ក្រោយ Tesla ទម្លាក់ថ្លៃ Model 3 និង Model Y ក្នុងទីផ្សារចិន ជាង ៧០០០ ដុល្លារ កាលពីខែមុន បូករួមនឹង Toyota ទម្លាក់តម្លៃ bZ4X អគ្កិសនីរបស់ខ្លួន ប្រមាណ ៤៣០០ ដុល្លារ ដើម្បីដេញទីផ្សារនៅចិន ក្ដៅៗ កាលពីពេលថ្មីៗនេះ ក្រុមហ៊ុនផលិតរថយន្ដអគ្គិសនី ល្បីឈ្មោះរបស់ចិនផ្ទាល់ Xpeng មិននៅរង់ចាំយូរ ក៏បានលែងយុទ្ធសាស្រ្ដបញ្ចុះតម្លៃដូចគ្នា ដោយឡានមួយគ្រឿងប្រកាស Discount កន្លះមុឺនដុល្លារ។ 

តាមការចុះផ្សាយពី electrek ថា ក្នុងរយៈពេលប៉ុន្មានខែ ថ្មិៗកន្លងមកនេះ ទីផ្សាររថយន្ដអគ្គិសនី នៅប្រទេសចិន កំពុងស្ថិតក្នុង ការប្រកួតប្រជែងខ្លាំង ដែលក្រុមហ៊ុនល្បីៗ ដូចជា Tesla, Toyota, និងក្រុមហ៊ុនចិន ផ្ទាល់ដូចជា BYD, Nio, Geely ជាដើម កំពុងស្វះស្វែង រិះរកវិធីលក់ឡានរបស់ខ្លួនឲ្យបានច្រើន និងនៅតែចំណេញច្រើន តាមតែអាចធ្វើទៅបាន មានទាំងយុទ្ធសាស្រ្ដកាត់បន្ថយការចំណាយលើវត្ថុធាតុដើម ការរចនារូបរាងសាមញ្ញ​មិនត្រូវការចំណាយគ្រឿងច្រើន ជាដើម។

តែយុទ្ធសាស្រ្ដដែលកំពុងពេញនិយម គឺបញ្ចុះតម្លៃ ដេញគ្នា ហើយ ក្រោយ Tesla និង Toyota ប្រកាសចុះថ្លៃ ក្រុមហ៊ុន Xpeng ក៏បានប្រកាសចុះតម្លៃរថយន្ដអគ្គិសនីរបស់ខ្លួនចាប់ពី  ១៣% ឬ ៥៣០០ ដុល្លារ ឡើងទៅ ក្នុងមួយគ្រឿង ជាពិសេសសម្រាប់ម៉ូដែលពេញនិយមរបស់ខ្លួន ដូចជា Xpeng P7 sedan EV នៅសល់ខ្ទង់ ៣១០០០ ដុល្លារ P5 sedan នៅខ្ទង់ ២៣ ១៨០ ដុល្លារ​ និង G3i SUV នៅតម្លៃខ្ទង់ ២២០០០ ដុល្លារ​។  

ស្របពេលជាមួយគ្នានេះដែរ ក្រុមហ៊ុន បានបន្ថែមថា ការបញ្ជុះតម្លៃនេះ គឺមិនមែនធ្វើឡើងសម្រាប់តែ ការប្រកួតប្រជែងទីផ្សារនោះទេ តែ Xpeng មានបំណង ផ្ដល់ជូននូវរថយន្ដអគ្គិសនីដែលមានតម្លៃសមល្មមដែល អតិជនមកពីគ្រប់ទីកន្លែង អាចមានលទ្ធភាពទិញប្រើប្រាស់បានគ្រប់ៗគ្នា ព្រមទាំងដើម្បីតាមដាន លើបទពិសោធន៍ប្រើប្រាស់ សម្រាប់យកមកអភិវឌ្ឍរថយន្ដអគ្គិសនីម៉ូដែលក្រោយៗទៀត របស់ខ្លួន ឲ្យប្រសើរជាងមុនផងដែរ។ 

ប្រភព៖ ​Electrek 

អត្ថបទ៖ Andra