ថ្មីៗនេះ រដ្ឋបាលសុវត្ថិភាពចរាចរណ៍ផ្លូវជាតិអាមេរិក​ បានចេញការកោះហៅរថយន្ដសេរីថ្មីរបស់ក្រុមហ៊ុនធំៗដូចជា Toyota,Kia, និង Land Rover សរុបជាង ២៤៧ ០០០ គ្រឿង ឲ្យក្រុមហ៊ុនត្រួតពិនិត្យវិញដោយសារមានបញ្ហា error ប្រព័ន្ធបញ្ជា ក្នុងរថយន្ដ និងក្រៅរថយន្ដ ដែលអាចប៉ះពាល់សុវត្ថិភាពអ្នកធ្វើដំណើរ។ 

យោងលើទិន្នន័យឲ្យដឹងពី USA Today ស្រង់ពី រដ្ឋបាលសុវត្ថិភាពចរាចរណ៍ផ្លូវជាតិអាមេរិកថា ក្នុងចំណោមរថយន្ដទាំង​ ២៤​ មុឺនគ្រឿងជាងនេះ រថយន្ដម៉ាក Kia Sportage SUV សេរីឆ្នាំ ២០២៣ ចំនួន ៩៨ ៩៤៤ គ្រឿង ត្រូវប្រមូលមកវិញ ដោយបញ្ហាប្រព័ន្ធហ្រ្វាំងដែលមានលេចជ្រាបប្រេង​ និងដំណើរការខុសប្រក្រតី នាំឲ្យអត្រានៃការគ្រោះថ្នាក់កើនឡើង ព្រោះហ្វ្រាំងមិនស៊ី ដោយក្រុមហ៊ុននឹងផ្ញើសារជូនដល់ម្ចាស់ឡានដែលមានបញ្ហារង្វង់ថ្ងៃទី ២១​ ខែក្រោយ​ (កក្កដា) នេះ ហើយសម្រាប់ការជួសជុលផ្សេងៗ នឹងមិនត្រូវបានគិតកម្រៃឡើយ។ 

សម្រាប់​ Toyota វិញ គឺទាក់ទងជាមួយបញ្ហាពោងសុវត្ថិភាពខាងមុខ លើរថយន្ដម៉ូដែលពេញនិយមរបស់ខ្លួន Corolla Cross Hybrid SUV ផលិតឆ្នាំ ២០២២​ និង ២០២៣ ចំនួនសរុបជាង ៩៦០០០ គ្រឿង ដែលរៀបចំមិនបានត្រូវរបត់ក្បួនខ្នាត ដែលអាចបណ្ដាលឲ្យវាដំណើរការខុសពេល និងស្ថានភាព ធ្វើឲ្យប៉ះពាល់សុវត្ថិភាពអ្នកប្រើប្រាស់។ 

រីឯ Land Rover វិញ ប្រកាសប្រមូលរថយន្ដម៉ាក Land Rover Range Rover សេរីឆ្នាំ ២០២២-២០២៣ ចំនួន ១៣០០០ គ្រឿង មកពិនិត្យលើបញ្ហា កន្សោមប្រព័ន្ធបំភ្លឺចង្កៀងក្រោយមិនដំណើរការ ដែលបណ្ដាលឲ្យវាមានបញ្ហា ពេលត្រូវការបើកភ្លើងស៊ីញ៉ូ, ភ្លើងហ្រ្វាំងផ្សេងៗ ដែលបង្កគ្រោះថ្នាក់។ ក្នុងនោះ Land Rover Discovery ឆ្នាំ ២០១៧-២០២០ ចំនួន ២៩ ៦០០ ក៏ត្រូវហៅមកវិញដែរ ដើម្បីពិនិត្យមើលបញ្ហាប្រព័ន្ធទ្វារ ដែលអាចបើកស្វ័យប្រវត្តិ ដោយចៃដន្យពេលឡានកំពុងបើកបរ។ ក្រុមហ៊ុននឹងជូនដំណឹងដល់ម្ចាស់រថយន្ដដែលមានបញ្ហា តាម email នៅរង្វង់ថ្ងៃ ២៨ ខែក្រោយ (កក្កដា) នេះ ដោយមិនគិតថ្លៃសេវាកម្មត្រួតពិនិត្យទេ។  

ក្រៅពីនេះ ក៏មានក្រុមហ៊ុនផ្សេងៗទៀតក៏បានប្រកាសប្រមូលរថយន្ដមកត្រួតពិនិត្យឡើងវិញផងដែរ ដូចជា រថយន្ដអគ្គិសនី sedan របស់ Mercedes Benz ចំនួន ៨២៨១ គ្រឿង លើបញ្ហា error ប្រព័ន្ធ software, Bentley Bentayga ១០០៨ គ្រឿង លើបញ្ហាកៅអី ជាប់ lock ផងដែរ។ 

ប្រភព៖ USA Today 

អត្ថបទ៖ Andra 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!