ល្បីៗថាលក់ដាច់ ថ្មីៗនេះ VinFast ប្រកាសថា ខាតបង់ទឹកប្រាក់ជាង ២ ពាន់លានដុល្លារ ក្នុងរបាយការណ៍ឆ្នាំ ២០២៣ របស់ខ្លួន ដោយសារទិន្នផលនៃការ​លក់ឡានអគ្គិសនីតិចជាងចំនួនដែលបានគ្រោងទុក។ 

បន្ទាប់ពីចាយលុយរាប់ពាន់លានដុល្លារបណ្ដាក់ទុនធ្វើរោងចក្រផ្គុំ​ និងដំឡើងឡានអគ្គិសនី ក្នុងទឹកដីអាមេរិក កាលពីដើមឆ្នាំ ២០២៣ នេះ ជាមួយនឹងការរំពឹងទុកខ្ពស់ក្នុងការចាប់ទីផ្សារឡានអគ្គិសនីឲ្យបានច្រើន ដើម្បីប្រកួតប្រជែងជាមួយក្រុមហ៊ុនផលិតរថយន្ដអគ្គិសនី ដែលកំពុងពេញនិយមដូចជា Tesla និង BYD, VinFast បានកំណត់គោលដៅលក់រថយន្ដអគ្គិសនីរបស់ខ្លួនឲ្យបាន ៥០ ០០០ គ្រឿងក្នុងមួយឆ្នាំ ក៏ប៉ុន្ដែទិន្នន័យចំនួនលក់ជាក់ស្ដែង សម្រាប់ឆ្នាំ ២០២៣​ នេះ បានបង្ហាញថា VinFast លក់ឡានអគ្គិសនីបានតែ ៣៤ ៨៥៥ គ្រឿងប៉ុណ្ណោះ ដែលធ្វើឲ្យក្រុមហ៊ុន ខាតបង់ទឹកប្រាក់ ២.៣៩ ពាន់លានដុល្លារ។ 

ទោះជាយ៉ាងណាក៏ដោយ នៅក្នុងរបាយការណ៍នេះ បានបង្ហាញថា ទោះបីជាការលក់មិនបានតាមការព្រាងទុក តែទិន្នន័យឆ្នាំ ២០២៣ នេះ កើនឡើង ១.០៩ ពាន់លានដុល្លារ បើប្រៀបធៀបនឹងទិន្នន័យកាលពីឆ្នាំ ២០២២ បន្ថែមពីនេះ ទិន្នផលការលក់សម្រាប់ត្រីមាសទី ៤ (ចន្លោះខែ តុលា ទៅ ខែធ្នូ ២០២៣) កើនឡើង ២៦% គិតជាទឹកប្រាក់ ៤៣៦ លានដុល្លារ ធៀបទៅនឹងត្រីមាសទី ៣។  

យោងតាមការឲ្យដឹងពីលោកប្រធានផ្នែកហិរញ្ញវត្ថុរបស់ VinFast ថា ដោយសារតែទិន្នផលការលក់ទើបតែស្ទុះឡើងនៅចុងឆ្នាំ ២០២៣ នេះ ក្រុមហ៊ុននឹងខិតខំពង្រឹងលើគុណភាព និង តម្លៃនៃរថយន្ដអគ្គិសនីរបស់ខ្លួនឲ្យប្រសើរជាង​មុន ជាពិសេស​គឺផ្ដោតទៅលើការដាក់ទុនពង្រាយទីផ្សារឲ្យបានសុះសាយទៅបណ្ដាប្រទេសដែលមានតម្រូវការឡានអគ្គិសនីខ្ពស់ដូចជា អាមេរិក កាណាដា និងអឺរ៉ុប ព្រមទាំងបណ្ដាប្រទេសដែលមានប្រជាជនច្រ់ើនក្នុងតំបន់អាស៊ីផងដែរ ដោយបានបង្ហើប គម្រោងដាក់រោងចក្រឡានអគ្គិសនីរបស់ខ្លួននៅភាគខាងត្បូងឥណ្ឌាក្នុងឆ្នាំនេះ និងបន្ដបណ្ដាក់ទុន ១.២ពាន់លានដុល្លារទៀត ទៅឥណ្ឌូនេស៊ី និងហ្វីលីពីន។ 

អត្ថបទ៖ Andra 

ប្រភព៖ The Jakarta Post 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!