ក្រុមហ៊ុនឡានស៊ុយអែតល្បីឈ្មោះ Volvo ប្រកាសថាក្រុមហ៊ុននឹងមិនបន្ដផលិតឡានដើរដោយចំហេះប្រេងឥទ្ធនៈ ដូចជាសាំង និងម៉ាស៊ូត ចាប់ពីឆ្នាំ ២០២៤ នេះតទៅ ដោយបង្វែរការផ្ដោតមកផលិតឡានអគ្គិសនីសុទ្ធវិញ។ 

ដោយសារតម្រូវការរថយន្ដអគ្គិសនីមានការកើនឡើងជាលំដាប់ ស្របពេលក្រុមហ៊ុនផលិតឡានធំៗ ក៏កំពុងរៀបចំយុទ្ធសាស្រ្ដកែប្រែទៅផលិតឡានអគ្គិសនីឲ្យបានច្រើន ជាពិសេសបណ្ដាប្រទេសនៅអឺរ៉ុប ក៏បានដាក់គោលការណ៍ អនុញ្ញាតឲ្យប្រើប្រាស់តែឡាន ZEV (អគ្គិសនី អ៊ីដ្រូសែន..) ត្រឹមឆ្នាំ ២០៣៥ បូកជាមួយផែនការ លុបបំបាត់ការបំពុលបរិយាកាសឆ្នាំ ២០៥០ ផងនោះ ក្រុមហ៊ុន Volvo ក៏ដូចជាក្រុមហ៊ុនដទៃទៀតដែរ បានចាប់ផ្ដើមរៀបចំផែនការផលិតឡានអគ្គិសនីសុទ្ធ ឲ្យបានឆាប់តាមតែអាចធ្វើទៅបាន ដើម្បីចាប់ទីផ្សារឲ្យបានមុនគេផងដែរ។

តាមការចុះផ្សាយពី Reuters បានឲ្យដឹងថា កាលពីឆ្នាំ ២០១៩ រថយន្ដភាគច្រើនដែល Volvo លក់ចេញបាន ជាប្រភេទប្រើប្រាស់ឥទ្ធនៈ តែនៅឆ្នាំ​ ២០២២ ឡានប្រភេទនេះលក់ចេញបានតែ ៨.៩% នៃទិន្នន័យការលក់សរុបរបស់ខ្លួនតែប៉ុណ្ណោះ រហូតមកដល់ខែសីហា ឆ្នាំ ២០២៣ នេះ ៣៣% នៃការលក់ចេញសរុបជារថយន្ដ Hybrid និងអគ្គិសនី ម្យ៉ាងវិញទៀត ទិន្នន័យការប្រើប្រាស់ឡានឥន្ធនៈនៅអឺរ៉ុប ដែលជាទីផ្សារធំរបស់ Volvo ធ្លាក់ចុះមកនៅត្រឹម ១៤% ប៉ុណ្ណោះនៅខែ កក្កដា ឆ្នាំនេះ ដូច្នេះហើយការបង្វែរទិសដៅផ្ដោតការផលិតឡានអគ្គិសនីនេះជាជំហានល្អមួយសម្រាប់ Volvo។ 

Volvo បានបញ្ជាក់ថា រថយន្ដប្រើឥទ្ធនៈ សាំង និង​ម៉ាស៊ូត នឹងនៅបន្ដផលិតនៅកំឡុងពេលប៉ុន្មានខែចុងក្រោយឆ្នាំនេះ ហើយនឹងបញ្ឈប់ការផលិតនៅដើមឆ្នាំ ២០២៤ ក្នុងនោះឡានឥទ្ធនៈទាំងនេះនឹងលក់លាងចេញរហូតដល់ឆ្នាំ ២០៣០ គឺក្រុមហ៊ុនសម្រេចគោលការណ៍ផលិត និងលក់តែឡានអគ្គិសនីសុទ្ធតែម្ដង។   

គួរបញ្ជាក់ផងដែរ ដោយសារតែភាគហ៊ុនភាគច្រើននៃ Volvo ជាចំណែករបស់ក្រុមហ៊ុនផលិតរថយន្ដល្បីឈ្មោះចិន Geely ហេតុនេះហើយ ក្រៅពីពង្រាយទីផ្សារនៅអឺរ៉ុប ក្រុមហ៊ុនក៏នឹងពង្រីកទីផ្សារបន្ថែមទៀតមកកាន់តំបន់ផ្សេងៗ ដែលមានតម្រូវការឡានអគ្គិសនីកំពុងកើនឡើងដូចជា អាស៊ី ផងដែរ។

ប្រភព៖ Reuters 

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!