ក្រុមហ៊ុនផលិតរថយន្ដអគ្គិសនីខ្នាតតូចរបស់អាមេរិក​ Eli Electric ទើបតែបានប្រកាសបញ្ចេញកូនរថយន្ដ អគ្គិសនីម៉ូដែលថ្មីរបស់ខ្លួនឈ្មោះថា Eli ZERO តម្លៃខ្ទង់ ១ មុឺនដុល្លារជាង រាងតូចច្រឡឹងងាយស្រួលបើក ក្នុងក្រុងដែលមានចរាចរណ៍ម៉ូតូឡានច្រើន  ជាមួយសមត្ថភាពសមរម្យសក្ដិសមសម្រាប់ការប្រើប្រាស់ប្រចាំថ្ងៃ ត្រៀមបង្ហាញមុខនៅលើទីផ្សារចុងឆ្នាំនេះ។ 

ជាមួយនឹងរាងតូចច្រឡឹងរបស់វា បណ្ដាយត្រឹមតែ ២.២៣ម ធ្វើឲ្យ Eli ZERO ងាយស្រួលសម្រាប់ការប្រើប្រាស់ប្រចាំថ្ងៃ ក្នុងក្រុងដែលមានសកម្មភាពចរាចរណ៍មមាញឹក កកស្ទះច្រើន និងងាយស្រួលមិនត្រូវការទីធ្លារចំណតធំ។

Eli ZERO ជាកូនឡានអគ្គិសនីសុទ្ធ ពីរកៅអី បំពាក់ថ្មលីចូមដែកផូស្វាត Lithium-iron phosphate battery ថាមពល ៨kWh ដែលអាចរត់បានចម្ងាយ ១០០ ទៅ ១៤៥ គម រាល់ពេលសាកពេញម្ដង និង ប្រើពេលពី ៣ ម៉ោងក្នុងការសាកមួយពេញជាមួយឆ្នាំងថាមពល ២៤០V AC ។ 

ផ្នែកខាងក្នុង ថ្វីត្បិតតែជាកូនឡានសម្រាប់ជិះធម្មតា វាមានបំពាក់បរិក្ខារប្រើប្រាស់ និងបច្ចេកវិទ្យាមួយកំប្លេរ មិនចាញ់រថយន្ដធម្មតានោះទេ ដូចជាម៉ាស៊ីនកម្ដៅ មាស៊ីនត្រជាក់, ប្រព័ន្ធចាក់សោបើកបិទទ្វារ និងបញ្ឆេះដោយមិនត្រូវការសោ, Anti lock brakes, electornic parking brakes, កាមេរ៉ាមើលក្រោយ, សេនស័រសម្រាប់ពេលចូលចត, ដំបូលបង្ហើបបាន, និងប្រព័ន្ធកម្សាន្ដពីអេក្រង់ឌីជេថលរបស់ Sony ដែលអ្នកប្រើប្រាស់អាចភ្ជាប់ជាមួយ CarPlay និង Andriod Auto បានផងដែរ។ 

Eli ZERO ស្ថិតក្នុងក្រុមរថយន្ដ Low-Speed Vehicle (LSVs) នៅអឺរ៉ុប និង Neighborhood Electric vehicle (NEVs) នៅអាមេរិក ដែលសម្រាប់ប្រើប្រាស់ក្នុងទីប្រជុំជន ដូច្នេះល្បឿនរបស់វាត្រូវបានកំណត់ ឲ្យជាន់បានលឿនបំផុត ៥៦គម/ម៉ និងមានស្ដង់ដារសុវត្ថិភាពស្របទៅតាមគោលការណ៍ របស់រដ្ឋបាលសុវត្ថិភាពចរាចរណ៍ផ្លូវគោកអាមេរិក​ (NHTSA) ផងដែរ។ 

Eli Electric បានឲ្យដឹងថា Eli ZERO នឹងនាំមកជូនជាមួយតម្លៃដើម ១១ ៩០០ ដុល្លារ ដែលអតិថិជនអាចកក់ ២០០ ដុល្លារ ទុកមុនបាន និងចូលមកដល់ទីផ្សារអាមេរិកនៅរង្វង់ត្រីមាសទី ៣ ឆ្នាំ ២០២៤ នេះ និងបន្ដផ្សារអឺរ៉ុប និងអាស៊ី នៅឆមាសបន្ទាប់។ 

អត្ថបទ៖ Andra 

ប្រភព៖ Electrek 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!