ថ្មីៗនេះ ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូន បានឲ្យដឹងថា ដំណើរការ ការសាងសង់ផ្លូវល្បឿនលឿន ភ្នំំពេញ-ព្រះសីហនុ បច្ចុប្បន្ននេះ សម្រេចបាន ៩៦.៦០% ដោយពេលនេះក្រសួងកំពុង​តែត្រួតពិនិត្យកែសម្រួលចំណុចមានបញ្ហា និងបង្ហើយការងារដែលនៅសេសសល់ ដើម្បីត្រៀមដាក់ឱ្យដំណើរការសាកល្បងនៅពេលឆាប់ៗនេះ ។

យោងទៅតាមខ្លឹមសារ នៃកិច្ចប្រជុំ​ត្រួតពិនិត្យលើចំណុចត្រូវធ្វើឱ្យប្រសើរឡើងវិញ និងការងារដែលនៅសេសសល់សម្រាប់ផ្លូវល្បឿននេះ នៅទីស្ដីការ ក្រសួងសាធារណការ កាលពីថ្ងៃទី០៦ ខែកញ្ញា ឆ្នាំ២០២២ ថ្មីៗនេះ ឯកឧត្តមទេសរដ្ឋមន្ដ្រី ក៏បានថ្លែងការកោតសរសើរ ដល់ក្រុមហ៊ុនសាជីវកម្មស្ពានថ្នល់ចិន (CRBC) ដែលបានអនុវត្តការងារសាងសង់ផ្លូវនេះ បានលឿនជាង ជាងពេលដែលបានគ្រោងទុកក្នុងកិច្ចសន្យា។ 

ក្នុងនោះដែរ ឯកឧត្តមកក៏បាន បន្ថែមទៀតថា ចំពោះទីតាំងសាងសង់បង្គោលអង់តែនទូរសព្ទសំខាន់ៗមួយចំនួន នៅតាមបណ្តោយផ្លូវល្បឿនលឿននេះ ក្រសួងប្រៃសណីយ៍ និងទូរគមនាគមន៍ នឹងជាអ្នកទទួលបន្ទុក ធ្វើការរៀបចំបំពាក់បង្គោលតាមនីតិវិធីរបស់ខ្លួន ជាមួយភាគីពាក់ព័ន្ធ។

គួររំឭកថា ផ្លូវល្បឿនលឿនភ្នំពេញ-ព្រះសីហនុ នេះ មានប្រវែងសរុប ១៨៧,០៥ គីឡូម៉ែត្រ តភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ចាប់បើកការដ្ឋានសាងសង់នៅថ្ងៃទី ២២ ខែមីនា ឆ្នាំ២០១៩ ដែលគិតមកដល់ថ្ងៃទី ២៦ ខែសីហា ឆ្នាំ២០២២ សម្រចបាន ៩៦,៦០%ហើយ។ ផ្លូវនេះ នឹងក្លាយជាផ្លូវល្បឿនលឿនដំបូងបំផុត នៅកម្ពុជា ដែលជួយកាត់បន្ថយពេលវេលាធ្វើដំណើរ ដោយចម្ងាយពីរាជធានីភ្នំពេញ ទៅ ក្រុងព្រះសីហនុ ដែលចាយពេលជាមធ្យម ប្រាំម៉ោង ចុះមកនៅប្រមាណ ពីរម៉ោងប៉ុណ្ណោះ លើសពីនេះវាក៏ជួយកាត់បន្ថយ លើថ្លៃចំណាយពេលធ្វើដំណើរ និងថ្លៃដឹកជញ្ជូនផងដែរ។ 

អត្ថបទ៖ Andra