បន្ទាប់ពីបានប្រកាសថានឹងប្រឡូកក្នុងវិស័យយានយន្ដ និងបានសម្រេចចេញម៉ូដែលឡានអគ្គិសនីដំបូងរបស់ខ្លួន​ Xiaomi SU7 ថ្មីៗនេះ Xiaomi បានបន្ដបញ្ចេញរថយន្ដអគ្គិសនីខ្នាតតូច ផ្គាប់ចិត្តអតិថិជនដែលស្វែងរកឡានអគ្គិសនីដែលមានតម្លៃសមរម្យ និងសមត្ថភាពខ្ពស់។ 

កូនឡានអគ្គិសនីតូចច្រឡឹងនេះមានឈ្មោះថា FAW Bestune Xiaoma ស្ថិតនៅក្នុងគម្រោង FAW (China’s First Auto Work) របស់ Xiaomi ផ្ដោតលើការផលិតរថយន្ដអគ្គិសនីខ្នាតតូច ដែលគេរំពឹងថា វត្ថមានរបស់វា នឹង​ក្លាយជាគូប្រកួតប្រជែងយ៉ាងស្វិតស្វាញរបស់ Wuling Hongguang Mini EV ដែលជារថយន្ដអគ្គិសនីខ្នាតតូចដែលកំពុងតែពេញនិយមនាពេលបច្ចុប្បន្ន។ 

Bestune Xiaoma នេះ ទើបតែត្រូវបាន Xiaomi យកមកបង្ហាញខ្លួនក្នុងកម្មវិធីសន្និសិទរថយន្ដនៅប៉េកាំង កាលពីពេលថ្មីៗនេះ ដោយមានទាំងប្រភេទមានដំបូល និងប្រភេទ convertable រចនាឡើងប្រើប្រាស់ flatform Xiaoma FME ជាមួយបណ្ដោយ ៣ម ទទឹង ១.៥១ម និងកម្ពស់ ១.៦៣ រត់ដោយអគ្គិសនីសុទ្ធ ប្រើថ្ម lithium-iron phosphate (LFP) និងម៉ូទ័រអគ្គិសនីថាមពល 20 kW ដោយក្នុងនោះ សម្រាប់ Xiaoma ប្រភេទស្ដង់ដារ រត់បាន ៨០០គម រាល់ពេលសាកពេញម្ដង និងប្រភេទ long range អាចរត់បានដល់ទៅ ១២០០គម។

ខាងក្នុងមានបំពាក់អេក្រង់កម្សាន្ដទំហំ ៧ អិញ មាន LCD instrument panel, កាមេរ៉ាមុខក្រោយ ដែលមានមុខងារថតវីដេអូបាន ព្រមជាមួយនឹងការរចនា dashborad, កៅអីអង្គុយផ្សេងៗប្រើប្រាស់សម្ភារៈប្រណិត មានផាសុខភាពងាយស្រួលក្នុងជិះ និងការបើកបរ។ 

ចំពោះ Spec លម្អិត និងព័ត៌មានផ្សេងៗទៀត ក្រុមហ៊ុនមិនទាន់បង្ហើបឲ្យដឹងនោះទេ គ្រាន់តែបានឲ្យដឹងថា Bestune Xiaoma ត្រៀមនឹងចេញលក់លើទីផ្សារចិន​ ក្នុងពេលឆាប់ៗនេះ ក្នុងតម្លៃចាប់ផ្ដើមពី ៤ ២២៧ ដុល្លារ ទៅ ៧ ០៤៤ ដុល្លារ ជាមួយនឹងការរំពឹងទុកខ្ពស់ថា នឹងទទួលបានលទ្ធផលល្អក្នុងការលក់ និងក្លាយជាគូប្រកួតប្រជែងជាមួយនឹងកូនឡានអគ្គិសនី ដែលកំពុងតែមានប្រជាប្រិយភាពដូចជា Wuling Hongguang, Chery QQ Ice cream, Changan Lumin, និង SAIC Roewe Clever ផងដែរ។​

អត្ថបទ៖ Andra 

ប្រភព៖ Car News China 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!