រថយន្ដ Camry លក់បានដល់ទៅ ៦០០ ០០០ គ្រឿងឯណោះ ទូទាំងពិភពលោក ជាពិសេសនៅតែជារថយន្ដពេញនិយមប្រចាំតំបន់អាស៊ីអាគ្នេយ៍ផងដែរ។ 

ប្រភព៖ Carscoops

អត្ថបទ៖ Andra