ក្រោយពីពន្យារពេលចេញដោយសារបញ្ហាម្ដងហើយ ម្ដងទៀត Tesla Cybertruck ត្រៀមដឹកដល់ដៃអតិថិជនដំបូងបំណាច់ខែ កញ្ញានេះ ជាមួយនឹងរូបរាងប្លែកមិនច្រឡំគេ និងកម្លាំងខ្លាំងអាចទ្រទ្រង់ដឹកឥវ៉ាន់បានទម្ងន់ដល់ ៦ តោន។ 

តាមការឲ្យដឹងពី the Street ថា Cybertruck នេះជារថយន្ដអគ្គិសនីប្រភេទ pick up ដែលមហាសេដ្ឋីក្រុមហ៊ុន Tesla លោក​ Elon Musk បានយកមកណែនាំបង្ហាញតាំងពីឆ្នាំ ២០១៩ មកម្លេះ​ តែត្រូវបានពន្យារពេលចេញជាច្រើនសារដោយសារបញ្ហាបច្ចេកទេសមួយចំនួនដូចជា រឿងកញ្ចក់ប្រេះ ដែលនាំទៅរកការត្រួតពិនិត្យភាពធន់របស់វាឡើងវិញលើឡានទាំងមូល, update ប្រព័ន្ធ software, ថែមថយមុខងារក្នុងរថយន្ដ និងបញ្ហាធំជាងគេគឺ ការខ្វះខាតគ្រឿងបរិក្ខារ ដោយសារបិទខ្ទប់កូវីដ។

រហូតមកដល់ពេលនេះ Cybertruck ត្រូវបានគេប្រទះឃើញបើកតេស្ដសាកល្បងនៅតំបន់ Palo Alto រដ្ឋ កាលីហ្វញ៉ា, អាមេរិក​ ដែលស្ថិតនៅក្នុងដំណាក់កាលផលិតសម្រេច ជាមួយនឹងស្រោមពណ៌ប៉ារ៉ា បិទបាំងពណ៌ពិតរបស់វាមុននឹងចេញដល់ដៃអតិថិជន​។ 

សមត្ថភាពខ្លះៗរបស់វា បើតាម Tesla បានបង្ហាញថា ពេលសាកពេញម្ដងអាចរត់បានលើស ៨០៤​ គម និងជាន់បានពី ០ ទៅ ១០០ គម/ម៉ ប្រើពេល ៣ វិនាទី ជាមួយទម្ងន់ខ្លួន ១ តោន កន្លះ (១​៥៨៧គក) និងអាចអូសទាញឥវ៉ាន់បានដល់ទម្ងន់លើស ៦ តោន (៦៣៥០គក) តួឡានផលិតបែប Exoskeleton ប្រើដែកមាំ Ultra-Hard 30X Cold Rolled stainless steel និងកញ្ចក់តាន់ (Tesla Armor glass) និងខាងក្នុងមានកៅអី ៦ និងអេក្រង់កម្សាន្ដ touch screen ទំហំ ១៧ អិង ផ្គួបជាមួយបច្ចេកវិទ្យាដែលអាចតម្រូវបានតាមការពេញចិត្ត និងរបៀបប្រើប្រាស់របស់អតិថិជន។ 

លោក Musk បានឲ្យដឹងថា ក្រុមហ៊ុនមានគម្រោងផលិត Cybertruck version Alpha នៅក្នុងរោងចក្រយក្ស Gigafactory របស់ Tesla ក្នុងរដ្ឋ Texas (Giga Texas) សម្រាប់យកមកប្រកួតប្រជែង ជាមួយរថយន្ដអគ្គិសនី pick up ល្បីៗរបស់ក្រុមហ៊ុនផ្សេងៗទៀតដូចជា Ford F-150 Lightning, GMC Hummer EV, Rivian R1T, និង Chevrolet Silverado អគ្គិសនី កំពុងស្ថិតក្នុងការធ្វើគម្រូរបស់ General Motor (GM) ជាដើម។

លោកបានឲ្យដឹងដែរថា សម្រាប់ពេលវេលាចេញវិញ Cybertruck នឹងសម្រេចបញ្ចប់ ហើយដឹកដល់ដៃអតិថិជននៅត្រីមាសទី ៣ ឆ្នាំនេះ ដែលមានន័យថារង្វង់ខែ កញ្ញានេះ ជាមួយតម្លៃ តាមឲ្យដឹងពី Kelly Blue Book ថាអាចចាប់ផ្ដើមពី ៥០ ០០០ ដុល្លារឡើងទៅ។ 

ប្រភព៖ the Street 

អត្ថបទ៖ Andra 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!