បន្ទាប់ពីបណ្ដាក់ទុនសាងសង់រោងចក្រផ្គុំ និងដំឡើងរថយន្ដនៅកម្ពុជា Toyota ស្នើសុំឲ្យក្រសួងសាធារណការ និងដឹកជញ្ជូន ព្រមជាមួយនឹងក្រសួងសេដ្ឋកិច្ច និងហិរញ្ញវត្ថុកម្ពុជា ពិភាក្សាកាត់បន្ថយពន្ធនាំចូលរថយន្ដ Hybrid ដើម្បីលើកកម្ពស់ការប្រើប្រាស់នៅកម្ពុជា។ 

ក្រោមកិច្ចពិក្សាការងាររវាងតំណាងក្រុមហ៊ុន Toyota និងឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន កាលពីពេលថ្មីៗនេះ ខាងក្រុមហ៊ុន Toyota បានជម្រាបជូនជាសំណើរដល់ក្រសួងឲ្យពិនិត្យលទ្ធភាព សហការជាមួយក្រសួង សេដ្ឋកិច្ច និងហិរញ្ញវត្ថុ លើការបន្ធូរបន្ថយពន្ធនាំចូលរថយន្ដ Hybrid មកកម្ពុជា ក្នុងគោលបំណង ចូលរួមចំណែក កាត់បន្ថយការប្រើប្រាស់ប្រេងឥន្ធនៈលើយានយន្ដ ដែលជាប្រភពបំភាយឧស្ម័នពុលចូលទៅក្នុងបរិយាកាស ព្រមទាំងដើម្បីចូលរួមចំណែកជួយកម្ពុជា ឲ្យឆាប់បានសម្រេច បាននូវគោលដៅអព្យាក្រឹតកាបូន ឬកាត់បន្ថយឧស្ម័នពុលកាបូនិច (Carbon Neutrality) ដែលបានកំណត់នៅឆ្នាំ ២០៥០ ផងដែរ។​

ជាការឆ្លើយតបនឹងសំណើររបស់ក្រុមហ៊ុន Toyota ឯកឧត្តមទេសរដ្ឋមន្ដ្រីបាន លើកឡើងថា ក្រសួងគាំទ្រ និងកោតសរសើរលើការយកចិត្តទុកដាក់ពីក្រុមហ៊ុនលើការកាត់បន្ថយការបំពុលបរិយាកាសនេះ​ ព្រមទាំងបានបញ្ជាក់ផងដែរថា ការស្នើសុំនេះ អាចប្រព្រឹត្តទៅបានលុះត្រាតែមានការពិភាក្សាជាមួយក្រសួងសេដ្ឋកិច្ច និងហិរញ្ញវត្ថុជាមុនសិន ។ 

គួរបញ្ចាក់ផងដែរថា កាលពីពេលថ្មីៗនេះ ក្រុមហ៊ុន Toyota (Toyota Tsusho Manufacturing (Cambodia) Co., Ltd) ក៏ទើបតែបានបណ្ដាក់ទុនវិនិយោគតម្លៃជិត ៣៧ លានដុល្លារ ដាក់ទីតាំងសាងសង់រោងចក្រ ផ្គុំ និងដំឡើងរថយន្ដ នៅកម្ពុជា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ ជាមួយនឹងលទ្ធភាពស្រូបយកកម្លាំងពលកម្មបាន ១៥០ នាក់ផងដែរ។ 

អត្ថបទ៖ Andra