ថ្មីៗនេះ ក្រុមហ៊ុនផលិតរថយន្ដអគ្គិសនីវៀតណាម VinFast បានសម្រេចកាត់ខ្សែបូចាប់ផ្ដើមការសាងសង់រោងចក្រផលិត និងផ្គុំ រថយន្ដអគ្គិសនីថ្មីនៅសហរដ្ឋអាមេរិក ដែលមានតម្លៃជាង ៤ ពាន់លានដុល្លារ ដើម្បីពង្រីកទីផ្សាររបស់ខ្លួន។ 

តាមការឲ្យដឹងពី AP News ថា រោងចក្រពាន់លានរបស់ VinFast នេះ ត្រូវបានសាងសង់ឡើងនៅ សហរដ្ឋអាមេរិក ក្នុងរដ្ឋ Carolina (ភាគខាងជើង) ដែលអាចផ្ដល់ការងារ ៧៥០០ កន្លែង និងគ្រោងបើកដំណើរការផលិត និងផ្គុំនៅឆ្នាំ ២០២៥​ នេះ ជាមួយការព្យាករណ៍ថាអាចផលិតបានរថយន្ដអគ្គិសនីចំនួន ១៥០ ០០០ គ្រឿង។ 

តាមប្រសាសន៍លោក Roy Cooper អភិបាល​រដ្ឋ Carolina នេះបានឲ្យដឹងថា ការបណ្ដាក់ទុននេះបានធ្វើឲ្យ VinFast ក្លាយជាក្រុមហ៊ុន ផលិតរថយន្ដអគ្គិសនីទី ១ ដែលដាក់ការវិនិយោគទុន ធ្វើរោងចក្រផលិត និងផ្គុំរថយន្ដខ្នាតធំក្នុងតំបន់នេះ ដោយបើកឱកាសការងាររាប់ពាន់កន្លែងដល់ប្រជាពលរដ្ឋ និងជាឱកាសសម្រាប់ក្រុមហ៊ុនពង្រីកទីផ្សារ​លក់ របស់ខ្លួនផងដែរ ដោយសារ Carolina ជារដ្ឋមានប្រជាជនរស់នៅច្រើនលំដាប់ទី ៩ របស់អាមេរិក។ 

បន្ថែមពីនេះ រដ្ឋាភិបាលតំបន់ Chatham County (ទីតាំងដែលរោងចក្រនេះសាងសង់ក្នុងរដ្ឋ Carolina) បានសម្រេចថានឹងផ្ដល់ថវិកាឧបត្ថម្ភ ១.២៥ ពាន់លានដុល្លារបន្ថែម ដល់ VinFast សម្រាប់ការដាក់វិនិយោគទុននេះផងដែរ ក្នុងករណីក្រុមហ៊ុនសម្រេចការរើសបុគ្គលិកឲ្យចូលធ្វើការបានត្រឹមចំនួនកំណត់។

គួររំឭកថា តាំងពីចាប់ផ្ដើមក្នុងឆ្នាំ ២០១៧ មក ប៉ុន្មានឆ្នាំចុងក្រោយដែល VinFast ប្រឡូកក្នុងវិស័យឡានអគ្គិសនី ឃើញថា ក្រុមហ៊ុនបានពង្រីកម៉ាកសញ្ញារបស់ខ្លួនយ៉ាងគួរឲ្យកត់សម្គាល់ ដែលសុះសាយការលក់រថយន្ដអគ្គិសនី SUV ម៉ូដែល VF8 និង VF9 ក្នុងទីផ្សារអាមេរិក ដែលទទួលការគាំទ្រកម្មង់ទិញរាប់ពាន់គ្រឿង ជាពន្លឺមួយសម្រាប់ VinFast ក្នុងការពង្រីកទីផ្សាររបស់ខ្លួនទៅកាន់តំបន់អឺរ៉ុប និងប្រទេសផ្សេងៗ​ទៀតនៅអាស៊ី ដែលមានតម្រូវការឡានអគ្គិសនីខ្ពស់ និងជាជំហានមួយអាចឈានទៅប្រកួតប្រជែងជាមួយក្រុមហ៊ុនអគ្គិសនីធំៗផងដែរ។ 

ប្រភព៖ AP News 

អត្ថបទ​៖ Andra 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto