កាលពីថ្ងៃទី ១៨ ខែ ឧសភា កន្លងទៅថ្មីៗនេះ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងលោក Zhou Yong តំណាងក្រុមហ៊ុនសាជីវកម្មថ្នល់ និងស្ពានចិន (CRBC) បានសម្រេចការចុះហត្ថលេខាលើកិច្ចសន្យាភាពជាដៃគូ រវាងរដ្ឋ និងឯកជន (Public Private Partnership: PPP)​ នៃគម្រោងហេដ្ឋារចនាសម្ព័ន្ធផ្លូវល្បឿនលឿន តភ្ជាប់ពីរាជធានីភ្នំពេញ ទៅ បាវិត ដែលនឹងបើកការដ្ឋានសាងសង់នៅថ្ងៃទី ៧ មិថុនា ២០២៣ នេះ ខណៈផ្លូវល្បឿនលឿនខ្សែទីបី ភ្នំពេញ-សៀមរាប គ្រោងបញ្ចប់ការសិក្សាសមិទ្ធិលទ្ធភាពនៅបំណាច់ខែ ឧសភា និងចុះ MoU ក្នុងពេលឆាប់ៗ។ 

នៅក្នុងកិច្ចសន្យានេះត្រូវបានចែកចេញជាពីរផ្នែក ទី១ ចែងអំពីគោលការណ៍រួមសំខាន់ៗសម្រាប់អនុវត្តការសាងសង់ និងដាក់ឱ្យប្រតិបត្តិការផ្លូវល្បឿនលឿនភ្នំពេញ-បាវិត និង ទី២ ឯកសារឧបសម្ព័ន្ធពាក់ព័ន្ធដែលមានចែងលម្អិត​ អំពីការអនុវត្តគោលការណ៍ ដែលបានឯកភាពគ្នាជាគោលការណ៍នៅក្នុងកិច្ចសន្យា។ 

សូមជម្រាបថា ក្រោមកិច្ចសន្យា PPP ផ្លូវល្បឿនលឿនភ្នំពេញ-ក្រុងបាវិត នេះ មានប្រវែង ១៣៥,១០ គីឡូម៉ែត្រ សាងសង់ជា ០៤ គន្លង ឆ្លងកាត់ខេត្តកណ្តាល ខេត្តព្រៃវែង និងខេត្តស្វាយរៀង ជាមួយទុនវិនិយោគប្រមាណ ១,៣៥ ពាន់លានដុល្លារ និងរយៈពេលសាងសង់ ០៤ឆ្នាំ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ (Build-Operate-Transfer:BOT) ដូចគ្នានឹងគម្រោងផ្លូវល្បឿនលឿនភ្នំពេញ-ព្រះសីហនុដែរ ដោយក្រុមហ៊ុននឹងធ្វើប្រត្តិបត្តិការរយៈពេល ៥០ឆ្នាំ មុនពេលផ្ទេរជូនរាជរដ្ឋាភិបាល។

រីឯហិរញ្ញប្បទានសាងសង់ស្ពានឆ្លងកាត់ទន្លេមេគង្គ នឹងត្រូវប្រើប្រាស់ប្រភពពីថវិកាជាតិ ដែលនឹងសម្រេចរួចរាល់មុន ឬដំណាលគ្នានឹងផ្លូវល្បឿនលឿន នឹងត្រូវតភ្ជាប់ជាមួយផ្លូវល្បឿនលឿនហូជីមិញ-ម៉ុកបៃ របស់ប្រទេសវៀតណាមផងដែរ។ 

ប្រភព៖ ក្រសួងសាធារណការ និងដឹកជញ្ចូន

អត្ថបទ៖ Andra